بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ كورەيالىق «J&I Company Ltd» كومپانياسىنىڭ ءتوراعاسى چانگسيك چونمەن كەزدەستى. باسقوسۋدا تاراپتار شىمكەنت قالاسىن كوگالداندىرۋ جايىن اڭگىمەلەپ، ءبىرقاتار جوبالار بويىنشا پىكىر الماستى.

اتاپ ايتقاندا، كورەيلىك كاسىپكەر ايماق باسشىسىنا وزبەكستانداعى دەكوراتيۆتى اعاشتار وسىرۋمەن اينالىساتىن تۇقىمباعىن تانىستىرىپ، ونداعى جاسىل جەلەكتەردى باپتاۋدىڭ ەرەكشەلىكتەرىن باياندادى. شىمكەنت قالاسىنىڭ كليماتتىق جاعدايىن ەسكەرگەن جانسەيىت قانسەيىت ۇلى كوشەتتەردى، الدىمەن، سىناق رەتىندە ءبىزدىڭ ايماقتا ءوسىرىپ كورۋ كەرەكتىگىن ايتتى.

سونىمەن قاتار، وڭتۇستىك قازاقستانعا ساپارى بارىسىندا كورەيلىك بيزنەسمەن شىمكەنت قالاسىندا گولف كلۋبىن، جاستار ساياباعىن، دەكوراتيۆتى اعاشتارعا ارنالعان تۇقىمباق قۇرۋ جانە ەسكەك ەسۋ سپورتى بويىنشا سپورت كەشەنىن سالۋدى ۇسىندى.

ءوز كەزەگىندە، وبلىس اكىمى اتالعان ۇسىنىستاردى قاراستىراتىنىن جەتكىزىپ، كومپانيانىڭ وزبەكستانداعى تۇقىمباعىنىڭ جاسىل جەلەكتەرىن زەرتتەۋگە وڭتۇستىكتەن ارنايى دەلەگاتتاردى جىبەرەتىنىن ايتتى.

ەسكە سالايىق، تاياۋدا وبلىس اكىمى شىمكەنت قالاسىن كوگالداندىرۋ بويىنشا قالا اكىمدىگىنە سىن-ەسكەرتپەلەر ايتىپ، وسى باعىتتاعى جۇمىستاردى جانداندىرۋ ماقساتىندا ءبىرقاتار تاپسىرمالار بەرگەن بولاتىن. ەلىمىزدىڭ ءۇشىنشى مەگاپوليسى سانالاتىن شىمكەنتتىڭ كوگالداندىرۋ جۇمىستارىنا ەرەكشە ءمان بەرگەن اكىم بۇل ماسەلەنى جەكە باقىلاۋىنا الىپ وتىر.

ايتا كەتۋ كەرەك، كورەيالىق «J&I Company Ltd» كومپانياسى نارىقتا 10 جىلدان بەرى كوگالداندىرۋ سالاسىندا قىزمەت ەتىپ كەلە جاتقان سەرىكتەستىك. وڭتۇستىك كورەيا مەن وزبەكستاندا ءساتتى جوبالارىن باستاعان كومپانيا قازاقستاندا دا ءوز بيزنەسىن دامىتۋى جوسپارلاپ وتىر.

http://adym.kz/