ميشەل ماكگو قارجى ءجۋرناليسى بولىپ ءجۇمىس ىستەيدى جانە دە وزگەلەرگە ۇنەمى قارجىنى ۇنەمدەۋ جونىندە كەڭەستەر ايتىپ وتىرادى. ءبىراق ول بۇرىندارى اقشانى وڭدى-سولدى جۇمساپ وتىرعان ەكەن.

كەيىننەن ول ءبىراز ويلانىپ اقشانى تەك قاجەتتى دۇنيەلەرگە عانا جۇمساۋ كەرەك دەپ شەشكەن.  ميشەل جاڭا زاتتاردى ساتىپ الۋدان باس تارتتى. سونىمەن بىرگە ۇيدە پىسىرىلگەن تاماقتاردى جەپ، ۆەلوسيپەدپەن ءجۇرۋدى ادەتكە اينالدىردى. ءسويتىپ ول 365 كۇننىڭ ىشىندە 23 مىڭ دوللاردى ۇنەمدەدى

«مەن اقشانى كوپ جۇمسايتىن ادەتتەگى ادام ەدىم. اقشانى وزىڭە كەرەك دۇنيەگە جاراتقان سايىن باقىتتى بولاسىڭ دەگەن وتىرىك جارناماعا سەنەتىنمىن. ءبىراق مەن بۇلاي ءومىر سۇرۋگە بولمايتىنىن ءتۇسىندىم. سوسىن وسى كەمشىلىگىمنەن ارىلۋعا تىرىستىم، سودان زور ناتيجەگە قول جەتكىزدىم».،- دەيدى ميشەل. سونىمەن بىرگە اقشانى ۇنەمدەۋ ءۇشىن قانداي ارەكەتتەرگە بارعانىن بىلاي دەپ بايانداپ بەردى: 

يپوتەكا مەن كومۋنالدىق شىعىنعا، اتا-اناما كومەكتەسۋگە، عالامتور جۇيەسىنە، ۇيالى تەلەفوننىما، قايىرىمدىلىققا بايلانىستى ايىنا 2000 دوللار عانا جۇمسادىم. سونىمەن بىرگە شاشتارازعا بارىپ شاش قيدىرمادىم.

ال تۇرمىستىق زاتتارعا مەن اپتاسىنا 35 دوللار جۇمساعان بولاتىنمىن. مەن كينوتەاترعا، دەمالۋ ءۇشىن كافە مەن كلۋبتارعا بارۋدان باس تارتىپ، تاماقتى ۇيدە ءپىسىرىپ جەپ ءجۇرۋدى دە ادەتكە اينالدىردىم.

سونىمەن بىرگە كوسمەتيكا، جاڭا كيىم الۋدى دا توقتاتتىم. ءتىپتى دالادا جاڭبىر جاۋىپ تۇرسا دا اۆتوبۋقا مىنگەن جوقپىن.

ءبىر جىلدىڭ ىشىندە مەن ءدامدى تاماق ءپىسىرۋدى ۇيرەندىم، بۇرىندارى تاماق ءپىسىرۋ قولىمنان كەلمەيتىن. بۇل مەنىڭ كەزەكتى جەڭىستەرىمنىڭ ءبىرى ەدى. مەن تاماق ءپىسىرۋدى ۇيرەنگەنىمدى جەڭىس دەپ ەسەپتەيمىن.

باستاپقى كەزدە ماعان وتە قيىن بولدى. ءبىراق بارلىعىنا شىدادىم، كەيىن ۇيرەنىپ كەتتىم. مەن ۇنەمدەگەن 23 000 دوللار ارقىلى مەن يپوتەكانىڭ ءبىر بولىگىن تولەپ تاستادىم. مەن الداعى ۋاقىتتا ءدال وسىلاي ۇنەمدەيمىن دەپ ايتا المايمىن، الايدا اقشامدى دۇرىستاپ جۇمساۋعا تىرىسامىن. 

بۇل وقيعا وزگەلەرگە ساباق بولادى دەپ سەنەمىز. ەگەر ءبىز اقشانى جونىمەن جۇمساۋدى ۇيرەنسەك كوپ نارسەگە قول جەتكىزە الاتىنىمىز شىندىق.

دايىنداعان: اسەل وتەشوۆا