2016 جىلى 5 ماۋسىمدا اقتوبەدە تەراكت بولدى. تەرروريستەردىڭ توبى «پاللادا» جانە «پانتەرا» اتتى قارۋ-جاراق دۇكەندەرى مەن №6655 اسكەري بولىمىنە قاراقشىلىق شابۋىل جاساپ، سونىڭ سالدارىنان 8 ادام مەرت بولدى. ولاردىڭ 3ء-ۋى اسكەري قىزمەتكەرلەر. قالادا تەرروريستىك قاۋىپ-قاتەرءدىڭ جوعارعى «قىزىل» دەڭگەيى جاريالاندى. تەرروريزمگە قارسى باعىتتالعان وپەراسيا بارىسىندا 18 ادامنىڭ كوزى جويىلىپ، 9 ادام قۇرىقتالدى. نۇرسۇلتان نازاربايەۆتىڭ جارلىعىمەن 9 ماۋسىم ازالى كۇن دەپ جاريالاندى. Iشكi iستەر مينيسترi قالمۇحانبەت قاسىموۆ اقتوبەدەگى اتىس كەزىندە 21 ادام قازا بولىپ، 6-7 ادامعا ىزدەۋ سالىنعانىن ايتتى. 38 ادام جاراقات الدى.

لاڭكەستىك جاساعان سالافيتتەرمەن اتىسقان اقتوبەلىك پوليسەي «التىن ادام» اتاعىن يەلەندى.

شابۋىلدان سوڭ ەلدە تەرروريستىك قاۋىپ-قاتەردىڭ قالىپتى «سارى» دەڭگەيى جاريالانىپ، ول كەيىن بىرنەشە رەت ۇزارتىلىپ، بيىل قاڭتاردا عانا جويىلدى.

بىلتىر 28 قاراشادا اقتوبە وبلىستىق سوتىندا قارۋلى شابۋىلعا قاتىستى 29 ادامعا ۇكىم شىقتى. قارۋ-جاراق دۇكەندەرى مەن اسكەري ءبولىمدى باسىپ الۋعا تىكەلەي قاتىستى دەپ ايىپتالعان جەتى ادام ءومىر بويى باس بوستاندىعىنان ايىرىلدى. باسقا ايىپتالۋشىلار ءتۇرلى ايىپتارمەن ەكى جىلدان 22 جىلعا دەيىن سوتتالدى. ءبىر ادام قىلمىستى جاسىردى دەگەن ايىپپەن ءتورت جىلعا باس بوستاندىعىن شەكتەۋ جازاسىن الدى. بيىل قاڭتاردا اپەللياسيالىق سوت ۇكىمدى كۇشىندە قالدىردى.

كەيىننەن تەررورلىق شابۋىلعا قاتىسۋشىلاردىڭ وزەكتى ورتەگەن وكىنىشتەرى مەن وقيعا كۋاگەرلەرىنىڭ ەستەلىكتەرى توپتاستىرىلعان «ورازاداعى ويران» ءفيلمى جارىققا شىقتى.