ءۇندىستان، ءۇندى جۇڭگو، وڭتۇستىك قىتايدا وسىرىلەتىن سيترۋستى جەمىس — ليموندى باپتاۋدى تولەبيلىك شارۋالار دا مەڭگەرىپ كەلەدى. العاشىندا جۇرەكسىنىپ جۇرگەن ازاماتتار ەرەكشە جەمىس ءتۇرىن جىلىجايلارعا ەگىپ كورىپ، بۇگىندە توككەن تەرىنىڭ ناتيجەسىن كورە باستادى.
ليمون باپتاۋدىڭ تاسىلدەرىن مەڭگەرگەن جەرگىلىكتى ازامات يۋريي پاك كوكسايەك ەلدى مەكەنىندە كولەمى 0،07 گا جىلىجايدا ليمون ءوسىرۋدى قولعا العان. مۇندا 400-گە جۋىق ليمون كوشەتى وتىرعىزىلدى. شارۋانىڭ ءۇمىتى اقتالىپ، العاشقى ءونىم شىعا باستاعان سوڭ، ونى كاسىپكە اينالدىرۋ يدەياسى وزدىگىنەن تۋىندادى.
ناقتىراق ايتقاندا، ءۇش جىل بۇرىن ەگىلگەن كوشەتتەر بيىل-اق العاشقى نىشاندارىن كورسەتە باستادى. كاسىپكەر يۋريي الەكسەيەۆيچ ءوز قاراجاتىنا سالعان بۇل ليمونارييدەگى ءسيترۋستى جەمىستى باپتاۋ ءۇشىن اسقان توزىمدىلىك قاجەت ەكەنىن ايتادى. وسىعان قاراپ، وزگە دە بانان، كيۆي سياقتى تروپيكالىق جەمىستەردى ەش قورىقپاستان جىلىجايلاردا وسىرۋگە بولاتىن سياقتى دەيدى ول.
بيىكتىگى 3-6 مەترگە جەتەتىن ليمون جەمىسىنىڭ بيىكتىگى ءۇي جاعدايىندا 2 مەترگە دەيىن جەتەدى. باياۋ ءوسىپ، العاشقى جەمىسىن 6-10 جىلدا بەرە باستايتىن ليمون اعاشى 60 جىلعا دەيىن وسەدى.
ازىرگە، تولەبيدە ليمون ءوسىرۋدى قولعا الىپ، كاسىپكە اينالدىرعان ازاماتتار ساۋساقپەن سانارلىق. ماسەلەن، ونداعى كەمەقالعان اۋىلدىق وكرۋگىندەگى «نەماتۋللا» شارۋا قوجالىعى دا سوڭعى 3-4 جىلدان بەرى 5،5 گەكتار جەرىنە قيار، قىزاناقتان بولەك، ليمون ءوسىرىپ، ونى ىشكى نارىقتا ساۋدالاپ ءجۇر.
جالپى، اۋداندا اتالعان كاسىپ تۇرىنە قىزىعۋشىلار جەتەرلىك. تابىستى كاسىپتىڭ كوزىن تاپقاندار بولاشاقتا ودان ءارى كوبەيەدى دەپ كۇتىلۋدە.
پىكىر قالدىرۋ