وتباسىن اسىراۋعا شاماسى كەلمەگەن ەركەكتەر پسيحولوگ جاعالاپ ءجۇر. ەلىمىزدە تۇرمىس تاۋقىمەتىنە توزە الماي، جۇيكەسى سىر بەرگەن ازاماتتاردىڭ سانى ارتىپتى، - دەپ حابارلايدى كتك ارناسى . 

جىگەرى قۇم بولعان سوقتالداي جىگىتتەر پسيحولوگ مامانداردىڭ كومەگىنە جۇگىنۋگە ءماجبۇر. دارىگەرلەر ءۇشىن بۇل تابىس كوزى بولعانىمەن، ولار جۇيكەسى جۇقارعان ەركەكتەرگە ەرەكشە الاڭداۋشىلىق تانىتىپ وتىر.

تۇرمىس تاۋقىمەتى الماتىلىق ەر ازاماتتارعا قاتتى اسەر ەتكەن سىڭايلى. سوڭعى 1 جىل ىشىندە پسيحولوگتىڭ ەسىگىن قاققان وتاعاسىلار سانىنىڭ كۇرت ءوسۋى وسىعان دالەل. تابىستىڭ ازايۋى، وتباسىنداعى قيىندىقپەن باسى قاتقان ولار وسىلاي ماماننان كەڭەس سۇراۋعا ءماجبۇر. ءقازىر ءبىر دارىگەردىڭ ءوزى ايدىڭ ىشىندە 10-نان استام جىگىتپەن جۇمىس ىستەيدى.

"پسيحولوگيالىق كومەك سۇرايتىن ەر ازاماتتار سوڭعى كەزدەرى جيىلەپ كەلىپ جاتىر. سەبەبى، ەكونوميكالىق جاعدايعا بايلانىستى، وتباسىنداعى ماتەريالدىق جاعدايعا بايلانىستى. حالقىمىزعا بەلگىلى ەر ازاماتتار دا بار. ولار دا كەلەدى"، - دەيدى  پسيحولوگ كۇلماش ەلشىبايەۆا.

مۇندا كەلۋشىلەردىڭ جاس شاماسى نەگىزىنەن 30 بەن 50 جاس ارالىعىندا. كوبى وتباسىن اسىراۋ قيىنداعانىن ايتىپ شاعىمدانادى ەكەن. جىگىتتەردىڭ بۇلاي جاسۋى پسيحولوگتاردى الاڭداتىپ وتىر.

"قاراجاتتىڭ جەتىسپەۋشىلىگى، جۇمىستىڭ بولماي قالعان كەزدەرى بولدى.  ەشكىم ماجبۇرلەمەدى. مەن ءوز ەركىممەن كەلدىم. ەندى شىنى كەرەك اشۋلاندىم، قاتتى. نە ىستەرىمدى بىلمەدىم"، - دەيدى كەلۋشىلەردىڭ ءبىرى.

الماتىلىق پسيحولوگتاردا وسىلاي كۇندە قاربالاس. ءبىر قىزىعى، وتباسىن اسىراي الماعان ەرلەردىڭ پسيحولوگقا اقشانى قايدان تاباتىنى تۇسىنىكسىز. سەبەبى، مامانداردىڭ ءبىر ساعاتتىق اڭگىمەسىنىڭ قۇنى ورتا ەسەپپەن 7 مىڭ تەڭگە. ال، ەڭ بىلىكتىلەرىنىكى 25 مىڭعا دەيىن جەتەدى.

ال ەرلەردىڭ باسىنا تۇسكەن كۇيزەلىستى جەڭۋ ءۇشىن پسيحولوگتىڭ الدىنا كەمى 3 رەت بارۋ قاجەت. ءبىرىنشى قابىلداۋدان قالپىنا كەلەتىندەر سيرەك. ءتىپتى، مۇنداي جاعدايدا استرولوگتار مەن كورىپكەلدەردى جاعالاپ كەتەتىندەر دە كوپتەپ كەزدەسەدى ەكەن. ال كۇيزەلىستىڭ الدىن الۋ ءۇشىن تەككە كۇيگەلەكتەنبەۋدىڭ ءارى ايەلدىڭ ەرىنە دەمەۋ بولۋىنىڭ ماڭىزى زور دەيدى ماماندار.