ءار پەندەنىڭ باسىندا ءارتۇرلى ارمان بار. بىرەۋدىڭ باي بولعىسى،  ءتورت تۇلىگى ساي بولعىسى كەلەدى. ال بىرەۋلەر ءعىلىم-بىلىم قۋىپ ادامزاتقا ، قوعامعا ۇلەس قوسقىسى كەلەدى. ءدال وسىنداي ىزگى ارمانى مەن مۇراتى ءوزىن شەتەل اسىپ وقۋعا جەتەلەگەن قاراپايىم قازاق قىزىنا ليتۆا ەلىندە كەزدەستىك.  

وسى جىلدىڭ 6-قاراشا كۇنى اباي اتىنداعى قازاق ۇلىتتىق ۋنيۆەرسيتەتىنىڭ ماگيسترانتتارى سالاۋاتىمىزبەن  «شەتەلدە ءبىلىم اسىرۋ» باعدارلاماسى بويىنشا ليتۆا ەلىنە قادام تاستادىق. ماقساتىمىز سونداعى مەملەكەتتىك وقۋ-اعارتۋ ۋنيۆەرسيتەتىنىڭ پروفەسسورلارىنان لەكسيا تىڭداپ، تاجىريبە الماستىرىپ،وي ءورىسىمىزدى كەڭەيتۋ. ءبىز قوناقجايعا تۇستەنىپ جاتقاندا ليتۆا ەلىنىڭ استاناسى ۆيلنيۋس قالاسىندا ءبىلىم الىپ جاتقان قازاق قىزى اتا مەكەنىنەن جەرلەستەرى كەلگەنىن ەستىپ، ءبىزدى ىزدەپ كەلدى. اتالعان جەرلەسىمىزدىڭ ءاتى-جونى مەرۋەرت سۇلەيمەنوۆا.  

مەرۋەرت سۇلەيمەنوۆا 1994 جىلدىڭ تۋماسى. 2015 جىلى الماتىداعى اباي اتىنداعى قازاق ۇلىتتىق پەداگوگيكالىق ۋنيۆەرسيتەتىنىڭ حيميا ماماندىعىنا ماگيستراتۋراعا قابىلدانعان. 2016 جىلى اباي اتىنداعى قازاق ۇلىتتىق ۋنيۆەرسيتەتىندە اكادەميالىق ۇتقىرلىق باعدارلاماسى بويىنشا ەكى كەزەڭنەن تۇراتىن سىناقتان ءوتىپ، ليتۆا ەلىندەگى 450 جىلدىق تاريحى بار ۆيلنيۋس ۋنيۆەرسيتەتىندە ءبىلىم اسىرۋعا مۇمكىندىك الادى. ارمانىنا قانات بايلاعان قازاق قىزى ءوز وقۋ ورىنىنىڭ دەمەۋىمەن بيىلعى قىركۇيەك ايىنان باستاپ ليتۆا ەلىندە ءبىلىم الۋدا. ونداعى ءبىلىمپاز وقىتۋشىلاردىڭ قازاقستان مەن ليتۆا ەلىنىڭ ءبىلىم بەرۋ جاعىندا قانداي ايىرماشىلىقتار بار دەگەن سۇراعىمىزعا ول :  «قازاقستان مەن ليتۆا ەلىنىڭ جوعارى وقۋ ورىندارىنىڭ ءبىلىم بەرۋ جۇيەسى اراسىندا اسا ۇلكەن ايىرماشىلىق جوق. ەكى ەلدىڭ دە وقىتۋشىلارىنىڭ ءدارىس كەزىندە قولداناتىن ادىس-تاسىلدەرى دە نەگىزىنەن ۇقساس. ايتا كەتۋگە تاتيتىنى ليتۆا ەلىندە ستۋدەنتتەردىڭ ءبىلىم الۋىنا تاماشا جاعداي جاراتىلعان. مىسالى،  تاۋلىك بويى جۇمىس ىستەيتىن كىتاپحانا ءبىلىم ءنارىن ىزدەگەن ءار ستۋدەنتكە ىزدەنۋدىڭ قولايلى ورتاسى. بۇل ۋنيۆەرسيتەتتىڭ كىتاپحاناسى مول كىتاپ قورىمەن باي، ءارى بارلىق جاڭا تەحنولوگيالارمەن جابدىقتالعان»  دەپ جاۋاپ بەردى.  

ول تاعى «ليتۆا ەلىنەن العان ەرەكشە اسەرىمنىڭ ءبىرى ليتۆا حالقىنىڭ انا تىلىنە دەگەن ەرەكشە قۇرمەتى مەن سۇيىسپەنشىلىگى،  ءارى مۇنداعى جاستاردىڭ انا تىلىمەن قوسا اعىلشىن تىلىندە ەركىن سويلەسۋى بولدى» دەيدى.  

ءوز ماماندىعىنىڭ سوڭىنا ءتۇسىپ، تۋعان ەلى مەن جۇرتىنا ۇلەس قوسسام دەپ جۇرگەن قازاقتىڭ قىزى تەك اتا-اناسىنىڭ عانا ەمەس، ەلىنىڭ ماقتانىشى بولۋعا لايىق ەكەنىن، شەتەلدە ءبىلىم الۋ ۇلكەن جاۋاپكەرشىلىكتى تالاپ ەتەتىنىن،  ءوز ەلىنىڭ سەنىمىن اقتاپ،  ابرويىن ارتتىرۋ ءوزى سەكىلدى ءاربىر زيالى جاستىڭ مىندەتى ەكەنىن اڭعارتقانداي.  

دۇيسەنالى ءالىماقىن 

اباي اتىنداعى قازاق ۇلىتتىق پەداگوگيكالىق ۋنيۆەرسيتەتىنىڭ 2 كۋرس ماگيسترانتى