فيليپپين ەلىندە بوكستان جاسوسپىرىمدەر اراسىندا ءوتىپ جاتقان ازيا چەمپيوناتىندا قازاقتىڭ 10 وعىلانى شيرەك فينالعا ءوتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

جارىستىڭ ءۇشىنشى كۇنى شارشى الاڭعا التى بوكسشىمىز شىعىپ، تورتەۋى باسەكەنى ارى قاراي جالعاستىرۋعا مۇمكىندىك السا، ونىڭ ەكەۋى عانا قارسىلاستارىنا جول بەردى.

57 كەلى سالماقتا سىنعا تۇسكەن وتانداسىمىز دميتريي ۆارمين ءۇندىستاندىق بوكسشىدان 4:1 ەسەبىمەن، 66 كەلى سالماقتاعى تاعى ءبىر جەرلەسىمىز سالىمگەرەيەۆ ءسالىمجان جاپونيالىق بوكسشىدان 5:0 ەسەبىمەن ۇتىلىپ قالدى.

ال 50 كەلى سالماقتا ونەر كورسەتكەن تالعات سىرىمبەتوۆ قارسىلاسىن ۋاقىتىنان بۇرىن ۇتسا، 60 كەلىدە سىنعا تۇسكەن ورەنىمىز بەكزات ەرىمبەت يراندىق قارسىلاسىن جارىس جولىنان شىعاردى. 46 كەلىدە جۇدىرىقتاسقان اقىلبەك مۇحتاروۆ قىرعىزستاندىقتان ايلاسىن اسىرسا، 54 كەلىدە ەل نامىسىن قورعاپ جۇرگەن ايتجان ءاشىرحان موڭعوليا بوكسشىسىن 5:0 ەسەبىمەن تىزە بۇكتىردى.

وسىلايشا ازيا چەمپيوناتىنىڭ ءۇش كۇندىك قورىتىندىسى بويىنشا شيرەك فينالعا قازاقستان مەن وزبەكستاننان 10 بوكسشىدان شىعىپ، كوش باستاپ كەلەدى.

ەستەرىڭىزگە سالا كەتەيىك، وسىعان دەيىن «سارىقۇرلىق» دوداسىن قازاق بوكسشىلارى ءساتتى باستاعانىن ايتقان بولاتىنبىز.