«جەلتوقسان 86-1»
«جەلتوقسان 86-2»
«جەلتوقسان 86-3»

دۇيسەنبى كۇنى ورتاق لەكسيا فيزيكا پانىندە وتىرعانىمىزدا، اۋديتورياعا ءبىرتالاي جاسقا كەلىپ قالعان، شاشى اپپاق كىسى كەلىپ «راحمەتوۆ» وسىندا ما؟،- دەدى.

جوعارعى جاقتا وتىرعانمىن، ويىمدا ەش نارسە جوق:

ء-يا، مەنمىن دەدىم. 

سىرتقا شىعىپ كەتۋىمدى ءوتىندى. سىرتقا شىعا سالىسىمەن حال جاعدايىمدى سۇراپ، دەنساۋلىعىم جايىن سۇرادى. يەگىمنىڭ ىسىگى باسىلىڭقىراپ قالعانىن اۋزىنا العانىنان كەيىن، قازاقتىڭ ۇلكەن كىسىسى بولعانىن ەسكەرىپ، ويىمدا ەش نارسە جوق، بولعان، كورگەن جايلارىم جايلى كومسومول كوشەسىمەن اسىقپاي سويلەسىپ كەلە جاتىرمىز. بۇنداي سۇمدىقتى بۇرىن سوڭدى كورمەگەن اقىماق باسىم، الاڭداعى اسكەري كۇشتەر مەن ميليسيا، ەرىكتى جاساقتاردىڭ جاستارعا جاساعان اياۋسىز، ادام تۇرشىگەرلىك ارەكەتتەرى مەن قىرعىن سالعاندارى جايىن قىزۋ اڭگىمەلەپ كەلە جاتىپ، قازىرگى جەلتوقسان كوشەسىنىڭ قيىلىسىنا كەلىپ، سول جاقتاعى سۇر ءۇيدىڭ الدىنا كەلگەن كەزىمىزدە، الگى شالدىڭ «ءبىز كەلىپ تە قالدىق»،- دەگەنى.

ماڭدايشاسىنداعى جازۋىنا قاراسام «پروكۋراتۋرا پو وسوبو ۆاجنىم دەلام كازسسر»،- دەگەن جازۋ. سوندا عانا بارىپ، باسقا پالە تىلدەن دەگەن حالىقتىڭ دانالىعى ەسىمە سارت ەتە قالعانى. بويىم مەن ويىمدى تەز جيىپ الىپ، ىشكە ەندىم. اككى شالعا ەش نارسە بولا قويعانىن بىلدىرمەي باققانىممەن، كابينەتىنە جايعاسىپ، قاعازدارىن الىپ شىعا باستاعاندا-اق ءبىر نارسەنىڭ بولارىن ءىشىم سەزە قويدى. ول ءالى دە بولسا سول قالپىنان تايار ەمەس، ءجاي-جاي سويلەپ، بولعان نارسەلەردى قاعاز بەتىنە ءتۇسىرىپ جاتىر. ءبىتتى اۋ ايتەۋىر. قولىما ۇسىنىپ، تانىسىپ شىعىپ، استىنا قول قويۋىمدى سۇرادى. «سۆيدەتەلسكيە پوكازانيامەن» تولىق تانىسىپ شىقتىم، ايتقانىمنان وزگە سوزدەر كەزدەسپەگەنىنەن كەيىن، قولىمدى قويدىم. تەك بۇۇ-عا قاتىستى حات جايىن جاسىرىپ قالعان ەدىم. مىنا يەگىم مەن اياعىما قاتىستى «وسۆيدەتەلستۆوۆانيەگە» قاشان جىبەرەسىز، - دەپ سۇراق تا قويىپ قويامىن. بۇگىنگە وسىمەن ءبىتتى، ەرتەڭ كەلەسىڭ دەپ، جىلى شىعارىپ سالدى. ەسىكتەن شىعىپ بارا جاتىپ، ءبىر كابينەتتەن تۇڭعىشباي جامانقۇلوۆ اعامىزدى دا كورىپ قالدىم. وسىنداي ەلگە تانىمال اعامىز دا ءجۇر ەكەن، سۇراعىنا جاۋاپتارىن الىپ، قويا بەرەتىن بولار دەگەن جىلى ويمەن دالاعا شىعىپ، جاتاقحاناما اياڭدادىم. ەرتەسىندە وندار شاماسىندا الگى شالدىڭ الدىندا وتىرمىن. كوپتەگەن سۋرەتتەردى اكەلىپ الدىما جايىپ تاستادى. بىر-ەكى تانىس ستۋدەنتتەردەن باسقا حاسەن اعامىزدىڭ سۋرەتى دە بار ەكەن. ءبىراق كەشەگى جىبەرگەن ولقىلىقتاردان كەيىن، وزىمە ەندى ءتىس جارماۋ، الباتى قۇجاتتارعا قول قويماۋ جاعىن شەگەلەپ تاستاعان ەدىم. مەگافونمەن سايراپ تۇرعان كەزىمدەگى فوتو ايعاق شىعا كەلە مە ەكەن دەگەن كۇدىك تە بار ەدى. ەسىكتىڭ الدىنا تەمەكى شەگۋگە شىقسام، كۋرستاسىم ءجۇرسىن دە تۇر ەكەن. پاسپورتىمدى الۋعا كەلىپ تۇرمىن دەيدى. ءىستىڭ ناسىرعا شابايىن دەپ تۇرعانىن بايقاپ قالعاندىقتان، «پاسپورت-ماسپورت» دەگەندى قايتەسىڭ، وسى تۇرعان جەرىڭنەن «قاش»، ارتىڭا قاراما، ءبىر ءمانىسى كەيىن دە بولا جاتار،- دەپ كەڭەس بەرىپ، قايتا كىردىم. كىرسەم، كەشەگى «وسۆيدەتەلستۆوۆانيەم» جايىنا قالىپ، قۇجاتتارىمدى «سۆيدەتەلدەن پودوزريەۆاەمىيعا» اۋدارىپ جاتىر ەكەن. سول كەزدەگى، الگى اككى شالدىڭ ماعان جاساعان ارامدىعىن كورىپ، ۇلكەن بۋىنعا دەگەن كوزقاراستارىم توڭكەرىلىپ ءبىراق تۇسكەنى.

تۇستەن كەيىن اككى شال سول كەزدەگى "سەليننىي" دەپ اتالاتىن كينوتەاتردىڭ جانىنداعى سيۆس-عا اپارىپ توعىتقان ەدى. تەمىر توردى العاش كورۋىم. سارت-سۇرت اشىلىپ، جابىلعان تەمىر ەسىكتەر قۇلاعىما ەرسى ەستىلگەنىمەن، تومەنگە ءتۇسىپ كەلە جاتىپ، ەسىگى ايقارا اشىلعان ۇلكەن كامەرانىڭ ىشىندەگى قايسار رۋحتى قارىنداستارىمنىڭ (شامامەن 100-150 دەي) قوسىلا شىرقاعان ءانى ەركىمە كۇش-قۋات بەرگەنىن قايتىپ قانا جاسىرايىن. كيىم-كەشەگىمدى تولىقتاي شەشىندىرىپ، ءتىنتىپ بەلبەۋ مەن تاعى بىردەڭەلەرىن الىپ قالىپ، ۇزىن ءدالىزدىڭ وڭ جاعىنداعى شەتكى كامەراعا ەنگىزدى. جالعىز ەمەس ەكەنمىن، ورىستىڭ ورتا جاستان اسقان ازاماتى قارسى الدى. اتىن ايتىپ، قولىن سوزىپ، تانىسىپ جاتىر. اتىمدى ايتتىم دا، " توپچان" سياقتى اعاشتان جاسالعان ۇلكەن كامەراما كۋرتكاممەن باس كيىمىمدى جاستانا جامباستاي كەتتىم. الگى ورىسىم ەسىك جاقتا بىردەڭەلەرىن جاعىپ، بىقسىتىپ جاتقانىن بايقادىم. سالدەن كەيىن، "ايدا سيۋدا، چيفەرنەم، راسسكازىۆاي، كاكيمي سۋدبامي"،- دەپ شاقىردى. باسقاسىن تۇسىنسەم دە "چيفەرنەمى" نەسى، ول نە دەگەنى دەپ جانىنا جاقىنداسام، ىستالعان اليۋمينيي كوجەگە تولى قازاعىمنىڭ كادۋىلگى ءشايى ەكەن. ىپ-ىستىق، قوپ-قوڭىر اششى ءشايدى كەزەكتەسە ۇرتتاپ وتىرىپ، انانى-مىنانى ايتا وتىرىپ، بىتىردىك-اۋ ايتەۋىر. بىر-ەكى كۇن سول جولداسىممەن بىرگە بولدىم، كۇنى بويى تەرگەۋشىلەردەن تەرگەۋشىلەر، سۇراقتاردان سۇراقتار، ايتەۋىر بىتپەيتىن سۇراقتار، كامەراڭا كىرسەڭ الگى ورىسىم ءوزىنىڭ قاي-قايداعى "كوسموپوليتيزمىمەن" ، وبششىم توڭىرەك تولى يزم-دەر. ادام بالاسىنىڭ ءۇش كۇننەن كەيىن، كوزى كورگە دە ۇيرەنەدى دەگەنى راس پا دەيمىن.

بەسىنشى كۇنى دەگەندە جانىمىزداعى كامەراعا ەنگىزگەنى. كىرىپ بارسام ونشاقتى ءوزىمنىڭ قارا كوزدەرىم - بۋنتوۆششيكتەرىم، كوزىمە ىستىق بولىپ كورىنگەنى سونشالىقتى، بوستاندىققا شىققانداي سەزىمگە بولەندىم. جانىمدا مەنەن كەيىن 10 جىلعا باس بوستاندىعىنان ايرىلعان مارقۇم اسىلبايەۆ مولداعالي اعامىز، اتۋ جازاسىنا كەسىلىپ، كەيىننەن اقتالعان – مىرزاعۇل ءابدىقۇلوۆ جانە 16-عا دا تولماعان، اشي ءبىرىنشى كۋرس ستۋدەنتى ورازبايەۆ دۋمان. كەيىننەن ءۇش جىلعا باس بوستاندىعىنان ايرىلىپ،ءوزىنىڭ تۇرمە جولىن بالالار كولونياسىنان باستاعان. بالالار كولونياسىنىڭ سول كەزدەگى جايىن، تەك تۇرمە كورىپ كەلگەندەر جاقسى تۇسىنەدى. مولداعالي اعامىزدىڭ دەنەسى كوكالا قويداي، تەرەڭ دەم الۋعا شاماسى كەلمەسە دە، بىزدەردىڭ رۋحىمىزدى كوتەرۋ ءۇشىن، ءوزىنىڭ قانداي سەبەپتەرمەن وسىنداي كۇي كەشىپ وتىرعانىن جايلى اڭگىمەلەپ بەردى. ول كىسى وسى الماتى وبلىسىنىڭ تۋماسى كورىنەدى. سول كۇندەرى الماتىعا دوستارىنا قىدىرىپ كەلىپ، بولىپ جاتقان دۇنيەلەردى ءوز كوزىمەن كورۋ ءۇشىن الاڭعا كەلەدى. بويى ۇزىن، اسا كورىكتى، كيگەن كيىمى دە ەرەكشە، باسىنداعى قاراكول تىماعىنىڭ ارقاسىندا جاعالىلار بۇل كىسىنى اينالىپ ءوتىپ، كەيبىرەۋلەرى امانداسىپ تا قوياتىن سياقتى. جانىندا ءتولقۇجاتى بولماعاندىقتان، كوپشىلىكپەن بۇل كىسىنى دە وسى سەليننىيدىڭ استىنا اكەلەدى. كىرگەندەردىڭ بارلىعىن دەرلىك شەشىندىرەتىن. مايكەسىن شەشىنە باستايدى، استىنان (جاس كەزىندەگى ءبىر ساپاردان قالعان) بۇكىل دەنەسىنە سالىنعان مەشىتتىڭ سۋرەتى(ناكولكا) شىعا كەلگەندە تاياقتىڭ استىنا قالادى. قاتتى تاياقتاپ تاستاعاندارى سونشالىق، ون كۇن وتسە دە وزىنە كەلە الماپتى.
وسىندا مىرزاعۇل دا ءوزىنىڭ قالاي «جەلتوقساندىق» بولعان جاعدايىن بايانداپ بەرگەن ەدى. ول كىسى دە سول ۋاقىتتا، الماتى وبلىسىندا تۇراتىن كورىنەدى، نەگىزى قىزىلوردا جاقتان، قولىندا كارى شەشەسى، بالا-شاعاسىمەن تۇرىپ جاتسا كەرەك. اينالىساتىن كاسىبى فوتوگراف. سول كۇنى جول جونەكەي جانىندا قارىنداسى بار، تاستاق بازارىنا كىرىپ اۋىلىنا بازارلىق الىپ، ءوتىپ بارا جاتىپ ءبىر پىشاق تا ساتىپ الادى. سودان اۆتوبۋسقا وتىرىپ سايرانعا تۇسەر كەزىندە، شوپىر ارتقى ەسىكتى جاۋىپ، بارلىقتارىن الدىڭعى ەسىكتەن شىعارىپ جاتادى. الدىنداعى ورىستار شىعىپ ەندى بۇنىڭ كەزەگى كەلگەندە جولىن كەس-كەستەي توسقان جاس ورىستىڭ جىگىتى بالاعاتتاپ جىبەرەدى. بۇنداي ءسوزدى كۇتپەگەن مىرزاعۇل اعامىز قولىنا سەتكادان سابى شىعىپ تۇرعان پىشاق ءىلىنىپ، تارتىپ كەپ جىبەرىپ، شىعا جونەلەدى. شۋىلداعان حالىق، سودان بۇل كىسى قاشىپ وتىرىپ، كۇننىڭ تولىق قاراڭعى بولعانىن كۇتىپ كوپىردىڭ استىندا بۇعىپ جاتادى. بىر-ەكى ساعاتتان كەيىن، شۋ باسىلدى-اۋ دەگەندە، جاتقان جەرىنەن شىعىپ كوشە بويىندا اڭدىپ وتىرعانداردىڭ قولىنا ءتۇسىپ قالىپ، وسىندا توعىتىلعان ەكەن. ءار نارسەنىڭ «اتتەگەن-ايى» بار دەگەندەي، بىزدەر دە، اتتەگەن-اي سول جەردە جاتا بەرگەنىڭىزدە ۇستالمايتىن با ەدىڭىز دەپ، قيسىنسىز جۇباتىپ قويامىز. بار سەنگەنىمىز، ورتامىزداعى دۋمانىمىز. ەرتەڭ سەنى بوساتىپ جىبەرەتىندەي جاعداي بولىپ جاتسا، اندا بار دا مۇندا بار، اركىم ءوز سالەمىمىزدى قۇلاعىنا قۇيىپ الەكپىز. مەن دە اۋىلدان كەلەتىن دوستارىمنىڭ اتتارىن ايتىپ (سلۋجاكتارىمدى)، «تاماشا» ويىن ساۋىق دۋمانىنا الىنىپ قويعان بيلەتتەرىمنىڭ بارىن ايتىپ، مەنىڭ ورنىما كىرىپ شىعارسىڭ،- دەپ قىزىقتىرىپ قويامىن. ءبارى ءبىز ارمانداعانىمىزداي بولماي شىقتى. تاماشامىز بەن جاڭا جىلىمىزدى وسىندا وتكىزدىك.

جاڭا جىلدىڭ باسىندا، قاڭتاردىڭ بەسىندە مەنى تۇرمەگە الىپ شىعىپ، «كارانتين حاتاسىنان» ءبىراق شىقتىم. تۇرمە دەپ وسىنى ايتىڭىز. قولىم ارتىمدا، ءجۇرىپ كەلەمىز، ءجۇرىپ كەلەمىز، بىرەسە وڭعا، بىرەسە سولعا، شاقىر-شۇقىر تەمىر ەسىكتىڭ اشىلعانى مەن شارق-شۇرق ەتىپ جابىلعانى، بىتەتىن ەمەس. ءبىر كۇننەن كەيىن "كامەراما" ءبىر قازاق جىگىتى كىرىپ، مەن سەنىڭ ادۆوكاتىڭ بولامىن، پالەمباي تۇلەڭباي دەگەن، ەرتەڭ سەنىڭ سوتىڭ دەگەنى. قۋانىپ كەتتىم، نە بولسا دا تەزىرەك ءبىتۋىن كۇتىپ جۇرگەن ەدىم. ەرتەسىمەن ءبىر بولكە قارا نان، قاعازعا وراۋلى ەكى «سەلەدكا» قولىمدا، «اۆتوزاك» دەگەن پالەمەن سوتتان ءبىراق شىقتىم. قانداي سوتتان؟

قاز سسر جوعارعى سوتىنىڭ اشىق تۇردە جاريالانعانىمەن، سىرتتان ەشكىم دە كىرە المادى. ولار، نەگىزىنەن ماعان قارسى كۋاگەرلەر – قازمۋ-دىڭ ءبىرىنشى كۋرس ستۋدەنتتەرى ەدى. ءومىر بىردە بەتىن، بىردە اينالىپ كەلىپ باسقا جەرىن توسادى دەگەنى راس ەكەن...

سوت بارىسىندا كۋاگەرلىك ەتكەندەردىڭ بارلىعى دەرلىك مەنىڭ جاعىمدا بولدى، بەرگەن جاۋاپتارىمدى تولىعىمەن قۇپتايتىندارىن، ءتىپتى، قىرشىبايەۆا روزا قارىنداسىمنىڭ سوت بيلىگىنە تىكەلەي قارسىلىق بىلدىرگەنى مەنىڭ ەسىمدە «تايعا تاڭبا باسقانداي» قالىپ قويىپتى. كوپشىلىگىنەن تەرگەۋشىلەر ورىس تىلىندە العان ەكەن، سونىمەن نۇكتەسى مەن ءۇتىرىن اجىراتۋ باستالىپ تا كەتتى. ءبىراق دەرلىگى جەمە –جەمگە كەلگەندە مەنى جاقتاپ شىقتى. كۋاگەرلەردىڭ كوپتىگى سونشالىق، سوت وتىرىسى كەلەسى كۇنگە قالدىرىلدى. قۇداي قالاسا ەرتەڭ سوت زالىنان بوستاندىققا شىعامىن دەگەن وي دا جىلت ەتە قالدى. تالاي جىل اڭساعان وقۋ ورنىممەن قوشتاسۋىما تۋرا كەلەتىن بولدى، اعام قايىرعازىدان ۇيات بولاتىن بولدى دەپ تە قويامىن، ىشىمنەن.

كەلەسى كۇنگى سوت بارىسىندا ارامىزداعى كوممۋنيست قىزىمىز – مۋستافينا گۇلميرادان جىك شىقتى، ەكى قۇلاعى تىك شىقتى دەگەندى وسىنداي ايتسا كەرەك. «مەن ولار جيىلىپ بارماقشى بولىپ تۇرعاندارىندا، قايتىڭدار، قايتىڭدار دەپ بىرنەشە رەت ايتقانمىن. ولار مەنى تىڭداعان جوق، قۇرمانعازىنىڭ اۆتوريتەتى مىقتى بولاتىن، مەنى تىڭداماي كەتىپ بارا جاتتى»،- دەمەسى بار ما. ونداي ءسوز مۇلدە ورىن الماعان ەدى. جاتاقحانامىزدا مىناداي اۋىز بىرشىلىگى مىقتى، «درۋجنىي پەرۆاچتاردى» كورگەنىمىز جوق،- دەگەن سوزدەردى جوعارى كۋرستاردان بىرنەشە رەت ەستىپ تە قالعانمىن. جاتاقحانانىڭ ىشىندەگى ديسكوتەكادا ورتانى بەرمەيتىنبىز، جوعارعى كۋرستاردىڭ جىگىتتەرى ءبىزدىڭ قىزدارعا جاقىنداۋدان جاسقاناتىن. بۇل ازداي تاعى بىرەۋى گورباچيەۆتىڭ «قايتا قۇرۋى» جايىنداعى ايتقان سوزدەرىنە قاتىستى جىعىپ بەردى. وماروۆ ءادىلجان باۋىرىم ءوز سوزدەرىن ءوزى جاڭىلىپ باسىنا پالە تىلەپ الدى. جالعان كۋاگەرلىك بەرگەنى ءۇشىن ەكى جىلدى ارقالاپ الدى. ال لوزۋنگپەن ۇستالعان ۇزىن تۇرا سەرىك باۋىرىم، ادۆوكاتتارىنىڭ قولى ۇزىن بولعانىنان با، 16-دان جاڭا اسقانى ەسكەرىلگەن بە، سوتقا دەيىن بوساپ كەتكەن ەكەن. ءبىر جاعىنان وعان دا قۋاندىم. «ساسقان ۇيرەك، قۇيرىعىمەن سۇڭگيدى»،- دەمەكشى، فاكۋلتەتتىڭ دەكانى – سارسەمبينوۆ مىرزا سوتقا مىنانداي مىنەزدەمە بەرىپتى: « راحمەتوۆ ك.ا پوكازال سەبيا تولكو س وتريساتەلنوي ستورانى. ۆستۋپيتەلنىە ەكزامەنى سدال نا ۋدوۆلەتۆوريتەلنو ي حوروشو». ول زاماندا مەكتەپتى التىن مەدالمەن بىتىرگەندەر، العاشقى ەمتيحاننان «ۇزدىك» باعا العان كەزدە قالعان ەمتيحانداردان بوساتىلىپ، اۆتوماتتى تۇردە جوو ستۋدەنتى اتاناتىن. ول كىسى مەنىڭ  ءداپ سولاي قابىلدانعان جىگىتتەردىڭ باسشىسى بولىپ، جاتاقحانانىڭ جارتى جۇمىستارىن تەگىن جاساپ بەرگەنىمدى ءۇش-تورت ايدىڭ ىشىندە قالاي ەسىنەن شىعارىپ العانىنا تاڭ قالدىم. ونىڭ ەسەسىنە ورىس ۇلتتى كۋراتورىمنىڭ  تايسالماي جاقسى مىنەزدەمە بەرگەنىن قالاي ايتپاسقا. «جاقسىنىڭ جاقسىلىعىن ايت، نۇرى تاسسىن. جاماننىڭ جامانشىلىعىن ايت، قۇتى قاشسىن». 

مەنىڭ ادۆوكاتىم ورىسشا ەكى ءسوزدىڭ باسىن قوسا المايتىن بىرەۋ بولىپ شىقتى. سوندىقتان دا سوت بارىسىندا كوبىنە ءوزىمنىڭ قۇقىعىمدى ءوزىم قورعاۋىما تۋرا كەلدى. «لەنيندىك ۇلت ساياساتى جاساسىن!»، «قازسسر كونستيتۋسيا قاعيدالارى ساقتالۋى ءتيىس!»،- دەگەن ۇرانداردىڭ اسپاننان الىنباعانىن، ءبىرى جاقىندا عانا ءبىرىنشى كۋرستا مىندەتتى تۇردە وقىتىلاتىن «سوكپ تاريحى» لەكسيا كۋرستارىنان الىنسا، ەكىنشىسى، 16 – 17 - 18 جەلتوقسانداعى الاڭنان الىنعان دالەلدەپ الەكپىن. ەكەۋى دە جاقىندا عانا بولعاندىقتان ەش جاڭىلمادىم. ماعان تاڭىلعان ايىپتارمەن كەلىسپەيتىنىمدى اشىق ايتتىم. مەملەكەتتىك ايىپتاۋشى - جارماحان تۇياقباي اعامىزدىڭ بىرنەشە رەت اۋزىمدى جاپقانىن نەسىنە جاسىرايىن. 

سوت زالىنان شىعام دەگەن ءۇمىتىم سۋعا كەتىپ، قاز سسر جوعارعى سوتى وتىرىسى ق.ت.كەنجەبايەۆتىڭ توراعالىعىمەن، جەتى جىل باس ەركىمنەن ايىرىپ، كۇناسىن كۇشەيتىلگەن ەڭبەكپەن تۇزەۋ كولونياسىندا وتكىزسىن دەگەن ۇكىمىن شىعارىپ كەپ جىبەرگەنى. نە سەنەرىم، نە سەنبەسىمدى بىلمەي، باسىم مەڭ-زەڭ بولىپ وتىرىپ قالدىم. وسى كەزدە، زالدان «قۇرمانعازى جاسىما، باسىڭدى تىك ۇستا»،- دەگەن تانىس داۋىس شىققان جاققا جالت قاراسام، مەنىڭ جاڭا جىلداعى «تاماشا» توي دۋمانىنا كۇتكەن، اۋىلدان كەلگەن دوستارىمنىڭ ءبىرى – سەرىك ەكەن. ساۋساقتارىم بىرىگىپ، جۇدىرىق بوپ جۇمىلا قالعان وڭ قولىمدى كوتەرىپ، قۇپ كورگەنىمدى بايقاتتىم. زالدان كىسەن سالىپ، «اۆتوزاككا» وتىرعىزىپ الىپ شىقانشا، سەرىكتىڭ ساڭقىلداپ ايتىپ جاتقان «ناستاۆلەنيەلەرىن» توقتاتارلىق جوعارعى سوتتان ادام تابىلماعانىن كورگەننەن بولار، «قۇرمانعازى مىقتى بول!»، «قۇرمانعازى، قۇرمانعازى!»،- ايعايلاپ شىققان تانىس داۋىستاردى ءبىرتالايعا دەيىن ەستىپ بارا جاتتىم...
ءوستىپ، بىزدەردىڭ دە تار جول تايعاق كەشۋىمىزدىڭ باستالاتىنىن كىم بىلگەن؟... الگى ورىسىم "ۋتكا" بولىپ شىقتى، وندايلاردىڭ تالايىن تۇرمەدە، ۇكك تۇرمەسى مەن ەتاپتاردا كەزدەستىردىم. 

ەكى كۇننەن كەيىن ماسكەۋدەن شىعاتىن ورتالىق «كومسومولسكايا پراۆدا» گازەتى ، جەردەن جەتى قويان تاپقانداي، الماتىداعى الاڭداعى وقيعاعا بايلانىستى ونىڭ العاشقى ۇيىمداستىرۋشىسى قۇرىقتالىپ، قازمۋدىڭ ءبىرىنشى كۋرس كومسومول جەتەكشىسى ق. راحمەتوۆ جەتى جىلعا سوتتالدى، ءادىل جازاسىن الدى،-دەپ ءبىراۋىزدان شۋىلداپ قويا بەرگەن بولاتىن...

(جالعاسى بار)