تاعى دا راديو باياعى... جۇرگىزۋشى جىگىتتىڭ ءسوزى: "...قايىس نوقتاعا باسى سيماعان تالاي ارىس ۇلدىڭ بولعانىن اقباس تاريح بىلەدى". وسى جەردەگى: "قايىس نوقتا"، "اقباس تاريح"، "ارىس ۇل" دەگەن اسىرە تەڭەۋلەرگە ەندى ءبىراز ۋاقىتتان سوڭ مەنىڭ دە قۇلاق ەتىم ۇيرەنىپ، قالىپتى ءسوز رەتىندە قابىلداپ كەتەتىن ءتۇرىم بار... سوندىقتان، ازىرگە پافوسقا قارسى ازداپ بولسا دا يممۋنيتەت ءتىرى كەزدە جازىپ ۇلگەرەيىن . بىرىنشىدەن، نوقتا - مالعا كيگىزىلەتىن، مالدى جەتەكتەۋگە ارنالعان ناقتى جابدىق. ادامعا قاتىستى كوركەم شىعارماسىندا ما، پەساسىندا ما ءبىر جازۋشى (ش.مۇرتازا بولسا كەرەك) قولدانعان ەكەن، جەلپىلدەتە جونەلۋدىڭ رەتىن كورمەدىم. ءارى، اسا ءساتتى تەڭەۋ دەپ تە ويلامايمىن. ەگەر جان-جانۋاردى بۇعاۋلاۋعا ارنالعان قۇرال اتاۋلىنى ادامعا قاتىستى قولدانا بەرسەك، ونسىز دا زووبايلىعى زور لەكسيكونىمىزدىڭ قالاي تۇرلەنەتىنىن بولجاۋ قيىن: قارعىباۋ، شىدەر، تۇساۋ، اۋ، تۇزاق، ءباسجىپ... قىسقاسى، حايۋانعا قاتىستى قۇرالدى "ادامعا كيگىزۋدەن" ساق بولسا ەكەن كەيبىر ارىپتەستەر. اسىرەسە، ونىڭ "قايىس" ەكەندىگىن انىقتاپ ايتۋ... مۇلدەم قاجەت ەمەس، اعاتايلار. ەكىنشىدەن، "اقباس تاريح" تا، "ارىس ۇل" دەگەن تەڭەۋ دە كۇندەلىكتى جۋرناليستيكادا ابدەن جاۋىر بولعان، پلاكاتشىل تىركەستەر. ونىڭ ورنىنا - تاريح، قايراتكەر دەي سالعاننان مازمۇنعا زيان كەلمەيدى. كۇشەنشەك ارزان ءسوزدى ۇستەي بەرگەننەن ايتپاق ويىڭىز التىن بوپ كەتپەسە كەرەك-تى. جانە جالپى: "...ۇيادا وسكەن ۇلعا ۇلتتىڭ ۇلىلىعىن ۇيىتا بىلەتىن" دەگەن سياقتى تۇكىرىگىن شاشقان داراقى جاڭىلتپاشتاردىڭ رەسپۋبليكالىق راديودان كۇنىنە سان مارتە ايتىلۋى تاڭ قالدىرادى. ۇشىنشىدەن، توقەتەرى! اينالايىن راديوباسشىلارى! سىزدەردىڭ ۇلتقا، ەلگە دەگەن كوزسىز ءھام شەكسىز ماحاببات سەزىمدەرىڭىزدى قۇرمەتتەي وتىرىپ، ەسكەرتۋگە ءماجبۇرمىن: ءسوزدى ورنىمەن، تازا، ءدال، قوسپاسىز، (قوپپاسىز) قولداناتىن اسابالىق، ايتىسكەرلىك شالىقتاردان اۋلاق ادامداردى عانا ەفيرگە شىعارساڭىزدار ەكەن!
(قاسىم امانجولدىڭ فەيسبۋكتەگى پاراقشاسىنان)
پىكىر قالدىرۋ