ازاماتتىق قوعام بولعان سوڭ كونستيتۋسيا ءتۇرلى قوعامدىق ۇيىمدار قۇرۋعا، ازاماتتىق باستامالاردى جۇزەگە اسىرۋعا مۇمكىندىك بەرەدى. قوعامدىق ينستيتۋتتاردىڭ جەتىلۋىنە مەملەكەت دامۋىنىڭ قۇرامداس بولىگى رەتىندە ۇكىمەت تە قولداپ وتىر. ۇستانىمى وڭدى، ماقسات-مۇددەسى ءمالىم ۇيىمداردىڭ جۇمىس ىستەۋىنە ەشكىم قارسى ەمەس. الايدا، زاڭمەن بەرىلگەن وسىنداي مۇمكىندىكتەردى دۇرىس پايدالانىپ ءجۇرمىز بە؟ قوعامدىق ۇيىم رەتىندە توپتاسقان بىرلەستىكتەر ەل ءىشىن الا-تايداي بۇلدىرەتىن تەرىس قوزعالىستارعا اينالىپ كەتپەي مە؟ بۇل – ويلاندىراتىن ماسەلە.
جاقىندا Exclusive سايتى الماتىداعى اۋعان سوعىسى ارداگەرلەرى قامقورلىققا العان وسىنداي ءبىر اسكەري-پاتريوتتىق كلۋبتىڭ جۇمىسى تۋرالى ماتەريال جاريالادى. كلۋب جەتەكشىلەرى مەن تالىمگەرلەرى قانشا جەردەن وزدەرىنىڭ پاتريوتتىق تاربيە بەرۋدى كوزدەيتىن ۇيىم ەكەنىن ايتىپ اقتالعانىمەن، «جاس جاۋىنگەرلەردىڭ» ءجۇرىس-تۇرىسى مەن كۇندەلىكتى ءوتىپ جاتقان ساباقتارى، جاتتىعۋلار كەزىندە قولداناتىن تاسىلدەرى، ءتىپتى، ۇراندارىنا دەيىن بۇل ۇيىمنىڭ قاراپايىم پاتريوتتىق بىرلەستىكتەن گورى، بەلگىلى ءبىر ەرەجەگە ساي ارەكەت ەتەتىن اسكەري بىرلەستىككە جاقىندىعىن اڭعارتىپ تۇر.
«اسكەر» اتالاتىن اسكەري-پاتريوتتىق كلۋبتى اۋعان سوعىسى ارداگەرلەرىنىڭ ۇيىمى قامقورلىققا الىپ، عيماراتىنا دەيىن ازىرلەپ بەرگەنىن ايتقان «اۋعان سوعىسى ارداگەرلەرى مەن مۇگەدەكتەرى ۇيىمدارى ۇيلەستىرۋ كەڭەسىنىڭ» ءتوراعاسى مۇرات ابدۋشكۋروۆ كلۋبتان قاۋىپتەنۋگە نەگىز جوق دەپ وتىر. ال، كلۋب جۇمىسىنا كۇدىكپەن قارايتىنداردى ۇيىم وتىرعان عيماراتقا كوز تىگۋ دەپ تۇسىنەتىن سياقتى.
«اۋعاندىقتار وزدەرى قولدارىنا كۇرەك الىپ، جەرتولەنى تازالاپ، بالالارعا كلۋب اشىپ بەردى. بىزدە ۇسىنىس حاتتار، رۇقسات بەرەتىن قۇجاتتار بار. سوندىقتان، بالالاردان بۇل عيماراتتى ەشكىم الىپ قويماۋىن كەرەك»، - دەيدى ول.
Exclusive سايتىنىڭ اۋعاندىقتار وتكىزگەن جينالىسقا قاتىسقان ءتىلشىسى ءتوراعانىڭ ۇيىم مۇشەلەرىنە «الدەبىر ارانداتۋلارعا» دايىن بولۋى تۋرالى تاپسىرما بەرگەنىن جازادى. اۋعاندىقتار قانداي ارانداتۋ تۋرالى ايتىپ وتىر؟ ونداي ارانداتۋلار بولىپ جاتسا، الدىن الاتىن، ارانداتۋشىلاردى جاۋاپقا تارتاتىن ءتيىستى مەكەمەلەر بار ەمەس پە؟ اۋعان ارداگەرلەرىنە ارانداتۋشىلىقپەن كۇرەستى پاتريوتتىق تاربيەمەن شاتىستىراتىنداي نە كورىندى؟ الدە، كلۋب جەتەكشىلەرى جاسوسپىرىمدەردى وزدەرىنىڭ يدەيالىق قارسىلاستارىمەن كۇرەسكە پايدالانۋدى كوزدەپ وتىر ما؟
ولاي دەيتىنىمىز، كلۋب مۇشەلەرى كۇن سايىن ايقايلاپ ايتىپ جۇرەتىن «سپەسنازۋ – سلاۆا!»، «اسكەرۋ – سلاۆا!»، «ۆراگام – سمەرت!»، «كتو لۋچشيي؟ – مى! كتو؟! – نيكتو، كرومە ناس!»، «ناش ديەۆيز؟ جيزن نارودۋ، چەست نيكومۋ. ناشا سلۋجبا؟ ۆ وگون ي ۆ ۆودۋ، زاششيششات سۆويۋ سترانۋ! كتو تاكوي ناستوياششيي اسكەروۆەس؟ وپلوت، نادەجدا ي رەزەرۆ «سويۋزا ۆەتەرانوۆ افگانيستانا!» دەگەن ۇراندار شىنىمەن دە اگرەسسيالىق كوڭىل-كۇيدىڭ كورىنىسىندەي اسەر قالدىرادى.
سونداي-اق، سايت ءتىلشىسى كلۋبتىڭ ۆلاد ەسىمدى نۇسقاۋشىسى بالالارعا گراناتا سىنىقتارىنان قالاي امان قالۋ تاسىلدەرىن ۇيرەتىپ جاتقانىن كورگەنىن جازادى. گراناتادان قورعانۋ تاسىلدەرىن ۇيرەنەتىندەي «اسكەر» كلۋبى قانداي قاقتىعىسقا ازىرلەنۋدە؟
وسى سەكىلدى ۇيىمدارعا قاتىستى مۇنداي ساۋالداردى كوپتەپ قويۋعا بولادى. ول سۇراقتاردىڭ بارلىعىنا بىردەي جاۋاپ الۋ دا مۇمكىن بولماس. ءبىراق، ءبىر ماسەلەنى ەسكەرۋ كەرەك. جاستار تاربيەسى، ونىڭ ىشىندە، مەكتەپ جاسىنداعى بالالارمەن جۇمىس مەملەكەتتىك ورگانداردىڭ اينالىساتىن شارۋاسى. قوعامدىق ۇيىمدار تاراپىنان بولعان باستامالار دا مەملەكەت باقىلاۋىندا بولۋى ءتيىس. ەل اۋماعىندا جۇمىس ىستەيتىن وسىنداي اسكەري-پاتريوتتىق كلۋبتاردىڭ ءبىرى قالماي باس اسكەري پروكۋراتۋرا جانىنداعى اسكەري-پاتريوتتىق تاربيە جۇمىستارىن ۇيلەستىرەتىن كەڭەستىڭ تىزىمىنە الىنسا قۇبا-قۇپ. ال، جاقىن بولاشاقتا پاتريوتتىق ۇيىمداردىڭ جۇمىسىن ۇيلەستىرۋ ءىسى تولىقتاي ءبىلىم جانە عىلىم مينيسترلىگىنىڭ نەمەسە مادەنيەت جانە سپورت مينيسترلىگىنىڭ قۇزىرىنا ءوتۋى ءتيىس دەپ سانايمىز.
پاتريوتتىق تاربيە بەرۋدى مەكتەپ جاسىنداعى بالالارعا قارۋ قولدانۋدى ۇيرەتۋ، ولاردى قارۋ-جاراق تۇرلەرىمەن تانىستىرۋ دەپ تۇسىنبەۋىمىز قاجەت. جاسوسپىرىمدەر بابالار تاريحىن، ولاردىڭ ەرلىك جولىن ءبىلىپ وسسە، ەڭ الدىمەن رۋحاني تاربيە السا، كەۋدەسىندە ەلگە دەگەن ماحاببات قالىپتاسسا عانا وتانىنىڭ شىن قورعاۋشىسى بولا الادى. ال، قارۋ قولدانۋ ادىستەرىن اسكەرگە بارعاندا نەمەسە ارنايى كۋرستاردان ۇيرەنۋى كەرەك.
«ءبىز تەك پاتريوتتىق تاربيە بەرۋمەن اينالىسامىز. بالالاردى وتانىن سۇيۋگە تاربيەلەيمىز» دەگەن سوزدەرى راس بولسا، مۇنداي ۇيىمداردىڭ ارتىندا تۇرعان مىرزالار وقۋ، جاتتىعۋ جۇمىستارىن ەڭ الدىمەن قازاق تىلىندە جۇرگىزىپ، بالالارعا قازاق حالقىنىڭ تاريحىن، قابانباي، بوگەنباي، ناۋرىزباي باستاعان داڭقتى باتىرلاردىڭ ەرلىكتەرىن ۇلگى ەتىپ كورسەتۋلەرى كەرەك. بۇگىندە ءپاتريوتيزمنىڭ باستى بەلگىسى مەن شىنايى كورسەتكىشى – قازاقستان رەسپۋبليكاسىنىڭ مەملەكەتتىك ءتىلى – قازاق تىلىنە، ونىڭ رامىزدەرى مەن وتكەن تاريحىنا دەگەن قۇرمەت بولۋى ءتيىس. ورىس تىلىندە جۇرگىزىلەتىن مۇنداي سەكسيالار مەن ۇيىمداردىڭ رەسەيلىك كلۋبتاردان ەش ايىرماسى جوق. وندا بۇل كلۋبتار قاي ەلدىڭ پاتريوتتارىن تاربيەلەپ وتىر؟ وسى سۇراقتارعا ءتيىستى جاۋاپ بەرىلمەسە، پاتريوتتىق كلۋبتاردىڭ جۇمىسى اسكەري جاتتىرعۋلارمەن شەكتەلە بەرسە قوعامداعى «مۇنداي ۇيىمدار بالالارىمىزدان سودىر دايىنداپ جاتقان جوق پا؟» دەگەن كۇدىك سەيىلمەك ەمەس.
جومارت ابدوللا ۇلى
