ەنەسى مەن قايىن جۇرتىنان قىسىم كورگەن قىرعىزستاندىق كەلىننىڭ وقيعاسىن قامشى اقپاراتتىق اگەنتتىگى ازاتتىق راديوسىنا سىلتەمە جاساپ حابارلايدى.

«كەلىن بولىپ بارعاننان قورلىق كورىپ، توزاقتا ءومىر ءسۇردىم. ەنەم مەنى جاقتىرمادى، كىر جۋسام دا، نان پىسىرسەم دە قاسىمدا تۇرىپ الادى. وتىرسام وپاق، تۇرسام سوپاق بولدىم... جولداسىمنىڭ اناسى مەنى كورگەندە جىنى ەلەتىن بولدى»، - دەپ باستادى اڭگىمەسىن كەلىنشەك.

ال كۇيەۋىمەن سويلەسىپ ءجۇرىپ باس قوسقاندىعىن ايتىپ ءوتتى. التى جىل بويى بىرگە تۇرعان بۇل جۇپتىڭ ەكى بالاسى بار. كەلىن بولىپ بارعاننان كەيىن ءبىراز ۋاقىت وتكەن سوڭ تازاگۇلدىڭ دەنساۋلىعى ناشارلاپ، جاقسى كۇتىمدى قاجەت ەتەدى. دارىگەرلەر اۋىر جۇمىستار جاساماۋىن ەسكەرتكەن. الايدا، سونان سوڭ ەنەسى ودان سايىن اشۋلانا تۇسكەندىگىن ايتادى.

«ءبىر گەكتار جەرلەرى بار. كۇنىگە كارتوپ پەن جۇگەرى شاباسىڭ. بالاعا دا قارايمىن، جەرىنە دە قارايمىن، ءبىراق نە ىستەسەم دە، جاقتىرمايدى. مامىر ايىندا كەلىن بولىپ تۇسكەننەن سوڭ تامىز ايىندا سوقىر ىشەك بولىپ قالدىم. اۋرۋحانادان كەلگەن كۇنى قامىر يلەپ، نان جاپ دەدى. ءىشىم اۋىرىپ جاتقانىن ايتسام دا، قۇلاق اسپادى. جەرگە ءتۇسىپ قالعان المالاردى تاسىپ، جيناپ الاتىنبىز. جارتى شەلەكتەپ تاسىپ جاتسام، «ولگەندە بىتەسىڭ بە؟» دەپ ەكى شەلەكتەپ تاسىتقىزدى. كەيىننەن سوقىر ىشەگىم قايتا اشىلىپ، اۋرۋحاناعا جاتىپ قالدىم. بەز شىعىپ، ءتورت رەت وتا جاساتتىم. وسى بىشكەكتە جاتىپ ەمدەلدىم. ال، قىزىم ول كەزدە نارەستە ەدى، ەندى بەس اي بولعان. «تەزىرەك ەمدەلىپ، جازىلعىڭىز كەلسە، كۇن ساۋلەسىنە كوپ شىعا بەرمەڭىز» دەگەن دارىگەرلەردىڭ ەسكەرتۋىن ايتسام، «وندا سەنىڭ نەگە كەرەگىڭ بار، جوعال» دەدى. بالاسىنا وسى اۋرۋمەن اجىراس دەپ قويمادى»، - دەيدى اشىنعان تازاگۇل.

ونىڭ ايتۋىنشا، كۇيەۋى بۇل سۇمدىقتىڭ بارلىعىن بىلە تۇرا، ەش ءۇن قاتپايدى ەكەن. كەيىن كۇيەۋى رەسەيگە جۇمىس ىستەۋگە كەتكەن سوڭ، ەنەسى كەلىنى مەن بالاسىن اجىراستىرۋدىڭ جولىن ويلايدى. ونى ءبىر ۇلىنىڭ كومەگى ارقىلى ىسكە اسىرماق بولدى.

«2 قاراشا كۇنى قايىن ءىنىم كەلدى ۇيگە. مەن بالالارىممەن ۇيىقتاپ جاتقانمىن، ول كىشكەنە قىزىپ العان ەدى. ءبىر بالانى ۇستاپ الىپتى. شىقسام «بۇل بالانى تانيسىز با؟ ءسىز وسى بالاعا تيەيىن دەپ ءجۇر ەكەنسىز عوي، جۇرەدى ەكەنسىزدەر» دەدى. مەنىڭ اۋىزىم اشىلىپ قالدى. جاناعى بالادان مەنىڭ تۇرمىسىمدى بۇزعالى كەلدىڭ بە دەسەم، قايىن ىنىمە ءبىر قاراپ، ماعان ءبىر قاراپ، ءۇن قاتپادى. سونان سوڭ قايىن ەنەم مەنى كوك الا قويداي ەتىپ سابادى».

تازاگۇلدىڭ قايىن ەنەسى مەن كۇيەۋىمەن بايلانىسۋ مۇمكىن بولمادى. ال، ونىڭ ماناس ەسىمدى قايىن ىنىسىمەن سويلەسىپ، وقيعانىڭ ءمان-جايىن انىقتاپ ايتىپ بەرۋدى سۇراعاندا، ول بارلىعىن دا جوققا شىعاردى.

وسىلاي وتباسى بۇزىلىپ، ەكى بالاسىنان تىرىدەي ايىرىلعان تازاگۇل اتا-اناسىنىڭ ۇيىنە قايتىپ بارۋعا ءماجبۇر بولادى. ءبىراق ول جاقتا دا كوپ تۇراقتامادى. وزبەكستاننىڭ فەرعانا وبلىسى، مارجانتوك اۋىلىندا تۇراتىن اتا-اناسى ونى قايتادان باتكەنگە تۇرمىسقا بەرەدى. بۇل جولى ەشكىم دە ونىڭ پىكىرىمەن ساناسپادى.

«مەنى تاعى دا تۇرمىسقا بەردى. «ول ۇيلەنەتىن بولسا، سەن وتىرا بەرەسىڭ بە، تيەسىڭ» دەپ بەرىپ جىبەردى. مەن ونى كورگەن ەمەسپىن. مەنى الىپ بارىپ بەرگەن كۇنى ءبىر-اق كوردىم. ءقازىر مەنىڭ قولىمدا تۇك جوق. وزبەكستانعا كىرە المايمىن. قۇجاتىم جوق، تۋۋ تۋرالى كۋالىكتى قىرعىزستاندا العانمىن. اتا-انامنىڭ قۇجاتى وزبەكستاندىكى بولعان سوڭ بەرمەيدى ەكەن. ال ماعان وزبەكستاننان كۋالىك جوق»، - دەيدى ول.

تاعدىرى قاتال كەلىنشەك ءقازىر بىشكەك قالاسىندا. ەمدەلەم دەپ جۇرگەن تازاگۇل ءقازىر الىسىراق تۋىستارىنىڭ ۇيىندە پانالاپ ءجۇر.

قايىن جۇرتىندا قالعان ەكى بالاسىن ويلاپ، قۇسا بولعان ول بالالارىنا قالاي جەتەرىن بىلمەي وتىر. اۋىلدان الشاق شىعىپ كورمەگەن كەلىن ءقازىر قايىرىمدى جانداردىڭ كومەگىنە مۇقتاج. ءقازىر ءوزى قايدا جانە كىمگە بارارىن بىلمەي وتىر. باتكەنگە دە، ءوز ۇيىنە دە قايتۋعا جۇرەگى داۋالامايدى.

شولۋشى: نازەركە لابيحان