Keshe Almatydaǵy Raıymbek dańǵylynyń boıynda "Ońaı" elektrondy bılettendirý júıesine narazylyq bildirgen óńir turǵyndary Raıymbek dańǵylyn jaýyp tastady, - dep habarlaıdy "Qamshy" portaly KTK arnasyna silteme jasap.

Narazylyq bildirýshilerdiń aıtýynsha, jańa tólem júıesi oblysta emes, tek Almaty qalasynda engizilgendikten, qala mańyndaǵy aýyl turǵyndary avtobýsqa mine almaı júr.

Qaladaǵy "Saıahat" kólik beketiniń aıaldamasynda turǵan adamdar avtobýsty 2 saǵat kútkenderin aıtady. Qoǵamdyq kólikter munda toqtamaıtyn bolǵan.

"Avtobýstar toqtamaıdy, alty avtobýs ótip ketti. Onda otyrý múmkin emes. "Ońaıdyń" kesirinen avtobýstar azaıdy", - dedi jańa tólem júıesine narazylyq bildirgenderdiń biri Nazymgúl Dúısenova.

Aqyry ashýǵa býlyqqandar "Ońaıdy alyp tastasyn" degen talappen Raıymbek dańǵylynyń boıyna shyǵyp aldy. Aıaqasty júzdegen adam joldy japqany sol edi, aǵylǵan kólikter ıin tiresip keptelip qaldy.
Sonymen qatar, jolaýshylar aımaqta "Ońaı" kartasyna aqsha salýǵa múmkindik joq ekenin aıtady. Osy júıeni engizýge jaýapty "Almaty kólik holdıńi" kompanıasy jaqyn kúnderi máseleni sheshýge ýáde berip otyr.