1966 جىلى 20 جەلتوقساندا ءۇرىمجى قالاسىندا تۋعان. اكەسى جالەل جاس كەزىندە ءۇش ايماق توڭكەرىسىنە قاتىسىپ، ۇلتتىق ارميا قاتارىندا بولعان. شەشەسى ءباتيما قاپىش قىزى دا جوعارى مەكتەپ بىتىرگەن سوڭ،ءۇرىمجى، فۋكاڭ، ماناس وڭىرلەرىندە مەملەكەتتىك قىزمەتتە بولدى.
جاسارات 1985-1990 جىلدار ارالىعىندا شىڭجاڭ مەديسينا ينستيتۋتىندا ءبىلىم الدى. كەيىن مەديسينا ۋنيۆەرسيتەتىندە ۇزاق جىل قىزمەت جاساپ، مەديسينا عىلىمىنىڭ دوكتورى دارەجەسىنە دەيىن كوتەرىلدى. ءقازىر شىڭجاڭ اۆتونومياسىنىڭ سۇيەك اۋرۋلارىن زەرتتەۋ ورتالىعىندا قوزعالىس مەديسيناسىن زەرتتەۋ ءبولىمىنىڭ مەڭگەرۋشىسى مىندەتىن اتقارۋدا. سونىمەن بىرگە شىڭجاڭ ءداستۇرلى قازاق مەديسيناسى قوعامىنىڭ القاسى.
ول ۇزاق جىل شاتىرشالى وكشە سۇيەكتى جالعاۋ ءادىسىن زەرتتەپ، ايتۋلى ناتيجەلەرگە قول جەتكىزدى. بۇگىنگى تاڭدا بۇل جەتىستىك جۇڭگو مەديسيناسىندا كەڭىنەن پايدالانىلۋدا. اتالمىش تاقىرىپتا 15 عىلىمي ماقالا جاريالادى. ونىڭ ىشىندە «Factors influencing the tensile strength of repaired Achilles tendon A biomechanical experiment study» دەگەن ماقالاسى حالىقارالىق بەلدى جۋرنال SCI-دا جارىق كوردى.
جاسارات جالەل ۇلى ءوز ونەرىن ۇشتاي ءتۇسۋ ءۇشىن، بەيجىڭ قوزعالىس مەديسيناسىن زەرتتەۋ ورتالىعى شانحاي حۋاشان ەمحاناسىنىڭ سۇيەك ءبولىمى، شانحاي ۋنيۆەرسيتەتى بيوديناميكالىق زەرتتەۋ ورنى، شانحاي فۋدان ۋنيۆەرسيتەتى بيومەديسينا زەرتتەۋ ورنى، گۋاڭجوۋ جۇڭشان ۋنيۆەرسيتەتى مولەكۋلالىق بيولوگيانى زەرتتەۋ ورنى سىندى عىلىمي-زەرتتەۋ ورتالىقتارىنان تاجىريبەدەن ءوتتى.
2009 جىلى شىڭجاڭ مەديسينا ۋنيۆەرسيتەتىنىڭ تاڭداۋلى عىلىمي قىزمەتكەرى بولىپ باعالاندى؛ 2010 جىلى جۇڭحۋا مەديسينا قوعامىنىڭ 12 كەزەكتى سۇيەك اۋرۋلارى عىلىمي تالقى ماجىلىسىندە جانە 5 كەزەكتى حالىقارالىق COA عىلىمي تالقى جينالىسىندا سىيلىق العان.
عىلىمي ماقالالارى:
«تارامىستىڭ ۇزىلۋىنە كلينيكالىق جاقتان دياگنوز قويۋدىڭ بارىسى»، «تارامىستى جالعاۋعا قاجەتتى ماتەريالداردىڭ كلينيكالىق ءمانى»، «جاسى جەتىپ الجۋدىڭ ەرەكشەلىگى جانە دارىمەن ەمدەۋدىڭ تۇيىندەرى»، «ۇزىلگەن تارامىستىڭ ساۋىعۋ بارىسىنداعى ديناميكا مەن بيولوگيالىق اسەر»، «ۇزىلگەن تارامىستى جالعاۋ ءادىسىنىڭ كلينيكالىق قولدانىلۋ قۇنى جونىندەگى زەرتتەۋ»، «قازاق شيپاگەرلىگى جانە سۇيەك اۋرۋلارى»، سونىمەن قاتار
«سىنىقتى وتامەن ساۋىقتىرۋ»، «شىڭجاڭداعى قازاق ۇلتىنىڭ وسىمدىكتى كادەگە جاراتۋىنا ايالداعاندا»، ت.ب. 18 عىلىمي ماقالانى باسقالارمەن بىرىگىپ جازعان.
پىكىر قالدىرۋ