بۇگىن ۇلتتىق كىتاپتحانادا بەلگىلى جازۋشى، ەتنوگراف، تاريحشى، عالىم، “قاراكەرەي قابانباي”، “حاس باتىر قابانباي”، “تۇعىرىل حان”، “دەمەجان باتىر”، "حالىق كۇيشىسى قايراقباي”، “باسپاي” اتتى كىتاپتار مەن بىرنەشە ەتنوگرافيالىق ەڭبەكتەردىڭ اۆتورى زەينوللا سانىك پەن ونىڭ قىزى جانات زەينوللا قىزى بىرلەسىپ جازعان «قازاق ەتنوگرافياسى» اتتى كىتابىنىڭ تۇساۋكەسەرى بولىپ ءوتتى، دەپ حابارلايدى «قامشى»

اتالمىش كىتاپتا قازاقتىڭ تۇرمىس-سالتى، تۋىستىق اتاۋلار مەن ولاردىڭ ماعىنالارى، شارۋاشىلىعى جايىندا كەڭىنەن تۇسىنىك بەرىلگەن. كىتاپ 3 بولىمنەن تۇرادى:

ءى ءبولىم – ەتنوگرافيا دەگەنىمىز نە؟

ءىى ءبولىم – زاتتىق ەتنوگرافيا تۋرالى تۇسىنىك

ءىىى ءبولىم – رۋحاني ەتنوگرافيا

«بۇل كىتاپ ۇلتتىق بولمىس پەن مىنەزدى عانا ەمەس، بۇكىل قازاق حالقىنىڭ شىعۋ تەگىنەن باستاپ ءومىرىنىڭ بارلىق سان-سالاسىن تولىق قامتىيدى. تەك الەۋمەتتىك تۇرعىدا ەمەس، بيولوگيالىق، ياعني قايتالانباس قۇبىلىس ەسەبىندە دە قاراستىرادى. سونداي-اق قانشاما الاساپىران جاعداي بولسا دا، ءوز بىرلىگىن ۇستاپ تۇرعان ەتنوس تۋرالى مالىمەتتەرگە كەڭىنەن شولۋ بەرەدى» - دەپ جازىلعان كىتاپتىڭ اننوتاسياسىندا.

2013 جىلدىڭ 26 قىركۇيەگىندە ومىردەن وزعان قالامگەردىڭ ءىزىن جالعاستىرۋشى ۇرپاق – ءوزىنىڭ قىزى جانات زەينوللا قىزى دا اكەسىنىڭ سالعان سارا جولىن جالعاپ، وسى باعىتتى ۇستانۋدى ءجون كورگەن. بۇكىل جانۇياسى فيلولوگ، جازۋشى، ەتنوگراف، تاريحشى بولىپ كەلەتىن وتباسىدا گۇلسات زەينوللا اتتى قىزى عانا تەحنولوگ ماماندىعىنا بەت بۇرعان ەكەن.

بولاشاقتا زەينوللا سانىكتىڭ جازعان ەڭبەكتەرىن 20 تومدىق ەتىپ شىعارماق ماقساتتا. بۇل جايىندا قالامگەردىڭ اياۋلى جارى ءشامشىبانۋ عامزا قىزى بايانداپ بەردى. شىڭجاڭ ۋنيۆەرسيتەتىندە فيلولوگيا ماماندىعىن ءتامامداعان ءشامشىبانۋ اپامىزدىڭ دا اقىندىق ونەرى بار. سونىمەن قاتار، قىتايدىڭ بىرنەشە قالالارىندا اپامىزدىڭ 5 ولەڭدەر جيناعى جارىق كورگەن.

«بۇگىن وسى كىتابىنىڭ جارىققا شىعىپ، تۇساۋكەسەرى بولىپ جاتقاندىعىنا قاتتى قۋانىپ، تولقىپ تۇرمىن. ەتنوگرافيا بۇكىل ءبىر حالىقتىڭ ءومىرىن بەينەلەيدى. ەل بولامىن دەسەڭ، ەتنوگرافياڭدى دۇرىستا دەيدى. كەز كەلگەن مەملەكەتتىڭ ءوزىنىڭ ەتنوگرافياسى بولۋى كەرەك. «قازاق ەتنوگرافياسى» – ۇلتتىڭ ماقتانىشى. سول سەبەپتى ءقازىر قۋانىشتان تولقىپ وتىرمىن. زەكەڭ ءوزى بولسا، ءقازىر وسىنىڭ بارلىعىن كورەتىن ەدى. ەڭ الدىمەن، حالىققا راحمەت. وسى ەتنوگرافيا ءۇشىن، اۋىرىپ جۇرسە دە، 10-15 جىلداي ماتەريال جيناپ، ايانباي ەڭبەك ەتىپ جازىپ شىقتى، اقىرىنداپ باسپاعا وتكىزدى. بۇل كىتاپ ەڭ العاش ۇرىمجىدە اراب جازۋىندا جارىق كورگەن. مۇنى توتە جازۋدان قازاق تىلىنە اۋدارىپ، وزدەرى باسقارىپ، بۇگىنگى كۇنى تۇساۋكەسەرىن جاساپ وتىرعان قازاقستان جازۋشىلار وداعىنا، سونىمەن قاتار نۇرلان ورازالين باستاعان رەداكسيالار القاسىنا ۇلكەن راحمەتىمدى ايتامىن. وسىنداي كىتاپتى باسىپ شىعارىپ، ەلگە جەتكىزىپ وتىرعان «ان ارىس» باسپاسىنىڭ قىزمەتكەرلەرىنە دە العىسىمدى بىلدىرەمىن»، - دەپ قالامگەردىڭ جارى ءشامشىبانۋ عامزا قىزى ءوزىنىڭ جۇرەكجاردى لەبىزىن جەتكىزدى.

قامشىگەر: نازەركە لابيحان