تاراز مەملەكەتتىك پەداگوگيكالىق ينستيتۋتىندا حيميالىق زەرتحانالار كەشەنى اشىلدى. پايدالانۋعا بەرىلىپ وتىرعان 6 زەرتحانالىق كابينەت زاماناۋي قۇرالدارمەن جابدىقتالعان، - دەپ حابارلايدى «قامشى» پورتالى ينستيتۋتتىڭ باسپا ءسوز قىزمەتىنە سىلتەمە جاساپ.

سالتاناتتى اشىلۋ راسىمىنە «قازفوسفات» كاسىپورنىنىڭ باس ديرەكتورى، «قازاقستاننىڭ ەڭبەك ەرى» اتاعىنىڭ يەگەرى مۇقاش ەسكەندىروۆ قاتىسىپ، ستۋدەنتتەرگە ءوزىنىڭ ومىرلىك تاجىريبەسىمەن ءبولىستى. ءوز كەزەگىندە ستۋدەنتتەر دە «قازفوسفات» سىندى مەكەمەدە تاجىريبەدەن ءوتىپ، جۇمىس ىستەگىسى كەلەتىندىگىن جەتكىزدى.

– بۇگىنگى اشىلىپ وتىرعان زەرتحانا ءبىزدىڭ جان-جاقتى دامۋىمىزعا مول مۇمكىندىك بەرەتىن بولادى. قازىرگى تاڭدا ءبىلىمىمىزدى تەك تەوريالىق تۇرعىدا عانا ەمەس، جاڭا جابدىق ارقىلى ءىس جۇزىندە شىڭداي الامىز. جاستارعا كوڭىل ءبولىپ، بولاشاققا وڭ جول سىلتەۋگە سەپ بولعان باسشىلىققا العىسىمىز زور، – دەيدى اتالعان وقۋ ورنىنىڭ ستۋدەنتى ايسۇلۋ بەكتاسوۆا.

شارا مۇنان سوڭ ««ەڭبەك – ەر اتاندىرادى» تاقىرىبىنداعى كەزدەسۋگە ۇلاستى. جۇزدەسۋدى تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆا جۇرگىزىپ وتىردى.

– ەرتەدە ءبىر ادام دانىشپاننان: «دۇنيەدە كىم باقىتتى؟» – دەپ سۇراعان كورىنەدى. ول ويلانباستان: «دۇنيەدە كوپ ادامدى باقىتقا بولەي بىلگەن ادام باقىتتى»،– دەپ جاۋاپ بەرگەن ەكەن. ۇجىمداعى تالاي ادامعا باقىت كىلتىن ۇستاتقان ءسىزدى باقىتتى جان دەسەك، جاراسىپ كەتەرى انىق. ءسىزدىڭ تىرلىگىڭىز بۇگىندە ءاربىر قازاق بالاسىنا ۇلگى-ونەگە بولارى ءسوزسىز، – دەدى داريا پەرنەش قىزى.

قازاقستاننىڭ ەڭبەك ەرىنىڭ جاستارمەن جۇزدەسۋىندەگى نەگىزگى اڭگىمە اۋانى بۇگىنگى ەڭبەك ادامىنىڭ بەت-بەينەسى، مامان دايارلاۋداعى جاڭاشىلدىقتار، ءوزىنىڭ ءومىر جولىنىڭ جارقىن بەلەستەرى تۋراسىندا ءوربىدى. سونىمەن قاتار، ءىس-شارا اياسىندا «قازفوسفات» كاسىپورنى مەن تاراز مەملەكەتتىك پەداگوگيكالىق ينستيتۋتى اراسىندا بىرىگىپ مامان دايارلاۋ جونىندە كەلىسىم جاسالدى. دۋالدى جۇيە ارقىلى ىسكە اسىرىلاتىن بۇل قادامنىڭ قوس تاراپ ءۇشىن دە تيىمدىلىگى كوپ. ءوندىرىس وشاعى ماماندى قايتا دايارلاپ، جۇمىس ورنىنا بەيىمدەۋگە ۋاقىت كەتىرمەيدى ياكي وقۋ ءۇردىسىنىڭ باسىم بولىگى كاسىپورىندا وتەدى. جوعارى وقۋ ورنىنداعى ءبىلىم الۋشى جاستار ءۇشىن ومىردەگى ءوز ورنىن ەرتە تابۋعا مۇمكىندىك تۋادى، جۇمىسقا ەرتە ارالاسىپ، بەيىمدەلەدى.

– كاسىپورىندارعا جاڭادان وقۋ ءبىتىرىپ بارعان جاس مامانداردى ىسكە ۇيرەتىپ، باۋلۋعا كوپ ۋاقىت كەتەدى. ولاردى كۇن سايىن جاڭارىپ وتىراتىن تەحنيكاعا بەيىمدەۋ قاجەت. بىلەسىزدەر، ءقازىر ەنگىزىلىپ وتىرعان دۋالدى وقىتۋ جۇيەسى جۋىق ارادا ءوز ناتيجەسىن بەرەدى دەپ كۇتىلۋدە. ال، بىزگە تاجىريبە الۋ ماقساتىندا كەلەتىن جاستاردى كەۋدەسىنەن كەرى يتەرمەيمىز. سەبەبى، بولاشاق – جاستار قولىندا، – دەدى مۇقاش زۇلقارناي ۇلى.

جيىن بارىسىندا م. ەسكەندىروۆكە «تاراز مەملەكەتتىك پەداگوگيكالىق ينستيتۋتىنىڭ قۇرمەتتى پروفەسسورى» اتاعى بەرىلدى. قۇرمەت بەلگىسى رەتىندە ەڭبەك ەرىنە گۇل شوقتارى تابىس ەتىلىپ، ءان-جىردان شاشۋ شاشىلدى.