Ranking.kz ساراپشىلارىنىڭ حابارلاۋىنشا بيىل ەلىمىزدىڭ ەڭبەك نارىعىنداعى احۋال ءبىرشاما شيەلەنىسە تۇسكەن. ەكونوميكالىق ءوسىم كورسەتكىشتەرىنىڭ تومەندەۋى جۇمىس ورىندارى مەن ەڭبەكاقى مولشەرىن قىسقارتۋعا الىپ كەلۋدە. ستاتيستيكالىق مالىمەتتەر ازىرگە جۇمىسسىزدىقتىڭ وسكەنىن كورسەتپەسە دە، سوڭعى سەگىز ايداعى جۇمىسپەن قامتۋ كورسەتكىشى رەكوردتىق دەڭگەيگە دەيىن قۇلدىراعان.

وتكەن جىلدىڭ ءتورتىنشى توقسانىندا ەلىمىزدەگى جۇمىسپەن قامتىلعانداردىڭ ناقتى سانى 3 ميلليون 629 مىڭ ادامدى قۇراعان. بۇل سانداردىڭ 2014 جىلعى مەجەدەن بار بولعانى 0،3 پايىزعا نەمەسە 10،4 مىڭ ادامعا عانا ارتىق ەكەنىن ەسكەرگەن ءجون. ياعني، جۇمىسپەن قامتۋ كورسەتكىشتەرىنىڭ ارتۋى جىلدان جىلعا كەمىپ كەلەدى.

داعدارىستىڭ تاعى ءبىر بەلگىسى رەتىندە ورتاشا جالاقى كولەمىنىڭ دە كەمۋىن ايتۋعا بولادى. وتكەن جىلدىڭ سوڭعى توقسانىندا بۇل كورسەتكىش 136100 تەڭگەنى قۇراعان. ال، 2015 جىلعى ينفلياسيا كولەمى 13،6 پايىزعا جەتكەن.

بۇدان بولەك، ستاتيستيكالىق مالىمەتتەر وڭىرلەرگە قاتىستى دا ءبىرقاتار پروبلەمالاردىڭ قۇلاعىن قىلتيتىپ وتىر. اتاپ ايتقاندا، ءوندىرىستى وڭىرلەردە وتكەن جىلدىڭ سوڭىنان بەرى جالدانبالى جۇمىسشىلاردىڭ قىسقارۋى بايقالادى. مىسالى، قوستاناي وبلىسىندا 3 پايىز، قاراعاندى وبلىسىندا 2،4 پايىز، سولتۇستىك قازاقستان مەن اقمولا وبلىستارىندا 2 پايىز، شىعىس قازاقستاندا 1،9 پايىز شتاتتىق قىسقارتۋلار ورىن العان.

ەسەسىنە، وڭتۇستىك وڭىرلەردە اگرارلىق ماماندارعا سۇرانىس ارتقان. وقو-دا بۇل كورسەتكىش 4،3، الماتى وبلىسىندا 3،6، قىزىلوردا وبلىسىندا 1،8 پايىزعا ارتقان.

استانا مەن الماتىنىڭ ەڭبەك نارىعىنداعى احۋال دا قايشىلىققا تولى بولىپ وتىر. ماسەلەن استانادا جاڭا جۇمىس ورىندارىنىڭ سانى 5،2 پايىزعا (13،6 مىڭ ورىنعا) ءوستى دەلىنسە، الماتىدا كەرىسىنشە بۇل كورسەتكىش 4 مىڭ ادامعا نەمەسە 0،1 پايىزعا كەمىگەن.

ساراپشىلار تاۋ-كەن ونەركاسىبى سالاسىندا جۇمىسشىلاردىڭ 4،6 پايىزى قىسقارتۋعا ۇشىراعانىن ايتادى.

وسى جەردە ەلىمىزدىڭ بىردە ءبىر وبلىسىندا ەڭبەكاقىنىڭ ءوسۋى ينفلياسيانىڭ رەسمي كورسەتكىشىنە جەتپەگەنىن ايتا كەتۋ قاجەت. بقو-دا ەڭبەكاقى 11،5 پايىزعا، استانادا 8،4 پايىزعا، پاۆلوداردا جانە 6،8 پايىزعا، اتىراۋ وبلىسىندا 6،7 پايىزعا جالاقى وسكەنىمەن، بۇل ءوسىم ينفلياسيا دەڭگەيىنەن تومەن بولىپ وتىر.

ال، ەكى وبلىستا (ماڭعىستاۋدا 2 پايىزعا، اقتوبە وبلىسىندا 1،1 پايىزعا) ەڭبەكاقى قىسقارعان. الايدا، ماڭعىستاۋ وبلىسىنداعى ورتاشا جالاقى رەسپۋبليكا بويىنشا جوعارعى كورسەتكىشكە يە بولىپ وتىر.

وسىلايشا بىر-بىرىنە كەرەعار ستاتيستيكالىق دەرەكتەردىڭ ءوزى ەلدىڭ الەۋمەتتىك احۋالىنىڭ وڭالۋ ورنىنا، كەرى كەتكەنىن جاسىرا الماي وتىر.

ازىرلەگەن: جومارت ابدوللا ۇلى

مۇحامەدي ۇلى ميۋزيكل جانرىنا دەن قويماق

مادەنيەت جانە سپورت ءمينيسترى الداعى ۋاقىتتا ميۋزيكل جانرىن جانداندىرۋدى قولعا الاتىن بولادى، - دەپ حابارلايدى «قامشى» پورتالى قازاقپاراتقا سىلتەمە جاساپ.

بۇل تۋرالى بۇگىن پارلامەنت سەناتىنداعى كەزدەسۋ بارىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى مالىمدەگەن.

ءسوز اراسىندا مينيستر اعىمداعى جىلدان باستاپ «ورتالىق كونسەرت زالى» ۆەدومستۆونىڭ قاراماعىنا وتكەنىن العا تارتىپ، الداعى ۋاقىتتا «قازاقكونسەرت» برەندىن  استاناعا كوشىرۋ تۋرالى شەشىم قابىلدانعانىن جەتكىزدى.

«ءبىزدىڭ الداعى ۋاقىتتا اتقاراتىن باستى ماقساتىمىزدىڭ ءبىرى - جانرلاردى اشۋ، دامىتۋ. سونىڭ ىشىندە قازاق كورەرمەندەرىنە تاڭسىق بولىپ كەلەتىن ميۋزيكل جانرىنا جان ءبىتىرۋ كەرەك. ويتكەنى، بىزدە جاڭا تەاترلار بار، فولكلورلىق جانرلار  بار. دەگەنمەن، قازاقستاندا ميۋزيكل سەكىلدى جانر جوق.  وسى باعىتتا ءقازىر «ميۋزيكل استانا» ۇجىمىن قۇرۋدى قولعا الۋدامىز»، - دەدى مينيستر ا. مۇحامەدي ۇلى.