جاڭانى قابىلداي الماۋ، ەسكىگە ەمەكسۋ قاشان دا قازاقتىڭ ساناسىنان ارىلماعان ادەت. «قازاقستان» ۇلتتىق ارناسىنا جاڭا باسشى كەلىپ، تىڭ دۇنيەلەر، سونى بەتبۇرىستار جاسالىپ جاتىر.

 «ويباي، «كەلىن» دەگەن بالە بولدى، نە جۇمىس ىستەتپەيدى، ۇرپاعىمىزدى وزگە دىلگە بۇرىپ بارادى» دەپ شۋلاعان ءۇندى سەريالدارى دا ەفيردەن الىنىپ تاستالدى. الداعى ۋاقىتتا تۇرىك سەريالدارىنا، ءتۇرلى شوۋ-كونسەرتتەرگە دە مۇنداي سۇرىپتاۋلار جاسالاتىنىن ەستىپ جاتىرمىز.

ال «باستى اقپارات» اتاۋىمەن «جاڭالىقتار» دا ەفيرگە ءسوزى ءوتىمدى، كاسىبي شەبەر، ءوز ءىسىنىڭ مامانى قىمبات دوسجان مەن دانيار مەڭىلبەكوۆتىڭ جۇرگىزۋشىلىگىنە ءوتتى. جاڭالىقتار قىزمەتىندە، ەلگە اقپارات جەتكىزۋدە وتكىر ماسەلەلەر كوزدەلىپ، حالىقتىڭ الەۋمەتتىك ماسەلەلەرى نازاردان تىس قالمايتىن، الداعى ۋاقىتتا ناعىز ۇلتتىڭ جوقشىسى بولار ارنا ەكەندىگىن دالەلدەي تۇسپەكشى.

بۇرىن سيپاي قامشىلاپ، ونشا بارا بەرمەيتىن تاقىرىپتارعا دا كەڭ كولەمدە ورىن بەرىلەتىنىن دە ەستىپ-بىلىپ، كورىپ جاتىرمىز. ونىڭ ءبىر ايعاعى كەشە عانا وتكەن كونستيتۋسياعا قاتىستى تەلەكوپىر. بۇعان دەيىن «قازاقستان» ارناسىنىڭ ەفيرىنەن كورىنبەك تۇگىلى، ەسىمدەرى اتالمايتىن ايدوس سارىم مەن ءامىرجان قوسانوۆتىڭ پىكىرتالاسقا قاتىسۋىنىڭ ءوزى الداعى ۋاقىتتا ۇلتتىق ارنانىڭ قانشالىقتى مۇمكىندككە يە بولعاندىعىن بايقاتادى.

بۇگىننەن باستاپ تەلەارناداعى تىڭ وزگەرىستەر كورەرمەن نازارىنا جول تارتتى. تاڭعى ۇيقىدان ويانىپ، قىزمەتكە جينالعان جاندارعا ەرەكشە كوڭىل كۇي سىيلاپ، ناعىز كرياتيۆ ۇسىنعان 25 جىلدىق تاريحى بار «تاڭشولپان» باعدارلاماسىنىڭ جاڭا فورماتى كورەرمەندەرىن بىردەن باۋراپ الدى. «تاڭشولپان» باعدارلاماسىنىڭ باستى ۇستانىمىنىڭ ءوزى – قىزمەتتەگى جاندارعا ارنالعان. ول قوعامنىڭ بارلىق سالاسىنداعى كورەرمەندى قوعامنىڭ بارلىق سالاسىنداعى قىزىقتى، تارتىمدى اقپاراتپەن قامتاماسىز ەتۋ. ەكى جۇرگىزۋشىگە كوزى ۇيرەنىپ، ودان ارتىق ادامدى قابىلداي المايتىنداي دەڭگەيگە جەتكەن كورەرمەندەر ءۇشىن ءتورت بىردەي جۇرگىزۋشىنى قابىلداي قويۋ وڭايعا سوقپاسى بەلگىلى. ال شىن مانىسىندە، تورتەۋى ءبىرىن-بىرى تولىقتىرىپ وتىرعانىن بايقاۋعا بولادى.

ارنا باسشىسى ەرلان قارين الداعى ۋاقىتتا دا تىڭ وزگەرىستەر بولاتىنىن ايتىپ وتىر. جانە ول ءبىر سوزىندە الاش قايراتكەرلەرىنىڭ ءومىرىن، ولاردىڭ تارتىسقا تولى تاعدىرىنىڭ ءبىر ءساتىن كورسەتەتىن سەريال جاساۋدى دا تاپسىرعانىن ايتتى.

سونىمەن قاتار، «تاڭشولپاندا» دا، «باستى اقپاراتتا» دا ساراپشى-مامانداردىڭ بولۋى ارنانىڭ حالىقارالىق ستاندارتقا ساي، ءار باعدارلاماعا، ءار اقپاراتقا، قوعامدا بولىپ جاتقان كەز كەلگەن وقيعاعا سىن كوزبەن قاراۋعا جەتەلەيدى. تەلەارنانىڭ مۇنداي ۇستانىمى الداعى ۋاقىتتا دامي تۇسەدى عوي دەپ ويلايمىز.

ءوزىمىز جاقسى كورەتىن ءبىر ءسوزىمىز بار عوي، «ماسكەۋ ءبىر كۇندە تۇرعىزىلعان جوق» دەيتىن. وسى ءسوزدى ۇلتتىق ارنانىڭ قازىرگى بەتبۇرىسىنا دا قولدانعان دۇرىس دەپ ويلايمىن. قىزمەتكە كەلگەنىنە ءبىر اي ەندى عانا بولعان ەرلان تىنىمباي ۇلىنىڭ قولعا الىپ جاتقان قىزمەتىنە قولداۋ ءبىلدىرىپ، ۇلتتىق ارنامىزدىڭ شىنىمەن دە ۇلتقا قىزمەت ەتەر ارنا بولۋىنا ات سالىسايىق.

ۇلتتىق ارنانىڭ ۇلت ءۇشىن قىزمەت ەتىپ كەلە جاتقانىن بارشاڭىز جاقسى بىلەسىزدەر، الداعى ۋاقىتتا دا بۇل ۇستانىمنان جاڭىلماسى انىق.