7 تامىزدا استانا قالاسىنىڭ اكىمى اسەت يسەكەشيەۆ بەلارۋس رەسپۋبليكاسى پرەمەر-مينيسترىنىڭ ورىنباسارى اناتوليي كالينينمەن ەكىجاقتى كەزدەسۋ وتكىزدى، دەپ حابارلايدى Qamshy.kz اقپارات اگەنتتىگى.

قالا اكىمدىگىنىڭ مالىمەتىنە سۇيەنسەك، بەلارۋس دەلەگاسياسى ەلوردامىزعا ەكسپو-2017 كورمەسىنىڭ قۇرىلىس نىساندارى سالاسىندا، قالالىق ينفراقۇرىلىم، كوممۋنالدى شارۋاشىلىق باسقارماسى سەكتورىندا استانانىڭ تاجىريبەسىن ۇيرەنۋ ءۇشىن كەلدى.

كەزدەسۋ بارىسىندا تاراپتار ساۋلەت جانە قالا قۇرىلىسى، سمارت تەحنولوگيالاردى قولدانۋ، قالالىق شارۋاشىلىقتى باسقارۋ، ەنەرگوتيىمدى جاسىل قۇرىلىس ستاندارتتارىن قولدانۋ، قوعامدىق كولىكتىڭ جۇمىسى، اۋماقتى اباتتاندىرۋ سالاسىندا ىنتىماقتاستىق ماسەلەسىن تالقىلادى. ەنەرگوتيىمدى تەحنولوگيالاردى قولدانۋ مەن قالالاردى دامىتۋ سالاسىندا ىنتىماقتاستىق ورناتۋ جانە تاجىريبە الماسۋ باستى ءارى وزەكتى ماسەلە بولدى. وعان قوسا، قوس تاراپ كوممۋنالدى تەحنيكا جانە جابدىقتار ءوندىرىسى سالاسىندا ونەركاسىپتىك كووپەراسيادا ىنتىماقتاستىق ماسەلەسىن تالقىلادى.

ونىمەن بىرگە بەلارۋس ەلىنىڭ دەلەگاسياسى استانانىڭ باس جوسپارىمەن تانىسىپ، قالا باسشىلىعىمەن قوسىمشا كەزدەسۋلەر وتكىزدى.

ەستەرىڭىزگە سالا كەتەيىك، ەلباسىنىڭ تاپسىرماسى بويىنشا استانادا 2020 جىلعا دەيىن قالانى دامىتۋ باعدارلاماسى ىسكە اسىرىلۋدا، وعان سايكەس استانا شاھارى ءوزىن اقىلدى ءارى ءقاۋىپسىز قالا، ءوڭىر شەڭبەرىندە ينۆەستورلار مەن يننوۆاسيالار ءۇشىن وڭىرلىك حالىقارالىق ورتالىق رەتىندە قالىپتاستىرادى.