قاراعاندىدا زاڭسىز شەكارا اسىپ، سيرياعا اتتانباق بولعان جىگىت 6 جىلعا باس بوستاندىعىنان ايىرىلدى، - دەپ حابارلايدى Qamshy.kz استانا تەلەارناسىنا سىلتەمە جاساپ.

 34 جاستاعى 4 بالانىڭ اكەسىنە قاتىستى قازىبەك بي اۋداندىق سوتى وسىنداي ۇكىم شىعاردى. ول جازاسىن جالپى رەجيمدەگى تۇزەتۋ مەكەمەسىندە وتەيتىن بولدى.  
 

«ۋسمان كاسۋموۆ قىلمىستىق كودەكستىڭ 392 بابى 1ء-ىنشى بولىمىمەن «قازاقستان شەكاراسىنان زاڭسىز اسۋ ارەكەتى» جانە «تەرروريستىك توپتارعا قوسىلۋعا وقتالۋ» باپتارىمەن ايىپتالدى. مۇلكى تاركىلەنەتىن بولادى»، - دەيدى قاراعاندى وبلىستىق سوتىنىڭ باسپا ءسوز حاتشىسى گۇلبارشىن جىتىكوۆا
 

وبلىستىق سوتتىڭ دەرەگىنشە، ايىپتالۋشى دايش لاڭكەستىك ۇيىمىنىڭ قۇرامىنا كىرۋگە وقتالعان. بۇل ۇيىمنىڭ قىزمەتىنە تيىم سالىنعانىن بىلە تۇرا، وسىنداي ارەكەتكە بارعان. جەرلەسىنىڭ قۇجاتىن ۇرلاپ الىپ، سول قۇجات ارقىلى قىرعىزستانعا ءوتىپ، كەيىن تۇركياعا ۇشىپ بارعان. قىركۇيەك ايىندا سول ەلدىڭ گازيانتەپ قالاسىنان سيرياعا اتتانعالى تۇرعان جەرىنەن تۇرىك پوليسەيلەرىنىڭ قولىنا ءتۇسىپ، قازاقستانعا قايتارىلدى. سوت وتىرىسىندا ول كىناسىن مويىندامادى. سيرياعا اقشا تابۋ ماقساتىندا بارماق بولعانىن ايتىپ باقتى. الايدا، سوت ونى ايىپتى دەپ تانىدى.