ءماجىلىس دەپۋتاتى قايرات بالابييەۆ زەينەتاقى تولەمدەرىن كىرىس كوزى رەتىندە ساناماي، زەينەتكەرلەردىڭ قارىزىن كەشىرۋى ۇسىنىپ وتىر. 

دەپۋتات پرەمەر-مينيستردىڭ ورىنباسارى ەرمەك كوشەربايەۆتىڭ اتىنا دەپۋتاتتىق ساۋال جولدادى.

"بانكتەرگە بارساڭىز، بار-جوعى 32 مىڭ تەڭگە زەينەتاقىسى بانك كارتاسىنا تۇسپەي جاتىپ جوق بولىپ كەتكەن، زار يلەگەن زەينەتكەرلەردى كورەسىزدەر. جاعدايدى زەرتتەسەك، زەينەتاقى "كىرىس كوزى" بولىپ سانالادى جانە زەينەتاقى الەۋمەتتىك قورعالعان ەسەپشوت ساناتىنا جاتقىزىلماعان. الەۋمەتتىك قورعالعان ەسەپشوتتاردى  اشۋ تەك "كاسپي بانك"، "حالىق بانكى" جانە "سەنتر كرەديت" بانكتەرىنە بەكىتىلگەن. بۇل بانكتەردىڭ فيليالدارى تۇرماق، بانكوماتتارى جوق جەر كوپ. بارلىق جەردە بانكوماتتارى بولماسا دا، بولىمشەلەرى بار "قازپوشتا"  الەۋمەتتىك قورعالعان ەسەپشوتتاردى اشۋعا بولاتىن تىزىمگە  ەنبەگەن. بۇل قاساقانا جاسالعان ارەكەت ەمەس پە؟"، – دەدى ول.

قايرات بالابييەۆتىڭ ايتۋىنشا، ەلدەگى ميكروقارجى ۇيىمدارى ايلىقتان-ايلىققا دەپ از اقشا بەرىپ الداپ، اينالدىرعان 30 مىڭ تەڭگەنى تولەي الماسا دا، وعان ون ەسەلەپ ءوسىم قوسىپ، قارىزعا باتىرىپ جاتىر. 

"ەشبىر تابىس كوزى جوق ازاماتتارعا ۋاقىتشا كومەك بولعانىمەن، وڭايلىقپەن قۇتىلمايتىن قارىزعا اينالىپ كەتەتىنىن كوپشىلىك بىلە بەرمەيدى. ءبىراق، بۇل ءبىزدىڭ بۇقارانىڭ توقتىعىن كورسەتپەيدى"، – دەدى دەپۋتات.