قازاقستاندا اۋىل شارۋاشىلىعىنا كوپ كوڭىل بولىنەدى. سەبەبى، قازاقستان جەر كولەمى جونىنەن الەمدە 9 ورىن الادى. سوندىقتان دا، قازاقستاندا اۋىل شارۋاشىلىعىن وركەندەتۋگە مۇمكىنشىلىك مول. وسى ماقساتتا ەلىمىزدە «اگروبيزنەس 2020» باعدارلاماسى ىسكە قوسىلعانى بەلگىلى. بۇل باعدارلاما اۋىل شارۋاشىلىعىمەن اينالىساتىندارعا جاعداي جاساپ، دەمەپ وتىرادى. وسى باعدارلامانىڭ اياسىندا تۇلكىباس اۋدانى، كەلتەماشات اۋىلىنىڭ 1،5 مىڭ گەكتار جەرىنە «بەس جال» وندىرىستىك كووپەراتيۆى «قازاگروقارجىدان» جەڭىلدەتىلگەن نەسيە الىپ، «ستەكلوۆيدنايا-24» اتتى سورتتى بيداي ەكەن بولاتىن. ەندى مىنە، ءقازىر كووپەراتيۆ وسىدان مول ءونىم الىپ وتىر. تۇلكىباس اۋدانى قازاقستانداعى بىردەن-بىر مالعا دا، ەگىسكە دە جايلى شۇرايلى جەر، تۇگىن تارتساڭ ماي شىعاتىن قاسيەتى بار. جالعىز بيداي عانا ەمەس، ماقسارى، جوڭىشقانى مولىنان ەگۋ كەرەك، تەك بۇعان جەردىڭ ساپاسىن جوعالتپاي، كۇتىپ ۇستاسا بولعانى، - دەيدى «قازاق بيدايىنىڭ اتاسى» اتانعان اكادەميك راحىم ورازالييەۆ وندىرىستىك كووپەراتيۆ ءتوراعاسىنا. – ءبىز ەڭ ءبىرىنشى كەزەكتە بيداي تۇقىم شارۋاشىلىعىن قولعا الۋىمىز كەرەك. ويتكەنى، استىقتان گورى تۇقىمدىق ەتىپ، نارىققا شىعارعان الدەقايدا پايدالىراق. ماسەلەن، قازاقستان جىل سايىن 16 ميلليون توننا استىق ءوندىرىپ جاتىر، ەلدىڭ ىشىندەگى حالىقتىق تۇتىنۋعا سونىڭ سەگىز ميلليونى جەتكىلىكتى، قالعان سەگىزىن ەكسپورتتاپ جاتىرمىز. بولاشاقتا استىق تۇقىمىن وڭدەيتىن، ءارى تۇقىم شارۋاشىلىعىن جولعا قوياتىن الىپ ەكى زاۋىت سالىنعالى تۇر. بۇل جوبا ۇكىمەتكە ۇسىنىلادى، - دەپ ءسوزىن راحىم ورازالييەۆ ءسوزىن قورىتىندىلادى. 

«بەس جال» وك دە تۇقىم شارۋاشىلىعىمەن اينالىسادى. كووپەراتيۆ قوجايىنى سپابەك ىڭكار ۇلىنىڭ قولىنان ىرگەلەس جاتقان ءتورت اۋدان سايرام، تولەبي، بايدىبەك، تۇلكىباس اۋدانىنىڭ وزىندەگىلەر ارنايى كەلىپ، بيدايلىق تۇقىم ساتىپ الادى. بىلتىر 25 سەنتنەر ءونىم العان، بيىل ودان ەكىس ەسە ارتىق ءونىم الدى دەسە بولادى. ناقتىراق ايتقاندا، 40 سەنتنەر ونىمگە قول جەتكىزدى.