ءۇندىستاننىڭ تۋريستىك شتاتى گوا قولما-قول اقشا قابىلدانبايتىن العاشقى ءۇندىستان شتاتى بولماق. 31 جەلتوقساننان باستاپ، مۇنداعى بارلىق تولەم ۇيالى تەلەفون نەمەسە بانك كارتاسى ارقىلى عانا جۇزەگە اسادى.  بۇل تۋرالى شتاتتىڭ باس حاتشىسى رادجەش كۋمار شريۆاستاۆا ءمالىم ەتتى، دەپ حابارلادى قازاقپارات.

«بارلىق ترانزاكسيانى ۇيالى تەلەفون ارقىلى جۇزەگە اسىرۋعا بولادى نەمەسە ساتىپ الۋشىعا تيەسىلى بانك ەسەپشوتىنان اقشا الىنىپ وتىرادى»، - دەدى شريۆاستاۆا جەكسەنبىلىك The Times of India گازەتىنە بەرگەن سۇحباتىندا.  ول ءبىر ايدان كەيىن گوادا ءاميان ۇستاۋدىڭ قاجەتى بولمايتىنىنا جانە ۇرى-قارىلاردىڭ مۇلدەم جوعالارىنا سەنىمدى. 31 جەلتوقساننان باستاپ، شتات اۋماعىندا كەز كەلگەن تاۋارعا، ءتىپتى بالىق پەن ەت، كوكونىس الۋ ءۇشىن دە ۇيالى تەلەفوننان ارنايى كودتى تەرۋ كەرەك. وسى ورايدا شريۆاستاۆا بانكوماتتاردىڭ ادەتتەگىدەي جۇمىس ىستەۋدى جالعاستىراتىنىن اتاپ ءوتتى، ال دۇكەندەر مەن قوناق ۇيلەردە نەسيەلىك كارتامەن تولەم جاساۋعا بولادى.  شتات اۋماعىندا بانكوماتپەن تولەم جاساۋعا تىيىم سالىنبايدى، دەگەنمەن گوا بىرتىندەپ «اقشاسىز قوعامعا» اينالۋدى كوزدەپ وتىر. گوا - كىشىگىرىم 1،5 ميلليون حالقى بار ايماق. الايدا مۇنداعى تۇرعىنداردىڭ جاعدايى وتە جاقسى - كوپشىلىگىنىڭ بانك ەسەپشوتتارى مەن ۇيالى تەلەفوندارى بار. ودان بولەك، «جۇماق شتات» اۋماعىنا كوپتەپ كەلەتىن شەتەلدىك تۋريستەر دە نەسيەلىك كارتانى پايدالانادى. 

قوسا كەتەر بولساق، ەكونوميستەر الداعى ۋاقىتتا الەمدەگى وففشورلىق اينالىمدى توقتاتۋ ءۇشىن بۇكىل الەم «اقشاسىز قوعامعا» اينالۋى ءتيىس دەپ سانايدى. بولجام بويىنشا بۇل الداعى 20 جىلدا جۇزەگە اسۋى مۇمكىن.