قازاق ەلى تاۋەلسىزدىگىن العاننان بەرى قۋاتتى مەملەكەت رەتىندە قالىپتاسىپ، الەمنىڭ الدىڭعى قاتارلى ەلىنە اينالۋ جولىندا تالاي بەلەستەردى باعىندىردى، تامىرى تەرەڭدە جاتقان ءتول تاريحىمىزدىڭ جاڭا بەتتەرى اشىلدى. وسى قىسقا عانا ۋاقىت ىشىندە ەكونوميكالىق جانە الەۋمەتتىك ماڭىزى زور جوبالاردى قولعا الىپ، الەمدىك دەڭگەيدەگى ءىس-شارالاردىڭ وتۋىنە ۇيىتقى بولا بىلدىك. جاھاندىق ماسەلەلەر تالقىعا تۇسكەن كەشەگى ەقىۇ-نىڭ ءسامميتى، استانا ەكونوميكالىق فورۋمى، ينۆەستيسيالىق فورۋم، دۇنيەجۇزىلىك يسلام ەكونوميكالىق فورۋمى جاس مەملەكەتىمىزدىڭ مەرەيىن ۇستەم ەتىپ، ابىرويىن اسقاقتاتتى. ەڭ باستىسى، دامۋ باعىتىن ايقىنداپ بەردى. وسىنداي كوشەلى ىستەردىڭ جالعاسى رەتىندە قازاقستان EXPO-2017 كورمەسىن وتكىزۋ قۇقىعىنا يە بولدىق.
EXPO-2017 حالىقارالىق كورمەسىن وتكىزۋگە نيەتتى قازاقستان الەمدىك قاۋىمداستىققا «بولاشاق ەنەرگياسى» تاقىرىبىن ۇسىندى. قالاي دەگەندە دە، EXPO سياقتى حالىقارالىق كورمەلەرگە قاتىسۋ قاي ەلدىڭ بولسا دا الەۋەتىن دۇنيەجۇزىنە پاش ەتۋگە بەرىلگەن تاماشا مۇمكىندىك دەۋگە بولادى. ونىڭ ۇستىنە، الەم الدىندا ءوزىڭنىڭ دامۋ دەڭگەيىڭدى ءىس جۇزىندە دالەلدەي وتىرىپ، شارانى جوعارى جاۋاپكەرشىلىكپەن وتكىزۋ – وتە زور قۇرمەت. ويتكەنى ەلدەردى دوستاستىرۋ، اۋىزبىرلىككە شاقىرۋ، ينفراقۇرىلىمداردى لايىقتى دەڭگەيدە دامىتۋ – جوعارى دارەجەدە وتەتىن كەز كەلگەن ءىس-شارانىڭ ماقتانىشى. استانادا EXPO وتكىزۋگە ارنالعان تاقىرىپ كەزدەيسوق تاڭداپ الىنعان جوق. جەرىندە تابيعي بايلىقتىڭ مول قورى بولا تۇرا قازاقستان بالامالى ەنەرگەتيكا ماسەلەسىن قوزعاۋى تەگىن ەمەس. ويتكەنى، شيكىزات كوزىنە اينالىپ وتىرعان ەلىمىز ونىڭ تۇبىندە ءبىر تۇگەسىلەتىنىن جاقسى تۇسىنەدى. سوندىقتان دا تۇراقتى ەنەرگيانى، بالامالى ەنەرگەتيكانى پايدالانۋ جانە تابيعي رەسۋرستاردى ساقتاۋ بارلىق ەنەرگەتيكالىق سالانى دامىتۋدىڭ باسىم باعىتىنىڭ ءبىرى بولىپ تابىلادى. «بولاشاق ەنەرگياسى» – جەل، كۇن، سۋ، عارىش بالامالى ەنەرگەتيكا، بيوماسسا ەنەرگياسى، اتموسفەراعا سو2 قالدىقتارىن تومەندەتۋ ماسەلەلەرىن تەرەڭ قوزعايتىن وتە اۋقىمدى تۇسىنىك.
«بولاشاق ەنەرگياسى» تاقىرىبىنا ەكسپو-2017 حالىقارالىق مامانداندىرىلعان كورمەسى قازاقستان ەلورداسىندا 2017 جىلدىڭ 10 ماۋسىمى مەن 10 قىركۇيەگى اراسىندا وتەدى. كورمەگە بۇكىل الەمنەن 5 ميلليوننان استام ادام كەلەدى دەپ كۇتىلۋدە.
وراسان زور وقيعاعا 100-دەن استام ەل، 10 حالىقارالىق ۇيىم مەن يننوۆاسيالىق تەحنولوگيالار سالاسىنداعى الدىڭعى قاتارلى كومپانيالار قاتىسادى. كورمە شەڭبەرىندە بۇگىنگى كۇنگى وزەكتى ەنەرگيانىڭ بالامالى كوزدەرى مەن «جاسىل تەحنولوگيالار» سۇراعىنداعى اسا جاڭا شەشىمدەردى كورسەتۋ كۇتىلەدى.
«بولاشاق ەنەرگياسى» ەكسپو-2017 كورمەسى تۇراقتى ەنەرگيا كوزدەرىن دامىتۋعا، ەنەرگيا ۇنەمدەۋ سەنىمدىلىگى مەن تيىمدىلىگىن ارتتىرۋعا باعىتتالعان ستراتەگيالاردى، باعدارلامالار مەن تەحنولوگيالاردى زەرتتەۋگە بەيىمدەلگەن. ونىڭ ماقساتى – جاڭارمالى ەنەرگيا كوزدەرىن پايدالانۋدى جانە ەنەرگەتيكالىق رەسۋرستاردى ءتيىمدى تۇتىنۋدى ىنتالاندىرۋ.
بۇگىنگى كۇنى بىزگە قول جەتىمدى ەنەرگورەسۋرستار ادامزاتتىڭ اجىراتىلماس مۇراسى بولىپ تابىلادى، ونى جاۋاپتى جانە ۇتىمدى پايدالانۋ قاجەت. بۇل جاھاندىق ءىس-شارانىڭ مىندەتى – ەنەرگيا تۇتىنۋدى جوسپارلاۋ مەن باقىلاۋ، سونداي-اق بولاشاق ۇرپاقتاردىڭ ءومىرى ءۇشىن قاجەتتى تۇراقتى ەنەرگيا كوزدەرى مەن ءبىزدىڭ عالامشارىمىزداعى بۇكىل جاندىنى ساقتاپ قالۋ ءۇشىن حالىقارالىق قوعاماستىقتى جاۋاپكەرشىلىك سەزىمىنە شاقىرۋ.
مەملەكەت باسشىسى ەلىمىزدىڭ «ەكسپو-2017» كورمەسىن وتكىزۋدەگى ماقساتى قازاقستاننىڭ تابىستارىن ايگىلەۋدى، الەمدىك قوعامداستىققا ونىڭ مۇمكىندىكتەرىن پاش ەتۋدى كوزدەيتىنىن اتاپ ءوتتى. – ءبىزدىڭ رەسپۋبليكامىزدى كوپتەگەن اسپەكتىلەر بويىنشا – ءىرى ەنەرگەتيكالىق مەملەكەت، ۋران كەنىن وندىرەتىن جەتەكشى ەل، استىق ەكسپورتتاۋشى، باي تابيعي رەسۋرستارعا يە مەملەكەت رەتىندە بىلەدى. ەندى بولاشاققا ۇمتىلعان جاڭا ەلدى كورسەتۋ قاجەت. ۇلتتىق پاۆيلون تۇجىرىمداماسىنىڭ ءوزى دە قازاقستان جەتكەن جەتىستىگىمەن توقتالىپ قالمايتىنىن، ءاردايىم ءارى قاراي ىلگەرىلەۋدى ماقسات تۇتاتىنىن كورسەتەدى، - دەدى ەلباسىمىز. سونداي-اق، قازاقستان پرەزيدەنتى جوبا استانانىڭ بەدەلىن بۇدان دا نىعايتۋعا سەپتىگىن تيگىزەتىنىنە نازار اۋداردى. – كورمە ەلوردامىزدى مۇلدە وزگە قىرىنان كورسەتەدى، ونى كەڭەيتە جانە كوركەيتە تۇسەدى. بۇگىنگى تاڭدا استانادا ماڭىزدى نىساندار از سالىنعان جوق. الايدا، ەكسپو كەشەنى – مۇلدە باسقا ساپاداعى، XXI عاسىر تالاپتارىنا تولىقتاي ساي كەلەتىن تەحنولوگيالار قولدانىلاتىن جوبا. ەلوردا تۇرعىندارى مەن مەيماندارى ءۇشىن ەنەرگەتيكا سالاسىنداعى بولاشاقپەن قاۋىشۋدىڭ، عىلىمي جەتىستىكتەردى كورۋدىڭ جانە بوي كوتەرگەن نىسانداردىڭ كوركىن تاماشالاۋدىڭ تاماشا مۇمكىندىگى تۋادى، - دەدى مەملەكەت باسشىسى.
استانا ەكسپو-2017 بۇكىلالەمدىك ارەنادا قازاقستاننىڭ تانىلۋى مەن تۋريستىك تارتىمدىلىعىن ارتتىرۋعا، ءبىزدىڭ حالقىمىزدىڭ قوناقجايلىلىعىن كورسەتۋگە باعىتتالعان. كورمە وتكىزۋ، سونىمەن قاتار ەلوردانىڭ، تۇتاستاي ەلىمىزدىڭ ەكونوميكالىق جانە ينفراقۇرىلىمدىق دامۋى ءۇشىن قوسىمشا ستيمۋل بولادى. ەكسپو وتكىزۋ ورنىندا سالىناتىن وبەكتىلەر بولاشاقتا قازاقستان مەن ونىڭ ەلورداسىن ءىرى حالىقارالىق، كورمەلىك جانە اقپاراتتىق- پرەزەنتاسيالىق الاڭ رەتىندە قاراستىرۋعا مۇمكىندىك بەرەدى.
قورىتا كەلگەندە، كۇننەن كۇنگە دامىپ جاتقان زاماناۋي تەحنولوگيالاردى ءتيىمدى پايدالانۋ ۇكىمەتتىك دەڭگەيدە قولعا الىنسا، ءبىزدىڭ ءداستۇرلى ەنەرگيا كوزدەرىنە تاۋەلدىلىگىمىزدى ايتارلىقتاي تومەندەتۋگە مۇمكىندىك تۋار ەدى. سوندا ءبىز قورشاعان ورتانى زياندى قالدىقتاردان قورعاپ قانا قويماي، كوپتەگەن جۇمىس ورنىن قۇرىپ، ساتىپ الۋ قابىلەتتىلىگىن ارتتىرا الامىز. سوندىقتان دا ءبىزدىڭ تاۋەلسىز جاس مەملەكەتىمىز ءۇشىن EXPO-2017 كورمەسىن وتكىزۋدىڭ ماڭىزى وتە زور.بۇل شارانى كەمشىلىكسىز، ءوز دەڭگەيىندە وتكىزۋ ءۇشىن كوپ كۇش - جىگەر جۇمساۋىمىز كەرەك. ەرەڭ ەڭبەكتىڭ، جالىندى جىگەردىڭ، تەمىردەي ءتارتىپتىڭ، اسا زور اقىلدىڭ ارقاسىندا يىقتاعى بۇل جۇكتى دە ارتقا تاستايمىز دەگەن ۇمىتتەمىز. قازاقستان – بولاشاقتىڭ ەنەرگياسى!
