شاردارانىڭ تۇرعىنى رەتىندە وڭىردەگى شارۋاشىلىقتىڭ دامۋى تۋرالى پىكىر ايتايىن دەپ ەدىم. كۇرىش پەن ماقتا ءوندىرىسى ەجەلدەن كەلە جاتىر عوي. الايدا سوڭعى جىلدارى  شاردارالىقتار كوپ جىلدىق ەكپەلەرگە كوڭىل بولە باستادى. ءتىپتى بۇدان پايداسىن دا تاۋىپ جاتىر. ماسەلەن، سوڭعى ءبىر جىلدىڭ كولەمىندە تۇرىسبەكوۆ اۋىلدىق وكرۋگىندە 220 گەكتارعا، جاۋشىقۇم اۋىلىندا 55 گەكتارعا، قوسسەيىت اۋىلىندا 13 گەكتارعا ءجۇزىم كوشەتتەرى وتىرعىزىلعان. ءجۇزىمنىڭ «تايفي روزوۆىي» سورتىن ەككەن شارۋالار ءونىمدى ءۇش جىلدان سوڭ الاتىنىن ايتۋدا. 

ال اۋداندا 209 گەكتار جەرگە ەگىلگەن ءجۇزىم القابىنان ءونىم جينالۋدا. بۇگىنگى كۇنگە گەكتارىنا 35 سەنتنەر ءونىم العان ديقاندار 731،5 توننا ءجۇزىم جيناعان. سونىمەن قاتار، اۋدان ءتۇرعىنى ا.يبادۋللايەۆ 10 گەكتار القاپقا المانىڭ «پاۆپينكا» دەپ اتالاتىن سورتىن ءوسىرۋدى قولعا العان. ال بۇگىنگە دەيىن اۋداندا 70 گەكتار جەرگە ەگىلگەن الما باۋدان گەكتارىنا 25 سن. ءونىم ءتۇسىپ، جالپى 175 توننا الما تەرىلگەن. شاردارالىق شارۋالار 2010 جىلدان بەرى جالپى كولەمى 1097 گەكتار جەرگە ەگىلگەن باۋ-باقشادان مول ءونىم جيناپ كەلەدى. بۇدان تۇسەر پايدانىڭ مول ەكەنىنە كوزى جەتكەن ديقاندار باۋ-باقشانى دامىتۋدى جوسپارلاپ وتىر. قازىرگى تاڭدا جينالعان ونىمدەر اۋداننىڭ ىشكى نارىعىنا شىعارىلۋدا.

ەرجان اسقار ۇلى