"قازاقستان" رترك" اق باسقارما ءتوراعاسى ەرلان قارين اڭىز اكتەر دجەكي چاندى قازاقستانعا اكەلۋگە قانشا قاراجات جۇمسالعانىن ايتتى، - دەپ حابارلايدى قامشى اقپاراتتىق اگەنتتىگى.

"بۇگىن قازاقستان تەلەارناسىنداعى "تۇنگى ستۋديا" باعدارلاماسىنىڭ ەرەكشە قوناعى - دجەكي چان. ءبىر اپتا بۇرىن ول تۇڭعىش رەت قازاقستانعا ۇشىپ كەلدى جانە وسى سۇحباتتى ۇيىمداستىرۋ مۇمكىندىگى تۋدى، ول باسىندا تەك جۇڭگو كينوسى فەستيۆالىنىڭ اشىلۋ سالتاناتىنا قاتىسۋى كەرەك ەدى، الايدا ول بىزگە مۇمكىندىك جاساپ، از عانا ۋاقىتتىڭ ىشىندە باسپا ءسوز ءماسليحاتىن وتكىزىپ، باعدارلاماعا قاتىسۋعا كەلىسىم بەردى، ويدا جوقتا بولدى، سوڭعى ساتتەردە عانا شەشىلدى"، - دەپ جازدى ول Instagram ەسەبىندە.

سونىمەن قاتار، ايتۋىنشا، دجەكي چاننىڭ استاناعا كەلۋىنەن ءبىر تيىن دا شىعىن بولماعان ەكەن. "ول ءوز ۇشاعىمەن، دوستارىمەن بىرگە كەلدى، وعان ەشقانداي دا گونوراردى ەشكىم تولەگەن جوق، ەشقانداي دا رايدەرىن كورسەتكەن جوق. ءتىپتى قىمبات كولىكپەن قارسى الۋدان دا باس تارتتى، تەك قاراپايىم مينيۆەن سۇرادى، سول كولىكپەن دوستارىمەن بىرگە قالانى ارالادى. جەرگىلىكتى استانالىق رەستوراتورلار اڭىز ادامدى قۋانا-قۋانا قوناق قىلدى، ءتىپتى ءبىز ونىڭ كەشكى اسىنا دا شىعىندانبادىق"، - دەدى قارين.   

دجەكي چانعا تەك ەكسپو سۋۆەنيرى مەن بيلەتتەرى بەرىلىپتى. 

"دجەكي وتە ەرەكشە، وتە قاراپايىم، قايىرىمدى، ادال ءارى اقكوڭىل ادام ەكەن. سۋرەتكە تۇسۋدەن دە ەشكىمگە قارسى بولمادى، ءازىل ايتىپ، كوڭىلدى ءجۇردى. ول ءبىزدىڭ ەلدى ۇناتىپ قالدى، تاعى كەلۋگە دە كەلىسىم بەردى، بىرىككەن جوبالارىمىزعا قاتىسۋ ءۇشىن ۇزاعىراق ۋاقىتقا كەلەدى. كۇتەمىز"، - دەپ پىكىر ءبىلدىردى "قازاقستان" رترك" اق باسقارما ءتوراعاسى.

ەسكە سالايىق، اڭىزعا اينالعان اكتەر دجەكي چان قازاقستانعا 7 ماۋسىمدا كەلگەن بولاتىن. ونى استانا اكىمى اسەت يسەكەشيەۆ ايگىلى اكتەردى اۋەجايدان ءوزى كۇتىپ العان ەدى.