«كورمە» كەشەنىندە كانادالىق عالىم فرانك البونىڭ «استانا: ساۋلەت، ميف، تاعدىر» اتتى كىتابىنىڭ تانىستىرىلىمى ءوتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.
«استانا الەمنىڭ بىردە-بىر قالاسىنا ۇقسامايدى. ول الەمدىك ارحيتەكتۋراداعى بۇۇ سەكىلدى. ونىڭ عيماراتتارىندا تاريح، جەر بەتىندە ءومىر سۇرەتىن بارشا ادامزاتتىڭ ءداستۇرى كورىنىس تاپقان. ونىڭ باس جوسپارىنا تابيعاتتىڭ ءوزى شابىت بەرەدى جانە وعان الەمنىڭ بىرەگەي تاعدىرى - ادامزات الدىندا تۇرعان ءۇش جاھاندىق ماسەلەنى شەشۋگە اكەلەتىن تاعدىر ەنەدى. وزەكتى ماسەلەلەردىڭ ءبىرى - ءدىني ەكسترەميزم. قالعان ەكەۋى - يادرولىق قارۋدى تاراتپاۋ جانە تۇتاس عالامشارداعى تۇراقتى ەكولوگياعا قولداۋ كورسەتۋ. وسى ءۇش جاھاندىق ماسەلەنىڭ شەشىلۋى قازاقستان استاناسىنىڭ ءۇش تاماشا عيماراتىندا كورىنىس تاپقان. ەڭ الدىمەن، پيراميدا - بەيبىتشىلىك جانە كەلىسىم سارايى. بۇل الەمنىڭ بارلىق كونفەسسياسى پانا تاپقان زاماناۋي كەشەنى ىسپەتتەس. اتالعان عيماراتتا بارلىق كونفەسسيالاردىڭ دامۋىنا كومەك كورسەتەتىن بارشا ادامزاتتىڭ تەڭدىگى تۋرالى ايتىلاتىن ماڭىزدى شارالار وتەدى. ەكىنشى عيمارات - نازاربايەۆ ورتالىعى. مۇندا جوعارىدا اتالعان ءۇش جاھاندىق ماسەلەنىڭ شەشىلۋىنە كۇش سالىپ جۇرگەن كوممەرسيالىق ەمەس، گۋمانيتارلىق ۇيىمدار ءوز ورىندارىن تاپتى. جانە ءۇشىنشى عيمارات - «نۇر الەم». بۇل ەكسپو اۋماعىنداعى ورتالىق پاۆيلون»، - دەدى فرانك البا.
كىتاپ اۆتورى قازاقستان مەن ونىڭ استاناسىنىڭ بىرەگەي جەردە ورنالاسقانىن اتاپ ءوتتى. سونداي-اق، عالىم بەس مىڭ جىل بۇرىن ءدال وسى ايماقتا كوشپەندىلەردىڭ ءۇش نەگىزگى جاڭالىقتى ويلاپ تاپقانىن ەسكە سالدى. بۇل وڭىردە العاش رەت اتتى قولعا ۇيرەتتى، دوڭگەلەك پەن بەلدەۋ دۇنيەگە كەلدى جانە بارلىق ەۋروپالىق تىلدەر تاراعان پروتوۇندىەۋروپالىق ءتىلدىڭ نەگىزى قالاندى.
تۇساۋكەسەرگە قاتىسقان ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو ءوز كەزەگىندە كىتاپ اۆتورىنىڭ ساۋلەت پەن مادەنيەت سالاسىنداعى بەدەلدى مامانداردىڭ ءبىرى ەكەنىن ايتىپ ءوتتى. فرانك البو «گەرمەس كودى» اتتى بەستسەللەردى جازعان.
ر.ۆاسيلەنكونىڭ ايتۋىنشا، «استانا: ساۋلەت، ميف، تاعدىر» كىتابىندا پروفەسسور البا استانانىڭ قازاقستان ەلورداسى رەتىندە تابىستى بوي كوتەرۋى مەن قارقىندى دامۋىنا عىلىمي-وبەكتيۆتى، تاريحي-گەولوگيالىق، ارحيتەكتۋرالىق جانە مادەني تالداۋ جۇرگىزەدى. سونىڭ نەگىزىندە عالىم استانانىڭ ەلدىڭ ورتالىعىندا تابيعي ورنالاسۋىن قازاقستاننىڭ الەمدىك قاۋىمداستىق ەلدەرىمەن جانە حالىقارالىق ۇيىمدارمەن ساياسي، ەكونوميكالىق جانە مادەني ىنتىماقتاستىعىنىڭ كەڭ ءارى ماڭگىلىك بولاشاعىن قامتاماسىز ەتەتىن گەوگرافيالىق تۇرعىدا ءساتتى ورنالاسۋىمەن بايلانىستىرادى.
