قوستاناي وبلىسىنىڭ ليساكوۆسك قالاسىنىڭ تۇرعىنى دالەر ءىسماعۇلوۆ پەتيسيا باستاپ، ونى الەۋمەتتىك جەلىلەردە  تاراتا باستادى. بۇل تۋرالى «Alau.kz» حابارلادى. ول ءوزىنىڭ ءوتىنىشى ۇكىمەتكە جەتەدى دەپ ۇمىتتەنەدى.

31 جاستاعى دالەر ءىسماعۇلوۆ قوستاناي وبلىسىنىڭ ۋاقىتى تۇرعىنداردىڭ دەنساۋلىعىنا كەرى اسەر ەتەتىنىن ايتتى.

«2005 جىلى جازعى ۋاقىتقا كوشۋ الىپ تاستالىنعان بولاتىن. بۇل جالپى گەوگرافيالىق بەلدەۋ بويىنشا رەسپۋبليكا بويىنشا بارلىق ايماقتارعا سايكەس كەلەدى. الايدا، قوستاناي مەن قىزىلوردا وبلىستارىنان باسقا ءبىراز ايىرماشىلىقتار بار. قوستاناي وبلىسىنىڭ ستاندارتتى ۋاقىتى گەوگرافيالىق بەلدەۋدىڭ ۋاقىتىن 1 ساع 46 مينۋتقا وزىپ كەتەدى، بۇل  رەسپۋبليكانىڭ بارلىق وبلىستارىنان ەڭ جوعارعى كورسەتكىش. استرونوميالىق ۋاقىتتان مۇنداي ايىرماشىلىق بارلىق تۇرعىنداردىڭ ءومىر ءسۇرۋى ىرعىعىنا اسەر ەتەدى، اسىرەسە، بالالارعا. ءبىز «باسقا ۋاقىتتىڭ» تۇتقىنى بولىپ قالدىق. قىستا تاڭعى 9-دا ءالى قاراڭعى، ال جازدا 23.00-دە جارىق بولىپ تۇرادى. بۇدان ادامنىڭ بيوىرعاعى بۇزىلادى»، – دەدى پەتيسيا باستاماشىسى دالەر يسماعۇلوۆ.

دالەردى تانىستارى مەن دوستارى قولدادى. ول ءوتىنىشىن 18 قاڭتار كۇنى جاريالادى، ازىرگە 22 ادام قول قويدى. دالەردىڭ ۇسىنىسىن قولداعاندار مىناداي تۇسىنىكتەمە بەردى:

رۋسلان ەرمەنوۆ: «مەنىڭ جىل بويى ۇيقىم قانبايدى، بۇل مەنىڭ اشۋىمدى تۋعىزادى».

دينارا تولەگەنوۆا: «ءبىز اعىمداعى ۋاقىتقا سايكەس كەلمەيتىن ۋاقىت بەلدەۋىندە ءومىر ءسۇرىپ جاتىرمىز».

ازىرگە پەتيسياعا ليساكوۆسك قالاسىنىڭ تۇرعىندارى قول قويدى، ولاردىڭ ىشىندە قوستانايلىقتار مەن چەليابيندىقتار بار. دالەر قولداۋشىلاردىڭ سانى ارتا ءتۇسىپ، ونىڭ ءوتىنىشىن ۇكىمەت بەي-جاي قالدىرمايدى دەگەن ۇمىتتە.