بۇگىن وبلىس اكىمى جانسەيىت تۇيمەبايەۆ پەن «بايتەرەك» ۇلتتىق باسقارۋشى حولدينگى» اق باسقارما ءتوراعاسى ەربولات دوسايەۆ قازىعۇرت اۋدانىندا بولىپ، ءبىرقاتار كاسىپورىندار مەن شارۋاشىلىقتاردىڭ جۇمىسىمەن تانىستى.
ەڭ الدىمەن، ولار اۋداننىڭ شاراپحانا اۋىلدىق وكرۋگىندەگى يندۋستريالدى ايماقتا ورنالاسقان «Lotus Food Company LLC» جاۋاپكەرشىلىگى شەكتەۋلى سەرىكتەستىگىنىڭ «تەز ازىرلەنەتىن تاعامدار» وندىرىسىمەن جانە اۋىل شارۋاشىلىعى سالاسىنا ارنالعان بيوورگانيكالىق تىڭايتقىشتار شىعاراتىن فابريكا جۇمىسىمەن تانىستى. جوبالىق قۇنى 472 ملن. تەڭگەنى قۇرايتىن كاسىپورىن جىلىنا 620 مىڭنان اسا قاپتاما ازىرلەۋگە قاۋقارلى. ءونىمدى رەسپۋبليكا اۋماعىنىڭ بارلىق قالالارىنا وتكىزۋ جوسپاردا بار. كۇندەلىكتى تۇرمىستا جوعارى سۇرانىسقا يە، تەز دايىندالاتىن ونىمدەر شىعاراتىن كاسىپورىن 48 ادامدى جۇمىسپەن قامتۋدا.
قازىرگى تاڭدا اۋدانداعى يندۋستريالدىق ايماقتا 5،8 ملرد. تەڭگەلىك 7 جوبا ماقۇلدانىپ، وسى جىلى جالپى سوماسى 722،7 ملن.تەڭگەلىك 2 جوبا يندۋستريالاندىرۋ كارتاسىنا ەنگىزىلىدى. ولار «وتىرابات قۇرىلىسى» جشس-نىڭ قۇنى 120 ملن. تەڭگەلىك گازوبلوك ءوندىرىسى مەن «اسىل باستاۋ كZ» ءجشس-نىڭ قۇنى 602،7 ملن. تەڭگە بولاتىن مايسىزداندىرىلعان قۇرعاق ءسۇت جانە سارى ماي ءوندىرۋ جوبالارى.
مۇنان سوڭ، وبلىس اكىمى باستاعان دەلەگاتتار قىزىلقيا اۋىل وكرۋگىندەگى 500 گەكتاردان استام جەرگە قارقىندى باۋ شارۋاشىلىعىن دامىتىپ وتىرعان «امانكەلدى» ءجشس-نىڭ جۇمىسىن ارالاپ كوردى. الما، الحورى، شابدالى، شيە، ءجۇزىم جەمىس-جيدەكتەرىن وسىرەتىن سەرىكتەستىك ونىمدەرىن قازاقستان اۋماعىنان بولەك، وزبەكستان، اۋعانستان، تاجىكستان رەسپۋبليكالارىنا شىعارۋدا. سونداي-اق، ولار مۇنداعى جەمىس-جيدەكتەر مەن كوكونىستەردى ساقتايتىن سىيىمدىلىعى 2 مىڭ توننالىق قويمانى جانە تۇقىم باعىندا وندىرىلەتىن الما مەن ءجۇزىم كوشەتتەرىن كوردى.
ساپار بارىسىندا شارۋالاردىڭ جۇمىسىمەن تانىسقان ءوڭىر باسشىسى تۇقىمباقتاعى وندىرىلەتىن كوشەتتەردى كەڭىنەن ناسيحاتتاپ، وزگە دە اۋداندارعا ۇسىنۋدى تاپسىردى. «ەلباسى وڭتۇستىككە جاساعان ءبىر جۇمىس ساپارىندا وبلىستىڭ كوكونىس پەن جەمىس-جيدەك وندىرەتىن ناعىز «فابريكاعا» اينالۋعا بارلىق مۇمكىندىگى بار دەگەن بولاتىن. وسى مۇمكىندىكتى بارىنشا قولدانۋ ءۇشىن بارلىق اۋدان، قالالاپ اتالعان سەرىكتەستىكتەن تاجىريبە الىپ، باۋ-باقشا شارۋاشىلىعىن دامىتۋىمىز كەرەك»،-دەدى اكىم.
ءوز كەزەگىندە ەربولات دوسايەۆ شاعىن جانە ورتا كاسىپكەرلىكتىڭ دامۋىنا قاشاندا قولداۋ كورسەتىلەتىنىن ايتىپ، وبلىستاعى وندىرىلەتىن ونىمدەردى وزگە دە وڭىرلەرگە كەڭىنەن تانىستىرۋ قاجەتتىگىنە توقتالدى. وسى كۇنى دەلەگاتتار 326 وقۋشى ءبىلىم الاتىن جامبىل قاپپاروۆ اتىنداعى №5 مامانداندىرىلعان فيزيكا-ماتەماتيكالىق مەكتەپ-ينتەرناتىنىڭ تىنىس-تىرشىلىگىمەن تانىستى. بۇل وقۋ ورنىندا ءبىلىم بەرۋ قازاق جانە ورىس تىلدەرىندە جۇرگىزىلەدى. مەكتەپتىڭ جانىندا 300 ورىندىق جاتاقحانا دا بار.
ايتا كەتەيىك، بۇگىن وڭتۇستىك قازاقستان وبلىسىنا جۇمىس ساپارىمەن «بايتەرەك» ۇلتتىق باسقارۋشى حولدينگى» اق باسقارما ءتوراعاسى ەربولات دوسايەۆ باستاعان «بايتەرەك ديەۆەلوپمەنت» اق-نىڭ باسقارما ءتوراعاسىنىڭ ورىنباسارى ا.قۇرتايەۆ، «دامۋ» كاسىپكەرلىكتى دامىتۋ قورى اق باسقارما ءتوراعاسى ق.تىلەۋشين، «برك-ليزينگ» اق باسقارما ءتوراعاسى ن.بايبازاروۆ، «تۇرعىن ءۇي قۇرىلىسىنىڭ كەپىلدەندىرۋ قورى» باسقارما ءتوراعاسى د.ونايەۆ، «Kazakhstan Project Preparation Fund» ءجشس-نىڭ باسقارما ءتوراعاسى ءا.وتەمبايەۆ، «قازاقستاننىڭ دامۋ بانكى» اق-نىڭ باسقارما ءتوراعاسىنىڭ ورىنباسارى ا.سارقۇلوۆ، «نۇح «بايتەرەك» اق باسقارما ءتوراعاسى حاتشىلىعىنىڭ جەتەكشىسى ا.شامشيندەر سىندى ءبىرقاتار حولدينگتىڭ ەنشىلەس كومپانيا باسشىلارى كەلگەن بولاتىن. ساپارى بارىسىندا ولار وڭىردەگى تۇرعىن ءۇي قۇرىلىسى مەن كاسىپكەرلىكتى دامىتۋ بويىنشا جيىن وتكىزىپ، قالاداعى سالىنىپ جاتقان تۇرىن ءۇي قۇرىلىسىمەن جانە شىمكەنتتەگى ءبىرقاتار كاسىپورىندار جۇمىسىمەن تانىستى.
پىكىر قالدىرۋ