سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ بۇيرىعىنا سايكەس، ەندى 24 ناۋرىزدان باستاپ ۇيالى بايلانىس ابونەنتتىك قۇرىلعىلارىن تىركەۋ ەرەجەلەرى جاڭارتىلادى. ەندى IMEI كودى جوق نەمەسە GSMA حالىقارالىق قارا تىزىمىنە ەنگىزىلگەن قۇرىلعىلار بۇعاتتالادى.

مينيسترلىك ەلدەگى ۇيالى تەلەفوندار ءۇش دەڭگەيدە: اق، سۇر، قارا ءتىزىم قولدانىلاتىنىن جەتكىزدى. اق تىزىمگە تەكسەرۋدەن ءساتتى وتكەن جانە دەرەكقورعا ەنگىزىلگەن قۇرىلعىلار كىرەدى. ال سۇر تىزىمدە قوسىمشا تەكسەرۋدى قاجەت ەتەتىن، ءبىراق جەلىدە 30 كۇنگە دەيىن ۋاقىتشا جۇمىس ىستەۋگە رۇقساتى بار قۇرىلعىلار بولادى. قارا تىزىمگە قاتە نەمەسە وزگەرتىلگەن سايكەستەندىرۋ كودى بار، زاۋىتتىق IMEI كودى جوق نەمەسە GSMA حالىقارالىق قارا تىزىمىنە ەنگىزىلگەن قۇرىلعىلار جاتادى.

ەندى ۇيالى بايلانىس وپەراتورلارى ابونەنتتىك قۇرىلعىنىڭ سايكەستەندىرۋ كودى مەن ابونەنتتىك ءنومىردىڭ يەسىنىڭ تىركەلگەن دەرەكتەرىمەن سايكەستىگىن تەكسەرەدى. سونىمەن قاتار ونى قازاقستان رەسپۋبليكاسىنىڭ ۇيالى بايلانىس جەلىلەرىندە پايدالانۋدىڭ زاڭدىلىعىن راستايتىن دەرەكقورلاردا اقپاراتتىڭ بولۋىن قارايدى. 

وپەراتور يەلەرىنە ولاردىڭ قۇرىلعىلارىنىڭ مارتەبەسى تۋرالى حابارلاۋعا مىندەتتى. ماسەلەن، سۇر تىزىمگە ەنسە سمارتفوندى پايدالانۋدىڭ زاڭدىلىعىن راستاۋ قاجەتتىگى تۋرالى يەسىنە ەسكەرتۋ كەرەك. ال ەگەر يەسى ۆەريفيكاسيانى بەلگىلەنگەن مەرزىمدە وتپەسە، قۇرىلعى اۆتوماتتى تۇردە قارا تىزىمگە كوشىرىلەدى جانە ءموبيلدى جەلىگە كىرۋ بۇعاتتالادى.

"سايكەستەندىرۋ كودتارى دەرەكقورىنىڭ وپەراتورى تەكسەرۋدى اياقتاعان سوڭ، تەرىس ناتيجە بولعان جاعدايدا 3 جۇمىس ساعاتى ىشىندە قۇرىلعى تۋرالى مالىمەتتەردى قارا تىزىمگە كوشىرەدى. كەيىن ۇيالى بايلانىس وپەراتورلارىنا ءتيىستى حابارلاما جىبەرەدى. ال ۇيالى بايلانىس وپەراتورى قۇرىلعى يەسىنە تىيىم سالۋ نەگىزدەرىن كورسەتە وتىرىپ، بايلانىس قىزمەتتەرىن ۇسىنۋعا تىيىم سالىنعانى تۋرالى حابارلايدى"، – دەلىنگەن حابارلامادا. 

سونىمەن قاتار جوندەۋدەن وتكەن قۇرىلعىلاردىڭ تىركەلۋىن باقىلاۋ قوسىمشا كۇشەيتىلدى. ۋاكىلەتتى قىزمەت كورسەتۋ ورتالىقتارىندا IMEIء-دى اۋىستىرۋ كەزىندە دەرەكتەر GSMA حالىقارالىق بازاسى (عالامدىق ۇيالى بايلانىس جۇيەسى قاۋىمداستىعىنىڭ دەرەكقورى) ارقىلى راستالۋعا ءتيىس.

بۇيرىق رەسمي جاريالانعان سوڭ 60 كۇننەن كەيىن كۇشىنە ەنەدى.