قايتارىلعان اكتيۆتەردى باسقارۋ كومپانياسى استاناداعى جىلجىمايتىن مۇلىك اۋكسيونعا شىعارىلعانىن مالىمدەدى.

قايتارىلعان اكتيۆتەردى باسقارۋ كومپانياسىنىڭ مالىمەتىنشە، 2025 جىلعى 25 اقپاندا ساعات 10:00-دە E-Qazyna ۆەب-پلاتفورماسىندا ەلەكتروندىق ساۋدا وتكىزىلەدى.

اۋكسيون اياسىندا استانا قالاسى، نۇرا اۋدانى، قاراوتكەل شاعىن اۋدانى، ەرەيمەنتاۋ كوشەسى، 1-قۇرىلىس مەكەنجايىندا ورنالاسقان جەرتولەسى بار تۇرعىن ءۇي ساتىلىمعا قويىلادى. نىساندى ساتۋ بارلىق قاتىسۋشى ءۇشىن تەڭ قولجەتىمدىلىكتى قامتاماسىز ەتەتىن اشىق جانە باسەكەگە قابىلەتتى شارتتارمەن جۇزەگە اسىرىلادى، - دەلىنگەن حابارلامادا.

عيماراتتىڭ باستاپقى باعاسى - 1 883 338 958 (1،8 ملرد) تەڭگە.

اۋكسيون باعانى كوتەرۋ فورماتىندا وتەدى.

e-auction.e-qazyna.kz كابينەتىندەگى سۋرەتتەر ۇقك-نىڭ ءماسىموۆ ءىسى بويىنشا تەرگەۋدىڭ كەيبىر ناتيجەلەرىن جاريالاعانداعى سۋرەتتەرىمەن ۇقساس.

ەسكە سالساق، كارىم ءماسىموۆ 2022 جىلعى قاڭتارداعى وقيعالار كەزىندە ۇستالدى.

2023 جىلعى ءساۋىر ايىنىڭ سوڭىندا استاناداعى سوت كارىم ءماسىموۆتى مەملەكەتكە وپاسىزدىق جاساعانى، بيلىكتى كۇشتەپ باسىپ الۋعا تىرىسقانى، بيلىك پەن لاۋازىمدىق وكىلەتىن اسىرا پايدالانعانى ءۇشىن 18 جىلعا باس بوستاندىعىنان ايىردى.

ءماسىموۆ ۇكىمگە قارسى شىعۋعا تىرىستى، ءبىراق اپەللياسيالىق ساتى جازا مەرزىمىن وزگەرىسسىز قالدىردى.