Muslim.kz سايتى كوپ ادامنىڭ كوكەيىندە جۇرگەن وسى ساۋالعا جاۋاپ بەردى، - دەپ حابارلايدى Qamshy.kz.

اسسالاۋماعالەيكۋم!

جاسىم 25-كە تولىپ، ۇيلەنۋگە اسىعىپ ءجۇرمىن. ەكى جىلدان بەرى ءسوز بايلاسىپ جۇرگەن قالىڭدىعىم دا بار. ۇيلەنە قويايىن دەسەم، نە جۇمىستىڭ، نە قاراجاتتىڭ ىڭعايى كەلەر ەمەس. ەكى جىلدان بەرى قىزبەن ءجۇرۋىم كۇناعا جاتا ما؟

ۋا الاەيكۋم اسسالام!

قىز بەن جىگىتتىڭ ارالاسۋى مەن جۇرۋىنە شاريعات تىيىم سالادى. ويتكەنى، بوگدە ايەل مەن ەر كىسى وڭاشالاناتىن بولسا، مىندەتتى تۇردە ارالارىنا شايتان كىرەدى. ونداي كەزدە ادام بالاسى ناپسىسىنە (شاھۋاتىنا) يە بولا الماي قالۋى بەك مۇمكىن. جىگىت پەن قىزدىڭ بۇلاي ءجۇرۋى مەن ارالاسۋىنىڭ سوڭى زيناعا الىپ بارادى. سوندىقتان پايعامبارىمىز (س.ع.س.) بوگدە قىز بەن ۇل بالانىڭ وڭاشا قالۋىنا تىيىم سالعان.

پايعامبارىمىز (س.ع.س.) مۇباراك حاديسىندە: «ەر كىسى مەن ايەل وڭاشا قالماسىن، ويتكەنى ولاردىڭ ءۇشىنشىسى شايتان بولادى»[1]، – دەگەن. سول سياقتى پايعامبارىمىز (س.ع.س.) بوگدە ايەلگە قول بەرۋدەن دە قايتارعان: «سىزدەردىڭ بىرەۋلەرىڭىز بوگدە، وزىنە حالال بولماعان ايەلدىڭ قولىن ۇستاعاننان، باسىنا تەمىر ينەنى قاداعانى جاقسىراق»[2]. 

تاعى ءبىر حاديستە اللا ەلشىسىنىڭ (س.ع.س.) جۇبايى ايشا (ر.ا.) انامىز: «اللاعا سەرت پايعامبارىمىز بىردە-بىر بوگدە ايەلدىڭ قولىن ۇستاعان ەمەس»[3].

ەگەر سول قىزعا ۇيلەنەتىن ويىڭىز بولسا، كەزدەسكەندە قىزدىڭ جانىندا ماحرامى (تۋىس سىڭلىلەرى نەمەسە قۇربىلارى) بولۋى ءتيىس. ءارى تەك ماعرۋف (جاقسى) سوزدەر ايتىلىپ، وڭاشا قالۋعا بولمايدى. ايتپەسە، شايتاننىڭ تورىنا ءتۇسىپ قالۋىڭىز مۇمكىن.

[1] تيرميزي 2165.
[2] تاباري 20/212، 487.
[3] بۇحاري 6674، ءمۇسىلىم 3470، تيرميزي 3228، يبن ءماجا 2866، احماد 23685.