الماتىدا ترامۆاي جەلىلەرىن الۋ جۇمىستارى جالعاسىپ جاتىر. شىلدە ايىندا 18 كوشە قيىلىسىنداعى رەلستەر دەمونتاجدالادى، دەپ حابارلايدى Qamshy.kz اقپارات اگەنتتىگى.

اتاپ ايتقاندا جاروكوۆ كوشەسى مەن تيميريازيەۆ، اباي، جاندوسوۆ، ساتپايەۆ كوشەلەرىنىڭ، ماقاتايەۆ كوشەسى مەن جانگەلدين، قالداياقوۆ، ابىلاي حان، پانفيلوۆ كوشەلەرىنىڭ قيىلىسىنداعى ترامۆاي جەلىلەرى الىنادى.

سونداي-اق، تولە بي كوشەسى مەن وتەگەن باتىر، روزىباكييەۆ، تۇرعىت وزال، مومىش ۇلى، تىلەندييەۆ، برۋسيلوۆسكيي كوشەلەرىنىڭ قيىلىسىنداعى ەسكىرگەن رەلستەر الىناتىن بولادى.

قالالىق اۆتوموبيل جولدارى باسقارماسى ازىرگە بۇل جۇمىستاردىڭ قاي كۇنى باستالاتىنىن حابارلاعان جوق. 

بۇگىندە شيەۆچەنكو كوشەسىنىڭ بويىنداعى قونايەۆ پەن تولەبايەۆ كوشەسىنە دەيىنگى ايماقتا، وتەپوۆ كوشەسىنىڭ بويىنداعى جاروكوۆ پەن روزىباكييەۆ اراسىنداعى بولىكتەن، قونايەۆ كوشەسىنىڭ بويىنداعى شيەۆچەنكو مەن قابانباي باتىر اراسىنداعى بولىگىندە ترامۆاي رەلستەرى الىندى.

جوعارىدا اتالعان قيىلىستاردا جول قوزعالىسى شەكتەۋلى بولماق.

قازىرگە دەيىن جوسپارلى 250 مىڭ شارشى مەتر اۋماققا سالىناتىن جول توسەمىنىڭ 50 مىڭ شارشى مەترىنە جول توسەمى سالىنعان. جوندەۋ جانە قۇرىلىس جۇمىستارىنا جەرگىلىكتى بيۋدجەتتەن 9،5 ميلليارد تەڭگە (شامامەن 30 ميلليون دوللار) بولىنگەن.

قالالىق اكىمدىكتىڭ حابارلاۋىنشا، "جولداعى كولىك اعىنىن ارتتىراتىن" جۇمىستار كەلەسى ايدا باستالادى. الماتىدا ترامۆاي قوزعالىسى 2015 جىلى كۇزدە، ترامۆاي قاتىسقان ەكى جول اپاتىنان سوڭ توقتاتىلعان. الماتى تۇرعىندارى ينتەرنەتتە قالادا ترامۆايدى قولداپ قول جيناعان. ترامۆاي قىزمەتىن توقتاتۋدى سىنايتىندار ترامۆاي قالاداعى ترامۆاي دەپوسى ورنالاسقان ءتورت گەكتار جەردى يەلەنۋ قاجەت بولعاندىقتان توقتاتىلعان بولۋى مۇمكىن دەيدى. وتكەن اپتادا ەكولوگيا بەلسەندىلەرى قالا اكىمى باۋىرجان بايبەككە "قالا ەكولوگياسىن، ساۋلەتى مەن تاريحىن جويۋعا سىڭىرگەن ەڭبەگى" ءۇشىن گراموتا تاپسىرعان.