وڭتۇستىك قازاقستان وبلىسى ءۇشىن كاسىپكەرلىككە قىزىعۋشىلىق جوعارى دەڭگەيدە، اسىرەسە اۋىل شارۋاشىلىعى سالاسىندا ءوز ىستەرىن باستاعىسى كەلەتىن ازاماتتار جەتكىلىكتى. بۇعان مەملەكەتتىك «اگروبيزنەس-2020»، «سىباعا» باعدارلامالارىنان دا قولداۋ بار ەكەنىن ايتا كەتكەن ءجون. 2016 جىلى كاسىبىن ەندى عانا باستاعان جانە باستاۋعا نيەتتى 140 ازامات ءبىزدىڭ «كاسىپكەرلىك مەكتەبىندە» ءتورت كۇندىك ساباق الدى.مۇنداي ساباقتا ءبىز شاعىن جانە ورتا بيزنەستى دامىتۋدىڭ جولدارى مەن مۇمكىندىكتەرىن تانىستىرامىز. ياعني، كاسىپكەردىڭ پسيحولوگياسى، زاڭدى قىرى، مەنەدجمەنت، ماركەتينگ، سالىق، بيزنەس-جوبا جاساۋ سىندى 6 تاقىرىپ  بويىنشا جۇمىس جۇرگىزۋدى ۇيرەنەدى. سول وقۋدان كەيىن ارنايى سەرتيفيكات بەرىلەدى. ال بۇل سەرتيفيكاتتى العاندار كاسىبىن باستاۋعا نەمەسە كەڭەيتۋ ماقساتىندا جەڭىلدەتىلگەن نەسيەلەردى الا الادى.

اسىل تۇقىمدى ءبىر بۇقانى باعاتىن ادامعا مەملەكەت تاراپىنان 154 مىڭ تەڭگە سۋبسيديا بولىنەدى. ال، اسىل تۇقىمدى ءبىر بۇقاعا 30 سيىردى قوسىپ باقسا، ءار سيىرعا 18 مىڭ تەڭگە كولەمىندە سۋبسيديا الۋعا بولادى.
كاسىپكەرلىككە قولداۋدى ءتيىمدى پايدالانىپ جۇرگەن «دانۋنا» جك تاياۋدا تاعى 80 بۇقاعا قۇنى 12 ملن تەڭگە تۇراتىن بيزنەس-جوباعا ءوتىنىش بەردى. سول ءوتىنىش نەگىزىندە ءبىز الداعى 5 جىلدا اتقاراتىن جۇمىستارعا جوسپارىن ازىرلەدىك. كاسىپكەر الداعى ۋاقىتتا مال بورداقىلاۋمەن عانا شەكتەلمەي، ءسۇت ءوندىرۋ كاسىبىنە دە ءوز ۇلەسىن قوسا الادى.

          «دانۋنا» جك بورداقىلاۋ كەزەڭىنەن ءوتىپ، دايىن بولعان ءىرى قارانى «ەت اگرو-مانكەنت» اۋىل شارۋاشىلىق وندىرىستىك كووپەراتيۆىنە وتكىزەدى. ال ءسۇت ونىمدەرىن «فۋد-ماستەر» كومپانياسىنا تاپسىرادى. 

60 ساۋىن سيىرعا ءقازىر 2 عانا ساۋىنشى جۇمىس ىستەيدى. كاسىپكەردىڭ 6 ۇلى دا اكە جولىن تاڭداپتى. ودان بولەك، «دانۋنا» جەكە كاسىپكەرلىگى «جۇمىسپەن قامتۋ – 2020» باعدارلاماسى اياسىندا 5 ادامدى جۇمىسقا قابىلداعان.

اۋىلدىق ۆەتەريناريا ورتالىعىنان ارنايى بولىنگەن مال دارىگەرى كۇنىنە ەكى رەت، تاڭەرتەڭ جانە كەشكىسىن سيىر، بۇقا، تايىنشا، بۇزاۋلاردى تەكسەرەدى. ءىرى قاراسى اۋىرعاندا «تابىسىم توقىرادى» دەمەي، اۋىرعان مالعا جانى اشيتىن الىشەر ءپىرنازار ۇلى كاسىپتىڭ قيىندىقتارىن دا ەسكە الدى.

– قانداي ءىس بولماسىن وزدىگىنەن دوڭگەلەپ جۇرە بەرمەيدى. ءىرى قارا اۋىرسا، ونىڭ شىعىنى زور. قانشا كۇش جۇمساپ بورداقىلاعان سيىر، بۇقالار ءبىر اپتادا سالماعىن جوعالتادى. جازدىڭ كۇندەرى تەرىسىن كوبەلەك جارىپ شىعاردا جاپپاي قينالادى. دەگەنمەن، كاسىپتى باستاعان ادام پايدا تابۋدان بۇرىن سول كاسىپكە جان-تانىمەن بەرىلۋى كەرەك. سوندا قيىندىقتار كەزدەسكەندە «تابىس تاپپادىم» دەپ كۇيزەلۋدىڭ ورنىنا، كاسىبىنە جاناشىرلىقپەن قارايدى، – دەيدى ول.

«دانۋنا» جەكە كاسىپكەرلىگىندە 60 سيىر، 25 بۇقا بار. ءىرى قارانى 200 باسقا كوبەيتىپ، كۇنىنە 1 توننا ءسۇت وتكىزەتىن بولسا، ءسۇت وندىرىسىنە دە سۋبسيديا الۋعا مۇمكىندىگى بار. ايتا كەتەرلىك ءبىر جايت، كاسىبىن سۇيگەن الىشەر ءپىرنازار ۇلى ءىرى قارانىڭ جەم-شوپتەن قالعان قالدىعىن كادەگە جاراتۋ ءۇشىن عانا ۇيرەك-قاز ۇستايدى ەكەن. ايتسە دە، الداعى 5 جىلعا جوسپارى بار كاسىپكەردىڭ ەت ونىمىنە بولاشاقتا قۇس ەتى دە ۇلەس قوسۋى ابدەن مۇمكىن.

مەيىرمان باتىربەك ۇلى، 
«ONTUSTIK» كاسىپكەرلەرگە قىزمەت كورسەتۋ ورتالىعى سايرام اۋداندىق فيليالىنىڭ بيزنەس-ترەنەرى