قازىرگى زاماندا ساياسي ەليتا، جۋرناليستىك قاۋىمداستىق جانە كاسىبي ساياساتتانۋشىلاردىڭ مۇددەسى تىعىز دا ءتيىمدى ۇشتاساتىن بالامانى تابۋ قيىن، ءسىرا. اڭگىمە ەۋرازيا مەديا فورۋمى (ەامف) جايىندا. فورۋم 24-25 ساۋىردە استانا قالاسىندا وسىمەن ون ەكىنشى رەت وتكەلى وتىر. 

ءسوز جوق، بۇل - ورتالىق-ازيالىق تەڭدەسسىز الاڭ. ونىڭ ەرەكشەلىگى جەتەكشى ساياساتكەرلەر مەن ساياساتتانۋشىلار، جۋرناليستەر، قوعام قايراتكەرلەرى مەن وزگە دە ساراپشىلاردىڭ الەمدىك دەڭگەيدەگى الەۋمەتتىك-ەكونوميكالىق جانە گەوساياسي ماسەلەلەرگە تۇرلىشە پىكىر-كوزقاراستارىن بىلدىرۋىندە.  وسىنداي فورماتتىڭ ارقاسىندا كونفەرەنسيا حالىقارالىق تۇيتكىلدەردى تالقىلاپ،  شەشىم قابىلداۋدا ءتيىمدى پلاتفورما قالىپتاستىرۋعا قول جەتكىزدى.

ديالوگتىڭ مۇنداي ءتۇرىن قازاقستاننىڭ ۇسىنۋى كەزدەيسوق ەمەس. ەۋرازيا كىندىگىندە ورنالاسقان قازاقستان گەوگرافيالىق جانە تاريحي جاعىنان ءتۇرلى ۇلتتار مەن مادەنيەتتەردىڭ ديالوگ قۇرىپ، ءوزارا بەيبىت ارەكەت ەتەتىن الاڭىنا اينالعانى انىق. ءدال وسى جەردە ەامف ۇيىمداستىرۋ كوميتەتىنىڭ ءتورايىمى داريعا نازاربايەۆانىڭ باستاماسىمەن دوڭگەلەك ۇستەل اينالاسىندا ساراپشى قاۋىمداستىعىنىڭ الەمدىك كوشباسشىلارى باس قوسىپ، ەكونوميكالىق جانە گەوساياسي ماسەلەلەر بويىنشا تالقىلاۋ الاڭىن ۇسىنۋعا مۇمكىندىك تۋدى.

قازاقستاننىڭ سىرتقى ساياساتى اشىق، ءوزارا ءتيىمدى ىنتىماقتاستىققا، ماسەلەلەردى كەلىسىم جولىمەن شەشۋ قاعيدالارىنا سۇيەنەدى. كوپ باعىتتىلىق پەن تەڭ قۇقىلى ىنتىماقتاستىققا نەگىزدەلگەن قازاقستاننىڭ سىرتقى ساياسي دوكتريناسى تەپە-تەڭدىكى ساقتاۋ قاعيداسىمەن قۇرىلدى. سەرىكتەس ەلدەر قازاقستان باستامالارى مەن قادامدارى ترانسپارەنتتى ەكەنىنە الدەقاشان كوز جەتكىزگەن. ول باسقا مەملەكەتتەردى سىيلاي بىلەتىن، سونىمەن بىرگە ءوز مۇددەسىن قورعايتىن سەنىمدى سەرىكتەس. ول ىنتىماقتاستىققا ءارقاشان دايىن.

ادەتتەگىدەي، ءحىى فورۋم قاتىسۋشىلارىنىڭ باستى نازارىندا – قازىرگى زاماننىڭ ەڭ وتكىر، ەڭ وزەكتى ماسەلەلەرى. ولاردىڭ ىشىندە: ءۇشىنشى دۇنيەجۇزىلىك سوعىسقا الىپ كەلەتىن قاۋىپ-قاتەر فاكتورلارى جانە جاڭا الەمدىك ءتارتىپتى قۇرۋعا شاقىراتىن بالاما سەناريي؛ الەمدىك داعدارىس جانە ونىڭ سالدارى؛ جاھاندانۋدى الەمدى جاڭاشا بولۋدەگى قۇبىلىس رەتىندە قاراستىرۋ جانە ونى جۇزەگە اسىرۋ بولجامدارى.

الداعى فورۋمدا رەسەي مەن باتىستىڭ تەكەتىرەسىنە سەبەپشى بولعان ۋكرايناداعى داعدارىسقا جانە باتىستىڭ شىعىسقا باعىت الۋىنا ايرىقشا كوڭىل بولىنەدى.

سونداي-اق وزەكتىلىگىن جوعالتپاعان تاقىرىپ – تاياۋ شىعىستاعى شيەلەنىس پەن ايماقتاعى كۇشتەردىڭ اراسالماعى. بۇل جولى – سيرياداعى احۋال ءسوز بولماق. وعان قاتىستى ساۋالدار اشىق تا وتكىر: نەلىكتەن سيريا  الىپ دەرجاۆالاردىڭ قولىنداعى ساۋدا قۇرالىنا اينالدى جانە كۇرمەۋدى شەشۋ تىزگىنى كىمنىڭ قولىندا؟

يراننىڭ يادرولىق باعدارلاماسى مونيتورينگى جانە جەڭگەندەر مەن جەڭىلگەندەر تۋرالى ساۋالعا جاۋاپ ىزدەۋ. ءدال قازاقستاننىڭ ارالاسۋىمەن يادرولىق كلۋب ەلدەرى يران ماسەلەسىندە ديپلوماتيالىق شەشىمگە كەلدى. الايدا ساياسي ارەناداعى يادرولىق «ويىندارعا» نۇكتە قويىلدى ما؟

ەڭ سوڭىندا، تۇزدىق رەتىندە – مەديا ىشىندەگى ماسەلەلەر قارالادى. ەلدىك پيار – وعان كىمنىڭ مۇددەلى ەكەنىن ايقىنداۋ تۇرعىسىنان. ارحيتەكتۋرا، ەكونوميكا، تەحنولوگيا. سونداي-اق «گلامۋر» سىرقاتىنا ۇشىراعان مەديا-كەڭىستىك، بولاشاقتاعى ينتەرنەت-تەحنولوگيا جاڭالىقتارىنا قاتىستى بولجام.