قازاقستاندا جاپپاي ساتىلىمعا شىعارىلاتىن جەردىڭ قۇنى بەلگىلى بولدى، - دەپ حابارلايدى «قامشى» پورتالى 31-ارناعا سىلتەمە جاساپ.
شەتەلدىكتەردىڭ كوزى ءتۇسىپ وتىرعان شۇرايلى، جايىلىمدى جەرلەردىڭ ءار گەكتارى ەڭ قىمبات دەگەندە 130 مىڭعا ساتىلادى. ەڭ ارزانى 3-4 مىڭ تەڭگە. دەمەك، بوگەنبايدىڭ قانى مەن ابىلايدىڭ تەرى توگىلگەن جەردىڭ قۇنى 1 قوراپ پامپەرستەن دە ارزان كەتۋى مۇمكىن. قالجىڭ ەمەس. ۇلتتىق ەكونوميكا مينيسترلىگى بۇگىن ءوزى وسىلاي دەپ ايتتى. ءتىپتى، ەلدىڭ نارازىلىعىنا قاراماستان، مينيسترلىك 1 ملن 400 مىڭ گەكتار جەردى ساۋدالاۋعا دايىنداپ قويىپتى.
جەر ساتۋعا بۇقارا جاپپاي نارازىلىق ءبىلدىرىپ جاتسا، مينيسترلىك باياعىدا ول جەردىڭ باعاسىن بەكىتىپ قويىپتى. كۋۆەيتتەي مەملەكەت اۋماعى سياتىن قازاق جەرى ءنارى مەن قۇنارىنا قاراي ساۋدالانادى ەكەن.
سامات سارسەنوۆ، ق ر ۇلتتىق ەكونوميكا مينيسترلىگى باسقارما باسشىسى:
- كەي جايىلىم جەرلەر 2-4 مىڭ تەڭگە تۇرۋى مۇمكىن گەكتارى. ەڭ باعالى جەرلەر سۋارمالى 125 مىڭ تەڭگەگە دەيىن بارادى گەكتارى. بۇل جەر تۇرىنە بايلانىستى.
1 گەكتارى 1 قوراپ پامپەرستىڭ قۇنىنان دا ارزانعا كەتكەلى جاتسا دا، "جەردى قىمباتقا ساتىپ جاتقان جوقپىز" دەگەن مينيسترلىك قاراپايىم شارۋانىڭ دا جەرگە قولى جەتەتىنىن ايتادى. الايدا ءار ادامنىڭ ەڭ ازى قانشا جەر الۋعا قۇقىسى بار ەكەنىن ۇكىمەت دەڭگەيىندە ەمەس، سول باياعى شەندىلەر، اكىمدەر شەشەدى ەكەن. ال ارانى كەڭ وليگارحتاردىڭ ءورىسى ودان سايىن كەڭي تۇسپەيدى مە دەگەنگە مينيسترلىك جۇباتۋ ايتقانداي بولدى.
سامات سارسەنوۆ، ق ر ۇلتتىق ەكونوميكا مينيسترلىگى باسقارما باسشىسى:
- ءبىر باي ادامدارعا وسى اۋىلشارۋاشىلىق جەرلەر ءوتىپ كەتىپ، ءبىر قولعا شوعىرلانۋى مۇمكىن بە؟ مۇمكىن ەمەس، سەبەبى شەكتەۋ بار. مىسالى كەي اۋدانداردا سۋارمالى جەرلەر از كولەمدە، شەكتەۋ 3-4 گا دەيىن بار. وندىرىستىك كووپەراتيۆتەردە 50،60،80 مىڭ گا دەيىن بار.
ارينە بۇل قۇجات جۇزىندە دايىندالاتىن دۇنيە. شەندى-شەكپەندى جەردى بارلىق تۋعان تۋىس پەن دوس جاران اتىنا اۋدارسا دا سوت جوق، تەك جەكەلەگەن ادامعا جازىلماۋى ءتيىس. ءبىراق بۇقارا قانشا بازىنا ايتسا دا، جەر ساتىلادى. كۇنى كەشە مينيستر دوسايەۆ 645 مىڭ جەر دايىن دەسە، بۇگىن مينيسترلىك 1 ملن 400 مىڭنان استام جەردى ساتىلىمعا ازىرلەپ قويىپتى.
ەڭ كوپ جەر قوستاناي وبلىسىندا ساتىلادى. 300 مىڭ گەكتار اۋكسيونعا ءازىر تۇر. كەيىن ساتىلاتىن اۋماقتىڭ دەنى شىعىس قازاقستاندا ياعني، 225 مىڭنان ارتىق بولسا، قاراعاندى وبلىسى دا سول شامالاس. ەڭ از جەر باتىس قازاقستاندا ساۋداعا تۇسەدى. مينيسترلىك سانداردىڭ ءالى وزگەرەتىنىن ايتقانىمەن، جەردى الۋعا ءوتىنىش ءبىلدىرىپ جاتقاندار دا بار ەكەن.
اماندىق باتتالوۆ، الماتى وبلىسىنىڭ اكىمى:
- الماتى وبلىسىنان 651 مىڭ جەر ۋچاسكەسى، 94 مىڭ گەكتاردان استام جەردى ساتىلىمعا ازىرلەپ قويدىق. اۋكسيونعا شىعارۋ ءۇشىن 60 ملن تەڭگەدەي قاراجات جۇمسالدى. ءقازىر جەر الۋعا 211 ادام ءوتىنىش بىلدىرگەن.
شەكارا ماڭىنداعى جەرلەر جەكە مەنشىككە وتپەيدى دەگەن مينيسترلىك ءقازىر جەردى جالعا الىپ وتىرعان ادامدارعا "جەردى ساتىپ ال" دەپ ەشكىم ماجبۇرلەمەيدى دەيدى. ەرىك وزىندە، باستىسى، جەڭىلدىك جەتەدى دەپ ماقتاندى مينيسترلىك. جەر ءباس ساۋداعا سالىنسا، 50 پايىز جەڭىلدىك، 10 جىل ءبولىپ تولەۋ تاعى بار. تيىنعا كەتەتىن جەر، باستىسى شەتەلدىكتەرگە ساتىلمايدى دەپ جۇباتتى بيلىك. الايدا ءقازىر وزگە ەل ازاماتتارى قۇرىلىس، وزگە دە ماقساتتار ءۇشىن 1400-دەن استام جەر تەلىمىن ساتىپ العان.
