كەشە  وڭتۇستىك قازاقستان وبلىسىنىڭ اكىمدىگىندە ايماق باسشىسى جانسەيىت تۇيمەبايەۆتىڭ توراعالىعىمەن سەلەكتورلىق جيىن ءوتتى. ماجىلىسكە وبلىستىق باسقارما باسشىلارى مەن اۋدان، قالا اكىمدەرى قاتىستى. كۇن تارتىبىندە، وڭىرىمىزدەگى يندۋستريالدى ايماقتاردىڭ ماسەلەلەرى مەن 2016 جىلعا ارنالعان نەگىزگى كاپيتالعا باعىتتالعان ينۆەستيسيا كورسەتكىشىنىڭ ورىندالۋ بارىسى جانە جىلىجاي شارۋاشىلىعىن دامىتۋ ماسەلەلەرى قارالدى. بۇل تۋرالى وبلىس اكىمدىگىنڭ رسمي سايتى "ءاشىوق اكىمدىك" جوباسى اياسىندا حابارلاپ وتىر. 

باسقوسۋدا وبلىس باسشىسى بۇگىنگى تاڭداعى ەڭ نەگىزگى تالاپ -  ەكونوميكانىڭ قارقىنىن ساقتاۋ، سول ارقىلى تۇرعىنداردىڭ ءال-اۋقاتىن السىرەتپەۋ قاجەتتىگىن ايتتى. ياعني، ايماقتا جاڭا جۇمىس ورىندارىن اشىپ، جۇمىسسىزدىقتىڭ كوبەيۋىنە جول بەرمەۋ كەرەك.

سونىمەن بىرگە، اۋدان، قالا اكىمدىكتەرىمەن بولعان تىكەلەي بايلانىستا اكىم يندۋستريالىق ايماق، جىلىجاي جانە ينۆەستيسيا سالالارىنا ءالى دە كوپ كوڭىل ءبولۋ كەرەكتىگىن ايتتى. جالپى، وبلىستاعى يندۋستريالىق ايماقتاردا 83 جوبانى جۇزەگە اسىرۋ كوزدەلسە، بۇگىنگە دەيىن سونىڭ 42ء-ى عانا ورىندالعان. ال، ەكونوميكاعا ينۆەستيسيا تارتۋ وتكەن جىلعا قاراعاندا 40 ميلليارد تەڭگەگە كەمىگەن. جەرى شۇرايلى، اۋا رايى قولايلى وڭىردەگى جىلىجاي وندىرىسىندە ىلگەرىلەۋ از.

ءوز كەزەگىندە ايماق باسشىسى وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆتىڭ ەسەبىن تىڭدادى. ج.تۇيمەبايەۆ جىلىجاي وندىرىسىنە، اسىرەسە ونەركاسىپتىك جىلىجايلارعا ەرەكشە ماڭىز بەرۋ كەرەكتىگىن ەسكەرتتى. سونداي-اق، اكىم وزبەكستان مەن قىتايدىڭ ونىمىنە تاۋەلدى بولماي، وڭتۇستىكتەگى جىلىجايدىڭ وتانى سانالاتىن - سارىاعاشتان بولەك، بارلىق اۋدان، قالالاردا جىلىجاي وندىرىسىنە جەتە ءمان بەرۋ كەرەكتىگىنە توقتالدى.

جيىن قورىتىندىسى بويىنشا، جانسەيىت تۇيمەبايەۆ سەلەكتورلىق ماجىلىستە ايتىلعان وزەكتى ماسەلەلەر شەڭبەرىندە اۋدان، قالا اكىمدەرىنە ناقتى تاپسىرمالار جۇكتەدى.

http://rgmedia.kz/