تۇركىستان رەسپۋبليكالارى فەدەراتيۆتىك نەگىزدە بىرگۋى ءتيىس. جەكە امبيسيالارىن قايىرىپ قويىپ، ورتاق ساياسي قۇرىلىم جاساۋ تۋرالى ىسكە قازىردەن باستاپ كىرىسكەن دۇرىس. ايتپەسە، «وزبەكپەن بىرىككەنشە، ورىسپەن بىرگە بولعانىم ارتىق» دەۋشىلەر قاتارى كوبەيگەن سايىن، بۇل ماقساتقا جەتۋ مۇمكىندىگى الىستاي بەرەدى.
ەڭ الدىمەن، ءبىرىنشى قادام – ماڭگىلىك دوستىق شارتتارىنا قول جەتكىزۋ كەرەك. قىرعىزستانمەن جاسالعانى سياقتى بۇل شارت وزبەكستانمەن دە (وزبەكپەن كەيىننەن جاسالدى)، تۇركىمەنمەن دە، تاجىكپەن دە جاسالۋى كەرەك. مۇستافا بابامىز ىلعي دا تاجىكتەردى تۇركىستاندىقتارعا، ءتىپتى تۇرىكتەرگە قوسىپ وتىراتىنىن كورەمىز. ودان كەيىن فەدەراسياعا بارۋ كەرەك. ءبىز ورىسپەن دە، قىتايمەن دە، تۇركىستان بولىپ بىرلەسە ارالاسقانىمىز ءجون. رەسەي دە، جۇڭگو دا ءوز ىقپالىن ۇلعايتىپ، بيلىگىن جۇرگىزۋ ءۇشىن، ەڭ الدىمەن، بولشەكتەۋگە ۇمتىلادى. ءبىزدىڭ الدىمىزدا ۇلكەن ەكى تاڭداۋ تۇر: ورىسپەن نەمەسە ءوز قانداستارىمىزبەن (وزبەك، قىرعىز، تۇركىمەن ت.ب.) بىرلەسۋ.
بۇل تاڭداۋ وتكەن عاسىردىڭ باسىندا دا بولدى، ءححى عاسىردا تاعى وتكىر قويىلىپ وتىر. ءبىزدىڭ بۇل جولى قاتەلەسۋىمىزگە حاقىمىز جوق. «بولىنگەندى ءبورى جەيتىنىن» حح عاسىر جەتەرلىكتەي دالەلدەپ بەردى. قازاق ەسىن جيىپ، ءبىر جاعىنا شىعۋى، ءوز تەگىن، ءوز ۇلىسىن، ءوز ءۇيىرىن تابۋى كەرەك.ءتىلى دە، ءدىنى دە، ءدىلى دە جات جۇڭگو مەن ورىستان گورى، ءبىر اتادان تاراعان، اراز دا بولسا تۋىس-تۋمانىڭ جاقىن ەكەنىن سەزىنەر ۋاقىت بولدى عوي، اعايىن!
مەن ەۋرازيا يدەياسىن جوققا شىعارمايمىن. ءبىراق ونى قازاق – قازاق كۇيىندە، وزبەك – وزبەك كۇيىندە، تۇركىمەن – تۇركىمەن كۇيىندە، قىرعىز – قىرعىز كۇيىندە جۇزەگە اسىرا المايدى. سەبەبى، مەنى ورىسقا جۇتىلىپ كەتۋ ءقاۋپى شوشىندىرادى. تەڭدىك، ادىلەتتىلىك پرينسيپتەرى مىڭ رەت قايتالانسا دا، ءتيىستى مەحانيزمدەرى جاسالىپ قويىلعان كۇندە دە، ورىس ورىستىعىن جاساماي تۇرا المايدى. ورىستار باسقا شاعىن حالىقتارمەن تەڭ بولۋعا داعدىلانباعان، ول – تەڭدىكتى قورلىق دەپ ۇعۋعا ۇيرەنگەن حالىق.
ايتان ءنۇسىپقان اعامىزدىڭ ەستەلىكتەرىنەن
