اباي وبلىسىندا ءسۇت ءوندىرىسى قارقىندى دامىپ، ايماعىمىزدىڭ ەكونوميكاسىنىڭ ماڭىزدى سالالارىنىڭ بىرىنە اينالىپ وتىر. ءوندىرىس كولەمىن ارتتىرۋ جانە سالاداعى وزەكتى ماسەلەلەردى تالقىلاۋ ماقساتىندا وبلىس اكىمىنىڭ ورىنباسارى قۋانىش سۇلەيمەنوۆ باستاعان جۇمىس توبى بەسقاراعاي اۋدانىنداعى «قاليقان ۇلى» شارۋا قوجالىعىندا بولدى.
ستەكليانكا اۋىلىندا ورنالاسقان شارۋاشىلىق بۇگىندە وبلىستىڭ ءىرى ءسۇت وندىرۋشىلەرىنىڭ ءبىرى. مۇندا 800-دەن استام ءىرى قارا مال بار، ونىڭ 500-گە جۋىعى ساۋىندى سيىرلار. كاسىپورىن تاۋلىگىنە 8 توننا ءسۇت وندىرەدى، شىعارىلاتىن تازا تابيعي ءونىم وبلىستىڭ ءار وڭىرىنە جەتكىزىلىپ، تۇرعىنداردىڭ تۇتىنۋ سۇرانىسىن قامتاماسىز ەتەدى.
سالاعا مەملەكەتتىك قولداۋ كورسەتىلۋدە. وتكەن جىلى «قاليقان ۇلى» شارۋا قوجالىعى «اگروونەركاسىپتىك كەشەندەگى ينۆەستيسيالىق جوبالارعا نەسيە بەرۋ» مەملەكەتتىك باعدارلاماسى اياسىندا 1 ملرد تەڭگە كولەمىندە قارجىلاندىرىلدى. بۇل قاراجات ءسۇتتى-تاۋارلى فەرمانى كەڭەيتۋگە باعىتتالعان.
كاسىپورىن باسشىسىنىڭ ايتۋىنشا، شارۋاشىلىق 16 جىل بۇرىن قۇرىلعان. العاشىندا ستەكليانكا اۋىلىندا شاعىن بازا ساتىپ الۋدان باستالعان بيزنەس 2011 جىلى قىتايدان ءسۇت وڭدەۋ سەحىن اكەلىپ، سەمەي قالاسىندا ىسكە قوسۋمەن كەڭەيدى. سونىمەن قاتار، «سىباعا» باعدارلاماسى ارقىلى 150 باسقا ارنالعان نەسيە الىنىپ، رەسەيدەن «دالالىق قىزىل» اسىل تۇقىمدى سيىرلار جەتكىزىلدى.
وبلىستا اۋىل شارۋاشىلىعىن دامىتۋعا ەرەكشە كوڭىل بولىنۋدە. جەرگىلىكتى بيلىك وكىلدەرى سالاعا ينۆەستيسيا تارتۋ، زاماناۋي تەحنولوگيالاردى ەنگىزۋ جانە ءونىم كولەمىن ارتتىرۋ باعىتىندا جۇمىستار جالعاساتىنىن اتاپ ءوتتى.
• «ءوندىرىسىمىز جاندانىپ، ساپا ارتقان سايىن ءبىز ونى ءارى قاراي دامىتۋعا بار كۇشىمىزدى سالدىق. ءونىمىمىز جاقسى شىققان سايىن، مال باسىن كوبەيتۋ قاجەتتىلىگىن تەرەڭ تۇسىندىك. وسىلايشا، “دامۋ” باعدارلاماسى اياسىندا حالىق بانكىنەن العان نەسيەگە 2024 جىلى 600 باس ساۋىن سيىرعا قول جەتكىزدىك. بۇگىندە ونىمدەرىمىز حالىقتىڭ سۇرانىسىنا ساي، كەڭىنەن ساتىلىپ جاتىر. تابيعي ءسۇت ءوندىرۋ – ءبىزدىڭ باستى باعىتىمىز، ول ءۇش كۇننەن كەيىن اشيدى. الايدا، اشىعان ءسۇتتى قايتا وڭدەپ، سۇزبە، اق ىرىمشىك، قىزىل ىرىمشىك، سورپا سياقتى جوعارى ساپالى ونىمدەرگە اينالدىرامىز»، – دەيدى «قاليقان ۇلى» شارۋا قوجالىعىنىڭ باسشىسى مارات قاليحانوۆ.
بۇگىندە جەرلەستەرىمىزدىڭ سۇيىكتى ونىمىنە اينالعان جانە جەرگىلىكتى نارىقتا سۇرانىسقا يە «ايشا» ساۋدا بەلگىسىمەن تانىمال سەح، ەندى «Qaz Milk Semey» اتاۋىمەن ءوز ونىمدەرىن شىعارىپ وتىر.
سەحتا 32 ءتۇرلى ءونىم ءوندىرىلىپ، ونىڭ 17ء-سى ءسۇت ونىمدەرى بولىپ تابىلادى: ءسۇت، ايران، قۇرت، ىرىمشىك، قىزىل ىرىمشىك، ماي جانە باسقا دا قۇنارلى ونىمدەر. سونىمەن قاتار، شۇجىق ونىمدەرىنەن 15 ءتۇرلى ءونىم شىعارىلىپ كەلەدى. قازىرگى ۋاقىتتا ABU ۋنيۆەرسيتەتىمەن بىرلەسىپ، سارىسۋدى قوسۋ ارقىلى كۆاس ازىرلەۋ پروسەسى پىسىقتالۋدا، ال بولاشاقتا چەچيل ىرىمشىگىن ءوندىرىسقا ەنگىزۋ جوسپارلانىپ وتىر، – دەيدى سەحتىڭ شارۋاشىلىق تەحنولوگى ءالي مارات ۇلى.
شارۋاشىلىقتىڭ الداعى ماقساتتارى ايقىن – ءونىم كولەمىن ۇلعايتىپ، ءوڭىر تۇرعىندارىن عانا ەمەس، بۇكىل رەسپۋبليكا جۇرتشىلىعىن تابيعي تازا ونىممەن قامتاماسىز ەتۋ. بولاشاقتا ءسۇت پەن شۇجىق ونىمدەرىن تەك وبلىسىمىزدىڭ شەكاراسىنان اسىرىپ، باسقا ايماقتارمەن ساۋدا-ساتتىق اياسىن كەڭەيتۋ ارقىلى جوعارى ساپالى تاۋاردى كەڭ تۇتىنۋشىلارعا جەتكىزۋ كوزدەلۋدە.
