سارسەنبى كۇنى سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرو ۇستاعان «فەنيكس» ءفيلمىنىڭ پروديۋسەرى تۇڭعىشباي جامانقۇلوۆ ءفيلمدى تۇسىرۋگە بولىنگەن بيۋدجەت قارجىسىن جىمقىرعانىن تولىعىمەن مويىنداپ، ىسىنە وكىنەتىنىن جانە كەلتىرىلگەن شىعىندى وتەيتىنىن جەتكىزدى، - دەپ جازادى Baq.kz.

سىبايلاس جەمقورلىققا قارسى ءىس-قيمىل ۇلتتىق بيۋروسى باسپا ءسوز قىزمەتىنىڭ مالىمەتىنشە، جامانقۇلوۆ قارجىنى قولما-قول اقشاعا اينالدىرىپ، ۇرلانعان بيۋدجەت قارجىسىن جەكە باسىنا جۇمساعانىن راستادى.

سونداي-اق ت.جامانقۇلوۆ وزىنە كەپىل تۇرىندە بۇلتارتپاۋ شاراسىن تاڭداۋدى جانە ق ر قك 65-بابىنا سايكەس، كىناسىن مويىنداۋىنا بايلانىستى قىلمىستىق جاۋاپكەرشىلىكتەن بوساتۋدى ءوتىندى.

3 قاراشا كۇنى ت.جامانقۇلوۆ شىعىندى جارىم-جارتىلاي وتەدى. سول سەبەپتى ونىڭ جاسى، اتاق-ابىرويى مەن كەپىل مۇلىكتى ەنگىزگەنى ەسكەرىلىپ، وعان قاتىستى «كەپىل» تۇرىندە بۇلتارتپاۋ شاراسى تاڭدالدى.

قىلمىستىق جاۋاپكەرشىلىكتەن بوساتۋ تۋرالى قولداۋحات ت.جامانقۇلوۆ، ن.يۋدينا جانە گ.ىسقاقوۆا كەلتىرگەن شىعىن تولىق وتەلگەننەن كەيىن قارالادى.