بۇگىن №2 اتىراۋ قالالىق سوتىندا ماكس بوقايەۆ پەن تالعات ايان ءىسى بويىنشا سوت وتىرىسى ءوتىپ، وندا ماڭىزدى كۋاگەرلەردەن جاۋاپ الىنۋى ءتيىس بولاتىن. وتىرىس بارىسىندا تۋعان كەلەڭسىزدىك سالدارىنان سوت وتىرىسى تۇستەن كەيىن جالعاساتىن بولدى، - دەپ حابارلايدى Qamshy.kz.

تاڭەرتەڭ سوت وتىرىسىنا ايىپتالۋشىلاردان تالعات ايان عانا كەلگەن بولاتىن. ال ماكس بوقايەۆ دەنساۋلىعىنا بايلانىستى وتىرىسقا قاتىسپايمىن دەپ ءوتىنىش جازعان. وسىعان بايلانىستى م.بوقايەۆتىڭ قورعاۋشىلارى ونى ۇرىپ-سوعۋى مۇمكىن، سوندىقتان ايىپتالۋشىعا بىلىكتى مەديسينالىق كومەك كورسەتىلۋى كەرەك دەدى. الايدا، سوتقا ءتوراعالىق ەتىپ وتىرعان گ.داۋلەشوۆا م. بوقايەۆ وسىلايشا سوتقا قۇرمەتسىزدىك كورسەتتى دەپ سوت وتىرىسىن وتكىزە بەرەتىنىن جەتكىزدى.

سونداي-اق، ت. ايان تۇندە تەرگەۋ يزولياتورىندا قولىنىڭ تامىرىن كەسۋگە ارەكەتتەنگەنى حابارلاندى. سوت وتىرىسىندا سۋديا گ. داۋلەشوۆا ايىپتالۋشىنىڭ دەنساۋلىعىنان ۇلكەن كىنارات تابىلعان جوق دەپ، سايكەس مەديسينالىق انىقتامانى وقىپ بەرگەن. انىقتاماعا سايكەس، تالعات اياننىڭ ەكى قولىنىڭ شىنتاق تۇستارى سىرىلىپ، زاقىم كەلگەن. تالعاتتىڭ ادۆوكاتى ءارى اكەسى تولەپقالي ايانوۆ بۇل وقيعا تۋرالى تەرگەۋ يزولياتورىنا ەكىنشى ايىپتالۋشى ماكس بوقايەۆتىڭ دەنساۋلىق جاعدايىن بىلۋگە بارعاندا كەزدەيسوق بىلگەنىن ايتادى. 

ايىپتالۋشىلار م. بوقايەۆ پەن ت. ايان جانە ولاردىڭ قورعاۋشىلارى «تولەشوۆتىڭ ت. ايانعا اقشا بەرگەنىن راستايتىن» كۋاگەرلەردىڭ بەينەبايلانىس ارقىلى ەمەس، اتىراۋعا كەلىپ، سوت زالىندا كۋالىك بەرۋىن تالاپ ەتۋدە.

ەسكە سالا كەتسەك، 2016 جىلدىڭ ءساۋىر ايىندا اتىراۋدا وتكەن جەر ميتينگىسىنە بايلانىستى ايىپتالعان ت.ايان مەن م. بوقايەۆتىڭ ءىسى سوتتا قارالۋدا. م.بوقايەۆ پەن ت.ايانعا ق ر قىلمىستىق كودەكسىنىڭ ءۇش (174، 274-ب، 4-تارماق، 400-ب.) بابى بويىنشا ايىپتار تاعىلۋدا.

بۇعان دەيىن بەينەكونفەرەنسيا ارقىلى شىمكەنتتىك كاسىپكەر ت. تولەشوۆ سوتتا كۋالىك بەرگەن بولاتىن.