Ulttyq ekonomıka mınıstri Erbolat Dosaev jaqyn kúnderi Birińǵaı zeınetaqy jınaqtaýshy qoryndaǵy qarajat úkimettiń ınvestısıalyq baǵdarlamalaryna jumsalatyn bolatynyn málimdedi. Onyń aıtýynsha, qańtar aıynan bastap Ulttyq qor men BZJQ-ny basqarý týraly keńester biriktirilgen.

«Zeınetaqy qoryndaǵy qarajat qaıda baǵyttalatynyn sheshetin bolamyz. Qazir qajetti merzimniń naqtylanýyn kútýdemiz. Meniń oıymsha, ol aqpan aıynyń basy bolmaq. Ulttyq bank Úkimetpen birlesip 2016 jyly BZJQ aqshasyn qaıda jumsaý boıynsha usynysyn aıtady» degen mınıstr bul máseleniń Ulttyq kásipkerler palatasynyń zeınetaqy qoryndaǵy aqshany bıznesti qarjylandyrýǵa baǵyttaý týraly ótinishine baılanysty ekenin de aıtqan.

«Ol aqshany qaıda ınvestısıalaý týraly másele bar. Bul aqshalar Úkimettiń de, Ulttyq banktiń de aqshasy emes. Bul bizdiń zeınetkerlerdiń aqshasy. Sondyqtan, kiristiń mol bolýyn qamtamasyz etý basty baǵyt bolady. Al, ekinshi másele, árıne, qarajattyń saqtalýy, qaıda jumsalatyny. Sondyqtan, bul másele jan-jaqty salmaqtanyp sheshiledi» dep, ekonomıka mınıstri sendirip otyr.

Zeınetaqy jınaqtaryn jumsaý Ulttyq banktiń nazarynda bolatynyn aıtqan ol 2016 jyly qor qaıtadan jeke menshikke beriletinin jetkizdi.

«Biz barlyq aımaqtardan, barlyq qaýymdastyqtardan kelgen usynystarmen tanystyq. Qazir BZJQ-daǵy aqsha qansha kólemde, qaıda baǵyttalatyny sheshiledi. Elbasynyń Joldaýyna saı, 2016 jyly zeınetauy aktıvteri jeke qorlarǵa beriledi», - dedi ol.

2013 jyly memlekettiń basqarýyna kóshken Qazaqstandaǵy zeınetaqy aktıvteriniń qaıtadan jeke menshik qorlarǵa ótetini týraly alǵash ret byltyr Ulttyq banktiń sol kezdegi tóraǵasy Qaırat Kelimbetov málimdegen bolatyn.