اقتوبە قالاسىندا 18 ساۋىردەن باستاپ قوعامدىق كولىكتەگى زەينەتكەرلەرگە ارنالعان جول ءجۇرۋ بيلەتتەرىنە جەڭىلدىك الىنىپ تاستالدى. سوعان بايلانىستى زەينەتكەرلەر نارازىلىق بىلدىرۋدە، - دەپ حابارلايدى «قامشى» پورتالى.

بۇل وزگەرىس تەك زەينەتكەرلەر اراسىندا عانا ەمەس الەۋمەتتىك جەلىدە دە قىزۋ تالقىلانۋدا. جەڭىلدىكتىڭ الىنىپ تاستالعانىنان حابارسىز قاريالاردى اۆتوبۋس باقىلاۋشىلارى كولىكتەن كۇشپەن ءتۇسىرىپ جىبەرۋ وقيعالارى تۋرالى جەلى قولدانۋشىلارى جارىسا جازۋدا.

ال، ەندى ءبىر ازاماتتار كولىگى بار ازاماتتاردى زەينەتكەرلەردى تەگىن تاسىمالداۋعا ۇگىتتەۋدە. تۇرىم الاگوزوۆ ەسىمدى قولدانۋشى جۇرگىزۋشىلەردەن جۇمىسقا بارا جاتقاندا، قايتار جولدا زەينەتكەرلەردى تەگىن تاسىمالداۋدى سۇرادى.

«كۇندە تاڭەرتەڭ ءوز ماشينالارىمىزبەن (بۇگىندە ءار وتباسىندا جەكە كولىك بار) جۇمىسقا بارا جاتقاندا، تۇسكى ءۇزىلىس كەزىندە قاريالار ءۇشىن تەگىن تاكسي بولىڭىزدار! ءبىر اپتا! بولدى... سوسىن اۆتوبۋس باسشىلارى ءوز قاتەلىكتەرىن ءتۇسىنىپ، دەپۋتات دوستارىمەن بىرگە اتالارىمىزعا قويعان سانكسيالارىنان باس تارتادى»، - دەپ جازدى.