الماتى وبلىسىندا بيىل 12ء-شى رەت وتكىزىلىپ وتىرعان اۋداندار مەن قالالاردىڭ مادەنيەت كۇندەرى ءوز مارەسىنە جاقىندادى. ىلە اۋدانىنىڭ ونەرپازدارى ۇسىنعان دۋماندى شارا چاپاي اۋىلىنىڭ مادەنيەت ۇيىندە وتكىزىلدى.

الدىمەن ەڭسەلى مادەنيەت ءۇيىنىڭ الدىنداعى الاڭنىن سالتاناتقا ساي بەزەندىرىلۋى ەرىكسىز نازار اۋدارتادى. ەكى قاپتالىندا ورنالاسقان قولونەر مەن ەكونوميكا سالاسىندا قول جەتكەن تابىستارعا ارنالعان كورمە كوركەمدىگىمەن كوز تارتادى. اۋداندىق اۋىلشارۋاشىلىعى باسقارماسىنىڭ مەنشىگىندەگى شاتىردىڭ استىندا ىنتىماعى سۇتتەي ۇيىپ، بەرەكەسى ارتقان، ەلىنە ىرىس پەن باقىت قونىپ، جەرىنە بايلىق تۇنعان، تامىرى تەرەڭ، ءومىرى ولەڭ، قويناۋى قۇتتى، قىزىرلى ىلە وڭىرىندە وندىرىلگەن ازىق-تۇلىك تاۋارلارى ءتىزىلىپتى. مۇندا بۇگىندەرى شەتەل نارىعىن يگەرە باستاعان «داۋلەت – بەكەت» تۇيە شارۋاشىلىعىندا  جاسالاتىن شۇبات سۋسىنىنان باستاپ، كوكونىس جانە باقشا ونىمدەرى، ءتىپتى قۇتتى قوناققا ارناعان قازى-قارتا، جال-جايا دا كوپتەپ وندىرىلەدى.

وزىق تەحنولوگيا نەگىزىندە قۇرىلىسقا قاجەتتى ونىمدەر شىعاراتىن «BTK GROUP» زاۋىتىنىڭ، جەڭىل ونەركاسىپ سالاسىندا قازاقستان نارىعىندا وزىندىك ورنى بار «مەدياتەكس – ن» باسكيىمدەر تىگەتىن كومپانياسىنىڭ، دارىلىك پرەپاراتتار شىعاراتىن «لەوۆيت»  سەرىكتەستىگىنىڭ، مال ازىعىنا قوساتىن دارۋمەندەر وندىرۋمەن اينالىساتىن «كورموۆيك» زاۋىتىنىڭ  تاۋارلارى جالپى جۇرتشىلىقتىڭ قىزىعۋشىلىعىن تۋدىرۋدا. ال ەكىنشى جاعىندا ورىس، كارىس جانە تۇرىك ەتنومادەني بىرلەستىكتەرىنىڭ  ۇلتتىق سالت-داستۇرلەرىن باياندايتىن  جانە قازاق حالقىنىڭ قولونەر بۇيىمدارى قويىلعان كورمەلەر ورنالاسىپتى. جەرگىلىكتى سۋرەتشى ەرمەك جۇماحانوۆتىڭ تابيعاتتى بەينەلەيتىن تاماشا تۋىندىلارى دا ەرىكسىز نازار اۋدارتادى. اۋدان اكىمى قىدىرگەلدى مەدەۋوۆ  باستاعان سالتاناتتى شارا قوناقتارى الدىمەن وسى كورمەلەردى ارالاپ،  اۋدان تۇرعىندارىنىڭ جەتىستىكتەرىنە وڭ باعاسىن بەردى.
وسىدان كەيىن مەرەكەگە كەلگەن قوناقتار قىزىل كىلەممەن كومكەرىلگەن الاڭدا «بىرلىك بولسىن ەلىمدە!» تاقىرىبىندا ازىرلەنگەن فلەشموبتى تاماشالادى. الدىمەن جۇرت الدىنا شىققان انشىلەر حالقىمىزدىڭ ەجەلگى ءداستۇرى بويىنشا جىر-ارناۋ ورىنداسا، ءجۇز دومبىراشى جۇرەلەي وتىرا قالىپ قۇيقىلجىتقان ءابدىمومىن جەلدىبايەۆتىڭ «ەركە سىلقىم» كۇيى توبە قۇيقامىزدى شىمىرلاتىپ، دەلەبەمىزدى قوزدىردى.  ال ىلە اۋدانىندا تۇراتىن بارلىق ەتنوستاردىڭ ۇلتتىق كيىمدەرىن كيگەن بيشىلەر ەل بىرلىگىن ايشىقتادى. 
قوناقتار مادەنيەت ۇيىندە ەل تاۋەلسىزدىگىنىڭ 25 جىلدىعىنا بايلانىستى اۋداندىق كىتاپحانا ۇجىمىنىڭ قىزمەتكەرلەرى ۇيىماستىرعان كورمەنى ارالادى. وسىدان كەيىن  مادەنيەت شاڭىراعىنىڭ جيىنجايىندا اۋدان اكىمى وڭىردەگى زيالى قاۋىمنىڭ وكىلدەرىمەن جۇزدەستى. بۇل باسقوسۋدا قىدىرگەلدى ءومىرجان ۇلى جينالعاندارعا قاسيەتتى ىلە وڭىرىندەگى ەكونوميكالىق، الەۋمەتتىك، مادەني سالادا قول جەتكەن تابىستارعا كەڭىنەن توقتالىپ ءوتتى. وبلىستىڭ قورجىنىنا تۇسەتىن سالىق مولشەرىنىڭ ۇشتەن ءبىرىن قۇرايتىن ىرگەلى اۋداننىڭ بۇل باعىتتا اۋىز تولتىرىپ ايتاتىن جەتىستىكتەرى از ەمەس.  كەزدەسۋ بارىسىندا اۋداننىڭ قۇرمەتتى ازاماتتارى كەنششين قاسىمبەكوۆ اقساقال مەن اقىن ءشىنادىل مۇقانوۆ، اۋداندىق قوعامدىق كەڭەستىڭ مۇشەسى، «ەلەگيا» ءانسامبلىنىڭ كوركەمدىك جەتەكشىسى اناستاسيا مەلنيك ءسوز الىپ، اتا-بابالارىمىز ارمانداعان تاۋەلسىزدىك جىلدارىنداعى جەڭىستەرىمىز جايلى ءوز ويلارىن ورتاعا سالدى.

مادەنيەت كۇندەرىن  ونەرپازداردىڭ قاتىسۋىنسىز كوزگە ەلەستەتۋ مۇمكىن ەمەس. بۇل جولى ونەر شەبەرلەرىنىڭ كونسەرتى مادەنيەت ءۇيىنىڭ كورەرمەندەر زالىندا ءوتتى. ساحنا شىمىلدىعى اقشي حالىق تەاترى، «ابرا»، «ناز»، «كەرىم-اي» بي توپتارىنىڭ قاتىسۋىمەن قويىلعان «ۇلت ورداسى – ۇلىتاۋ» تەاترلاندىرىلعان كورىنىسىمەن اشىلسا،         ا. مەلنيك جەتەكشىلىك ەتەتىن «ەلەگيا» ۆوكالدى ءانسامبلىنىڭ ورىنداۋىنداعى  ش. سارييەۆ پەن ۆ. پيتەرسيەۆتىڭ «تاۋەلسىز قازاقستان» ءانى كونسەرتتىڭ شىرايىن كەلتىرە تۇسكەن.       ءا. نۇرعوجا اتىنداعى ارداگەرلەر جانە «اقنيەت» اجەلەر ءانسامبلى شىرقاعان «ارداگەرلەر مارشى»، «سارمات»  بي توبى ورىنداعان «بي الەمى» كومپوزيسياسى، اۋداننىڭ مادەنيەت قىزمەتكرلەرىنىڭ «اسپاپتار شەرۋى»، «ابرا» بي توبى ۇسىنعان «ءومىر بوياۋلارى» ءبيى، كادەتتەر حورى، «ەلەگيا» ۆوكالدى توبى جانە  ۇستازدار مەن وقۋشىلار بىرلەسە شىرقاعان گ. قۇباشيەۆا مەن   ج. رامازاننىڭ «تاۋەلسىز ەلىم» ءانى  دە جۇرتشىلىقتىڭ ىستىق ىقىلاسىن الىپ، قىزۋ قوشەمەتكە بولەندى. 

قۋات قايرانبايەۆ، «جەتىسۋ» گازەتى