تارازدا بولعان داۋىلدىڭ سالدارىنان ءۇش تۇرعىن جاراقات الدى. ق ر ىشكى ىستەر مينيسترلىگىنىڭ توتەنشە جاعدايلار بويىنشا كوميتەتىنىڭ مالىمەتىنە سايكەس، ءقازىر وپەراتيۆتى-قۇتقارۋ وتريادىنىڭ قۇتقارۋشىلارى مەن كوممۋنالدىق قىزمەت مەكەمەلەرى قالا بويىنشا بەلسەندى تۇردە جۇمىس اتقارۋدا. ولار سىنعان اعاشتار مەن شايقالعان شاتىرلاردى جيناۋ ۇستىندە.

بۇل تۋرالى Qamshy.kz  Stan.kz-كە سىلتەمە جاساپ حابارلايدى. 

داۋىلدىڭ سالدارىنان تاراز مەملەكەتتىك ۋنيۆەرسيتەتىنىڭ شاتىرى ۇشىپ كەتكەن. ودان بولەك قالا بويىنشا ونداعان اعاشتار قۇلاپ، اۆتوكولىكتەردى زاقىمداعان.

داۋىل باسىلعانىمەن، قالادا ءالى دە جەل سوعىپ تۇر.

«تارازدا ەلەكتر بەرەتىن 10 جەلى قۇلادى. قازىرگى ۋاقىتتا ەلەكتر جارىعىنسىز قالعان ابونەنتتەر سانى انىقتالۋدا. جالپى اۋماعى 2000 شارشى مەتردى قۇرايتىن عيماراتتاردىڭ شاتىرى جۇلىنىپ كەتتى. قازىرگى ۋاقىتتا اپاتتىق بريگادالار جوندەۋ-قالپىنا كەلتىرۋ جۇمىستارىن اتقارۋدا. ازىرگە دەنە جاراقاتىن العان ءۇش تۇرعىن انىقتالدى. ولار تاراز قالالىق اۋرۋحاناسىنا جەتكىزىلدى»، – دەپ حابارلادى ق ر ءىىم توتەنشە جاعدايلار بويىنشا كوميتەتىنىڭ رەسمي وكىلى رۋسلان يمانقۇلوۆ.

ايتا كەتەيىك، كەشە جامبىل وبلىسىندا، ونىڭ ىشىندە تاراز قالاسى مەن بايزاق جانە جامبىل اۋداندارىندا قاتتى داۋىل سوقتى.