بۇگىندە جەكە كاسىبىن اشىپ، تاسىن ورگە سۇيرەۋگە بەل بۋعان ءار ازاماتقا مەملەكەت مول مۇمكىندىكتەر بەرىپ وتىر. اتاپ ايتقاندا، وقو اكىمدىگىنىڭ «ONTUSTIK» كاسىپكەرلەرگە قىزمەت كورسەتۋ ورتالىعىنان 2012 جىلدان بەرى 110 مىڭنان استام ادام كاسىبي كەڭەس العان. سونداي-اق، ورتالىق ارقىلى 10 مىڭنان استام رۇقساتناما قۇجاتتار، 3 مىڭنان استام بيزنەس جانە ماركەت جوسپارلار ازىرلەنگەن. مۇنىڭ ىشىندە 4 مىڭنان استام جوباعا قارجىلاي قولداۋ كورسەتىلگەن. 27 مىڭنان استام تىڭداۋشى «كاسىپكەرلىك مەكتەبىندە» وقىتىلىپ، ونىڭ 1 248ء-ى ءوز ءىسىن باستادى. وسى مۇمكىندىكتەردى پايدالانا وتىرىپ، بۇگىندە مال بورداقىلاۋدى قولعا العان كاسىپكەردىڭ ءبىرى – الىشەر ۋبايدۋللايەۆ.

بەينەتتىڭ زەينەتى

40 جىلدان استام ۋاقىت شىمكەنتتەگى فۋتبول مەكتەبىندە جاتتىقتىرۋشى بولىپ جۇمىس ىستەگەن الىشەر ۋبايدۋللايەۆ زەينەتكە شىققاننان كەيىن جەكە كاسىپپەن اينالىسۋ ءۇشىن ۇيىندەگى ءىرى قاراسىن كوبەيتۋدى ويلايدى.

– بۇرىن ۇيدە ۇنەمى ءۇش ساۋىن سيىر بولاتىن. ولاردىڭ جۇمىسى ۇيدەگى ايەل زاتىنان ارتىلمايدى. ءسۇت-قايماعىن الىپ، بازارعا ساتىپ، از-ماز قاجەتتىلىكتىڭ ورنىن تولتىرىپ جۇرەتىن. 

زەينەتكە شىققاندا قاراپ وتىرا المادىم. ۇيدەگىلەرمەن اقىلداسا كەلە، سيىر باسىن كوبەيتەتىن بولدىق. مال باعۋ – تابىستى كاسىپ. ونىڭ ۇستىنە، «دانۋنا» جك رەتىندە اۋىل شارۋاشىلىعىنا ارنالعان 20 گەكتار جەرىم بار. «ىرىس» شاعىن نەسيەلەندىرۋ ۇيىمىنان 500 مىڭ تەڭگە نەسيە الىپ، ءىرى قارانى كوبەيتتىم، – دەيدى كاسىپكەر.

شاعىن نەسيەنى ءۇش جىل تولەپتى. اۋىل شارۋاشىلىعىنا ارنالعان جەرىنەن مالدىڭ جەم-شوبىن ءوندىرىپ وتىرعان. ءىرى قاراسىنىڭ سانى ارتقان سوڭ الىشەر ءپىرنازار ۇلى «دانۋنا» جك رەتىندە قۇجاتتارىن قايتا راسىمدەپ جەردى پايدالانۋ ماقساتىن وزگەرتەدى. جەر تەلىمىنىڭ ءبىر بولىگىنە بۇزاۋ، تايىنشا، قۇناجىن، بەستى سيىرلارعا ارناپ، اينالدىرا بولەك-بولەك قورا سالعان ەكەن.

– جۇمىستىڭ كوبەيگەنى كاسىپتىڭ كەڭەيگەنىن بىلدىرەدى. دەمەك، ءبىز سوعان لايىقتالۋىمىز كەرەك. مال بورداقىلاۋدان تۇسكەن تابىستى تەك كاسىپتى كەڭەيتۋگە جۇمساپ وتىردىق. كاسىپتى كەڭەيتۋدىڭ جولدارىن، قاراجاتتى باسقارۋدى، قۇجاتتاردى راسىمدەۋدى «ONTUSTIK» كاسىپكەرلەرگە قىزمەت كورسەتۋ ورتالىعى سايرام اۋداندىق فيليالىنىڭ ماماندارى ۇيرەتىپ كەلەدى، – دەيدى ءا.ءپىرنازار ۇلى.

اسىل تۇقىمدى «اۋليەكول»

«كاسىپكەرلىك مەكتەبىندە» وقىپ، سەرتيفيكات العان الىشەر ءپىرنازار ۇلى وتكەن جىلى سيىردىڭ «اۋليەكول» اتتى ەتتى تۇقىمىنان 2 تايىنشا ساتىپ الىپتى. اسىل تۇقىمدى ءىرى قاراعا بولىنەتىن سۋبسيديانى دا مال بورداقىلاۋ ىسىنە جۇمساعان ول كاسىپكەرلىككە شىنداپ كىرىسەدى.
– سيىردىڭ «اۋليەكول» دەگەن تۇقىمى بىزدەگى اۋا رايىنا تەز بەيىمدەلەدى. 2 جاسقا قاراعان وگىزشەلەردىڭ سالماعى جارتى تونناعا جۋىق بولادى. 
2015 جىلى 2 تايىنشاعا «سىباعا» مەملەكەتتىك باعدارلاماسى ارقىلى سۋبسيديا الدىم. سول 1 ميلليون تەڭگەدەن استام قاراجات بىزگە ەداۋىر كومەك بولدى. جەر الدىق. جاز ماۋسىمىندا جايىلىمعا ارنالعان جەردى اۋىلىمىزعا جاقىن ورنالاسقان تولە بي اۋدانىنان جالعا الامىز. تاۋلى ايماقتىڭ وتە قۇنارلى ءشوبىن جەگەن ءىرى قارانىڭ ەتى ءدامدى بولادى. بۇگىنگى تاڭدا «اۋليەكول» تۇقىمىنىڭ العاشقى ءتولىن الىپ ۇلگەردىك. جاقىندا تاعى 10-20 سيىر بۇزاۋلاعالى تۇر. ەندى قورامىزدى كەڭەيتۋ جۇمىستارىنا كىرىسىپ جاتىرمىز، – دەگەن الىشەر ۋبايدۋللايەۆ قۇرىلىس جۇمىستارىمەن تانىستىردى.