بۇگىن الماتى قالاسى بويىنشا جەمقورلىققا قارسى قىزمەت وكىلدەرى تەرگەگەن اسەت ماتايەۆ «ازاتتىققا» سۇحبات بەردى، - دەپ حابارلايدى «قامشى» پورتالى.
تەرگەۋدەن بوساعان اسەت ماتايەۆ اكەسىنىڭ ءالى الماتى قالاسى بويىنشا جەمقورلىققا قارسى قىزمەت مەكەمەسىندە وتىرعانىن ايتىپ، تەرگەۋ بارىسى تۋرالى بايانداپ بەرگەن.
«ءبىزدى تاڭەرتەڭ الماتى قالاسى بويىنشا جەمقورلىققا قارسى قىزمەت باستىعىنا الىپ باردى. وندا شاتتىق وتەيەۆتەن باسقا (الماتى قالاسى بويىنشا جەمقورلىققا قارسى قىزمەت باستىعى – رەد.) استانادان كەلگەن جەمقورلىققا قارسى ءىس-قيمىل جونىندەگى ۇلتتىق بيۋرو جەدەل دەپارتامەنتى باستىعىنىڭ ورىنباسارى بولدى. ول بىزگە تاعى ءبىر قىلمىستىق ءىس قوزعاي الاتىندىقتارىن، باسپا ءسوز ءماسليحاتىن وتكىزسەك، كەيىن شەگىنۋ قيىن بولاتىنىن ەسكەرتىپ، «ويلانىڭدار. ءبىز ءىستى شۋسىز جابا الامىز»، - دەدى. ءبىراق، اكەم ولارعا «ولاي بولسا، بۇل ءىستى اشۋدىڭ قاجەتى قانشا ەدى؟»، - دەپ نارازىلىق ءبىلدىردى. اكەم استانادا بولعاندا ودان سايلاۋ ناۋقانىندا باسپا ءسوز ءماسليحاتىن وتكىزبەۋ تۋرالى سۇراعان. ءبىز ءبىر جارىم اي بويى، قاڭتاردىڭ باسىنان بەرى ۇندەمەدىك»، - دەگەن اسەت ماتايەۆ قوزعالعان ءىستىڭ نەگىزىنەن ينۆەستيسيا جانە دامۋ مينيسترلىگىنىڭ شەنەۋنىكتەرىنە قاتىستى باستالعانىن ايتىپ وتىر.
ەستەرىڭىزگە سالساق، بۇگىن تاڭەرتەڭ «ۇلتتىق باسپا ءسوز كلۋبى» ءقب-نىڭ جەتەكشىسى، قازاقستان جۋرناليستەر وداعىنىڭ ءتوراعاسى سەيىتقازى ماتايەۆ پەن ونىڭ ۇلى، «قازتاگ» حالىقارالىق اقپارات اگەنتتىگىنىڭ باس ديرەكتورىن الماتى قالاسى بويىنشا جەمقورلىققا قارسى قىزمەت وكىلدەرى تەرگەۋگە الىپ كەتكەن بولاتىن. وعان سەنىپ تاپسىرىلعان مۇلىكتى جىمقىردى جانە سالىق تولەۋدەن جالتاردى دەگەن ايىپ تاعىلىپ وتىر.
پىكىر قالدىرۋ