ق ر تاۋەلسىزدىگىنىڭ 25 جىلدىعى جانە الماتى قالاسىنىڭ 1000 جىلدىق مەرەيتويلارى قارساڭىندا ءال-فارابي اتىنداعى قازاق ۇلتتىق ۋنيۆەرسيتەتىندە جىل سايىنعى داستۇرمەن تۇركىتەكتەس ەلدەردىڭ ورتاق مەرەكەسى – ءاز-ناۋرىز مەيرامى كەڭ كولەمدە اتاپ ءوتىلدى، - دەپ حابارلايدى «قامشى» پورتالى.

سوڭعى 5 جىل كولەمىندە  قازۇۋ ايتۋلى مەرەكەنى ق ر سىرتقى ىستەر مينيسترلىگى جانە وڭتۇستىك استانانىڭ ەلشىلىك بولىمدەرىمەن بىرىگە تويلاپ كەلەدى. وقىتۋشى-پروفەسسورلار قۇرامى جانە ستۋدەنتتەرمەن قاتار جيىنعا 50-دەن اسا شەتەلدىك قوناقتار قاتىستى. ونىڭ ىشىندە جۇڭگو، اقش، تۇركيا، يران، يسپانيا، فرانسيا، گفر، كورەيا، ينديا جانە ت.ب. مەملەكەتتەر ەلشىلىكتەرىنىڭ باسشىلارى، بۇۇ، ەسكاتو، اوىسشك ۇيىمدارى مەن شەتەلدىك جەتەكشى جوو-لار وكىلدەرى بولدى.   

جاڭارۋ مەن وركەندەۋدىڭ مەيرامى ناۋرىز باعدارلاماسى اياسىندا شەتەلدىك قوناقتاردىڭ جىل سايىن قازۇۋ-دىڭ جاڭا ينفراقۇرىلىمدىق نىساندارىمەن تانىسۋى بۇگىندە داستۇرگە اينالىپ وتىر. بۇل جولى الەمدىك كەڭىستىكتە تەڭدەسى جوق «كەرەمەت» ستۋدەنتتەرگە قىزمەت كورسەتۋ ورتالىعى شاقىرىلعان قوناقتارعا ۇلكەن اسەر قالدىردى. جۇڭگو ەلىنىڭ قازاقستانداعى باس كونسۋلى چجان ۆەي اتاپ وتكەندەي، «ءبىر تەرەزە» قاعيداسى بويىنشا قىزمەت كورسەتەتىن وسىنداي بىرەگەي ۋنيۆەرسيتەتتىك سەرۆيس ورتالىعىنىڭ بولۋى كوپتەگەن الەمدىك جوو-لارعا ۇلگى».

سونداي-اق قازۇۋ قالاشىعىندا جاڭادان بوي كوتەرىپ، قولدانىسقا بەرىلگەلى وتىرعان 25 مەترلىك ءجۇزۋ باسسەينىنىڭ عيماراتى تانىستىرىلدى. تۇرعىزىلعان عيمارات قۇرىلىسى مەملەكەتتىك جەكەمەنشىك ارىپتەستىك نەگىزىندە  ىسكە اسىرىلعان جانە جۋىق ارادا بۇل باسسەيندە ۋنيۆەرسيتەت ستۋدەنتتەرى عانا ەمەس، قالا تۇرعىندارى دا جۇزە الاتىن بولادى.

ىرىس پەن ىنتىماقتىڭ جارشىسىنا اينالعان مەرەكەگە وراي 25 كيىز ءۇي تىگىلىپ، جيىلعان كوپشىلىككە ۇلتتىق تاعامدارمەن كومكەرىلگەن اق داستارقان جايىلدى. مەرەكەلىك شارانى قازۇۋ رەكتورى عالىم مۇتانوۆ اشتى. ول: «بۇگىندە ناۋرىز – ۇلتىمىزدىڭ وسى كۇنگە دەيىن جەتكەن سىندارلى جەتىستىكتەرى، قۋانىشتى جەڭىستەرىمەن ۇندەسكەن مەرەكە. دوستىق پەن كەلىسىم، سەنىم مەن تۇسىنىستىك باستى ۇستانىمى بولعان قازاق ەلىن كوركەيتكەن ەلباسىمىزدىڭ ەڭبەگىنىڭ ارقاسىندا جاڭا جىلدى جاڭا جەتىستىكتەرمەن، جارقىن بولاشاققا دەگەن سەنىممەن قارسى الىپ وتىرمىز»، – دەپ ءسوز باستاپ، جيىلعان كوپشىلىككە جۇرەكجاردى تىلەگىن جەتكىزدى. ەلشىلىك بولىمدەردىڭ اتىنان قازاقستانداعى اقش-تىڭ باس كونسۋلى مارك مۋدي شىعىپ، ۋنيۆەرسيتەت ۇجىمىن جانە بارشا قازاقستاندىقتاردى قازاق تىلىندە قۇتتىقتادى.

جيىن بارىسى ودان ءارى ۋنيۆەرسيتەت ستۋدەنتتەرى مەن كوركەمونەرپازدار ۇيىرمەلەرىنىڭ مۇشەلەرى دايىنداعان «ناۋرىز-نۇرلى جول» اتتى مەرەكەلىك كونسەرتپەن جالعاسىن تاپتى. ونەرپازدار اتىنان اتالمىش مەيرامدى اسپەتتەيتىن «بايتەرەك»، «سامۇرىق»، «كۇن»، «جاقسىلىق پەن جاماندىق»،  «جەردىڭ ويانۋى»، «جەتى ءداننىڭ تۋىلۋى»، «جىبەك جولى»، «الماتىعا 1000 جىل» اتتى مۋزىكالىق-تەاترلاندىرىلعان قويىلىمدارى قويىلدى. دومبىرادان كۇمبىرلى كۇي توگىلىپ، بي بيلەنىپ، ونەرلى جاستاردىڭ سىيى رەتىندە اۋەزدى اندەر اۋەلەدى.

ۋنيۆەرسيتەت باسشىلىعى مەن مەيرامنىڭ قۇرمەتتى قوناقتارى بىرىگىپ، ەلىمىز بەن وزگە مەملەكەتتەر اراسىنداعى دوستىق قارىم-قاتىناس ۇلعايا بەرسىن دەگەن نيەتپەن قالاشىقتاعى «بەيبىتشىلىك باعىنا» اعاش كوشەتتەرىن وتىرعىزدى.