وسىدان 2 جۇما بۇرىن عانا، 10 قاراشادا استانا قالاسىندا ءماسليحات شەشىمىمەن ءبىرقاتار كوشەلەردىڭ اتاۋى اۋىساتىنى، جاڭا كوشەلەرگە ات بەرىلگەنى بەلگىلى بولعان. ءماسليحات دەپۋتاتتارى ەلوردانىڭ نەگىزگى داڭعىلدارىنىڭ ءبىرى ورىنبور كوشەسىن «ماڭگىلىك ەل» دەپ اتاۋدى ۇيعارعان ەدى. ال، باستى داڭعىلدان ىعىستىرىلعان «ورىنبور» ەسىمىن قالانىڭ باتىس شەتىندەگى، ءوزى ەلەۋسىز ە10 كوشەسىنە قويا سالعان.

وسى جۇما كۇنى استانادا ورىنبور كوشەسى اتاۋى جازىلعان ارنايى تاقتايشالار الىپ تاستالىپ، ونىڭ ورنىنا جاڭا «ماڭگىلىك ەل» كوشەسى دەپ جازىلعان تاقتايشالاردى ورناتتى. اۋەل باستا، «ەلوردا كوشەلەرىنىڭ اتى وزگەرەدى» دەگەندە، قالا اكىمدىگى حالىققا قىزمەت كورسەتۋ ورتالىقتارى زاڭدى جانە جەكە تۇلعالار ءۇشىن ءۇي قۇجاتتارىن اۋىستىراتىندىعىن، ءۇيدىڭ تەحنيكالىق ءتولقۇجاتىنا وزگەرىس ەنگىزۋ تەگىن بولاتىندىعىن تۇسىندىرگەن. الايدا، ەلەكتروندى ۇكىمەتتىڭ كونسۋلتانتتارى قۇجاتتاردى اۋىستىرۋ 530 تەڭگە تۇراتىنىن حابارلاعان.  

كوشە اتىن اۋىستىرعىش استانا ءماسليحاتى ەڭبەكشىلدەر دەپ اتالىپ كەلگەن كوشەگە 36-شى كوشەمەن بىرىكتىرىپ، الاش كوسەمى ءاليحان بوكەيحانوۆتىڭ ەسىمىن قويدى. ال، بۇعان دەيىن «سارىارقا» اۋدانىنداعى بوكەيحانوۆ كوشەسى ەندىگى ۋاقىتتا ازەربايجان مامبەتوۆ كوشەسى دە اتالماق.