بيىلعى جينالعان ونىمنەن كوكسۋ قانت زاۋىتى وسى ماۋسىمنىڭ العاشقى قانتىن  الدى. زاۋىت ۇجىمىن وسى ماڭىزدى وقيعامەن قۇتتىقتاۋعا وبلىس اكىمى اماندىق باتالوۆ ارنايى باردى، دەپ حابارلايدى الماتى وبلىسى اكىمىنىڭ باسپا ءسوز قىزمەتى.

كوكسۋ قانت زاۋىتىنىڭ جاڭعىرتۋ جۇمىستارى مەن جەتكەن جەتىستىكتەرى تۋرالى كاسىپورىننىڭ قۇرىلتايشىسى نۇرلان تىلەۋبايەۆ بايانداپ بەردى.

- بيىلعى جىلى ميلليارد تەڭگەدەن استام قارجى قۇيىپ، كاسىپورىنعا جاڭعىرتۋ جۇمىسىن جاسادىق. ءقازىر بارلىق جۇيەلەر اۆتوماتتاندىرىلعان، پروسەستەردىڭ ءبارى دە ءبىر وپەراتوردان باسقارىلادى. سونىمەن قاتار فيلترلەر اۋىستىرىلىپ، بۇل ءوز كەزەگىندە ونىمدىلىكتى كوتەرۋگە جانە ەلەكتر ەنەرگياسىنىڭ تۇتىنۋ مولشەرىن ازايتۋعا ىقپال ەتتى. بۇل ءبىزدىڭ جۇمىسىمىزدىڭ العاشقى كەزەڭى عانا، زاۋىتتىڭ جاڭعىرتۋ جۇمىستارى كەلەسى جىلى دا جالعاستىرىلاتىن بولادى، - دەدى ن. تىلەۋبايەۆ.

وبلىس اكىمى اماندىق باتالوۆ وپەراتور بولمەسىن، وڭدەۋ سەحىن ارالاپ، دايىن ءونىمدى كوردى. مۇنداي جاقسى كورسەتكىشكە مەملەكەت قولداۋىنىڭ ارقاسىندا جانە قىزىلشاشىلار مەن قانت زاۋىتى وكىلدەرىنىڭ بىرلەسكەن جۇمىسىنىڭ ناتيجەسىندە قول جەتكىزىلگەنىن اتاپ ءوتتى.

- بۇگىن ءبىز بيىلعى جىلدىڭ العاشقى قانتىن الدىق. بۇل - ءبىز ءۇشىن اسا ماڭىزدى وقيعا، ۇزاق تا قاجىرلى ەڭبەكتىڭ كورسەتكىشى. ءوزارا ىنتىماقتاسا اتقارعان جۇمىستىڭ ناتيجەسىندە الماتى وبلىسىندا بيىلعى جىلى 6800 گەكتارعا قانت قىزىلشاسى سەبىلدى. شامامەن 240-250 مىڭ توننا ءونىم جينايمىز دەپ جوسپارلاپ وتىرمىز. ودان مولشەرى 24-25 مىڭ توننا قانت الىنادى. بۇل – جاقسى كورسەتكىش. ەگىس اينالىمىنىڭ تالاپتارىن ەسكەرە وتىرىپ، قىزىلشا القابىنىڭ كولەمىن جىلدان جىلعا ارتتىراتىن بولامىز. ياعني الىناتىن قانت كولەمى دە وسەدى دەگەن ءسوز. وڭدەۋ جۇمىسى كەدەرگىسىز ءجۇرۋ ءۇشىن الداعى ۋاقىتتا قارابۇلاق، الاكول، اقسۋ قانت زاۋىتتارىن دا ىسكە قوسۋدى جوسپارلاپ وتىرمىز. قابىلدانعان كەشەندى شارالار مەملەكەت باسشىسىنىڭ حالىقتى وتاندىق قانتپەن قامتاماسىز ەتۋ تۋرالى تاپسىرماسىن ابىرويمەن ورىنداۋعا سەرپىن بەرەدى دەپ ويلايمىن. ىشكى قاجەتتىلىكتى وتەگەننەن كەيىن ودان ءارى ءبىز ءونىمىمىزدى ەكسپورتقا شىعارۋعا تالپىناتىن بولامىز، - دەدى وبلىس اكىمى اماندىق باتالوۆ.

ءوڭىر باسشىسى ا. باتالوۆ ن. تىلەۋبايەۆتىڭ ۇسىنىسى بويىنشا كەلەسى جىلى مەملەكەتتىك-جەكەمەنشىك ارىپتەستىك نەگىزىندە قانت قىزىلشاسىن وسىرەتىن اۋدانداردا وبلىس اكىمدىگىنىڭ كومەگىمەن قانت قىزىلشاسىن قابىلدايتىن پۋنكتتەر اشىلاتىنىن ايتتى. وندا زاۋىت قۇرىلتايشىلارى زەرتحانا مەن ولشەۋ قۇرىلعىلارىن ورناتپاقشى. قىزىلشا وسىرۋشىلەر وسىرگەن ءتاتتى ءتۇبىردى قابىلداۋ پۋنكتىنە اكەلىپ تاپسىرادى، ال قۇرىلتايشىلار ونى زاۋىتقا ءوز كۇشتەرىمەن جەتكىزەدى. ەسەپتەسۋ جەرگىلىكتى جەردە سول مەزەتتە جۇرگىزىلەدى. سونىمەن قاتار كوكسۋ اۋدانىنداعى قابىلداۋ پۋنكتىندە قابىلداۋ ءىسىن جىلدامداتۋعا مۇمكىندىك بەرەتىن گەرمانيالىق قۇرىلعى قويىلاتىن بولادى.

زاۋىتقا ءونىم اكەلگەن شارۋالار قانت قىزىلشاسىن ءوسىرۋ مەن وتكىزۋ ءىسىن جەڭىلدەتۋ باعىتىندا ەنگىزىلىپ جاتقان جاڭالىقتاردى ەستىپ، ريزاشىلىقتارىن ءبىلدىردى.