ۇلتتىق ەكونوميكا ءمينيسترى تيمۋر سۇلەيمەنوۆ سەيسەنبىدە وتكىزىلگەن ۇكىمەت وتىرىسى بارىسىندا «بيزنەستىڭ جول كارتاسى 2020» بيزنەستى قولداۋ مەن دامىتۋدىڭ ءبىرىڭعاي باعدارلاماسىن جۇزەگە اسىرۋ بارىسى تۋرالى باياندادى دەپ حابارلايدى Qamshy.kz اقپارات اگەنتتىگى ق ر پرەمەر-مينيسترىنىڭ باسپا ءسوز قىزمەتىنە سىلتەمە جاساپ.

«2017 جىلى «بيزنەستىڭ جول كارتاسى 2020» باعدارلاماسىن جۇزەگە اسىرۋعا رەسپۋبليكالىق بيۋدجەتتەن 49،1 ملرد. تەڭگە ءبولىندى، ونىڭ 30 ملرد. تەڭگەسى جالپى سيپاتتاعى ترانسفەرتتەر ارقىلى قاراستىرىلعان. وتكەن جىلدىڭ قورىتىندىلارى بويىنشا ءبىرىڭعاي باعدارلامانىڭ قاتىسۋشىلارى 204 ملرد. تەڭگە سوماسىندا سالىق تولەگەن، ءونىمنىڭ جيىنتىق پايداسى 3،3 ترلن. تەڭگەنى قۇرادى،  47،5 مىڭ جۇمىس ورنى ساقتالدى جانە قۇرىلدى»، – دەدى سۇلەيمەنوۆ.    

ول بۇگىنگى كۇنى سىياقى مولشەرلەمەسىن سۋبسيديالاۋدىڭ ەسەبىنەن 1 024 كاسىپكەر ءوز جوبالارىنىڭ قارجىلاندىرۋ شارتتارىن جاقسارتا العانىن اتاپ كورسەتتى. ارزانداتىلعان نەسيەلەر سوماسى 90،1 ملرد. تەڭگەنى قۇرادى. بەرىلگەن سۋبسيديالاردىڭ جالپى كولەمى 17،5 ملرد. تەڭگەنى قۇرايدى.

«505 كاسىپكەر 17،1 ملرد. تەڭگەگە نەسيەلەر بويىنشا كەپىلدەمە الۋعا قول جەتكىزدى. كەپىلدەردىڭ جالپى كولەمى 6،8 ملرد. تەڭگەنى قۇرادى. 15 ملرد. تەڭگە سوماسىنداعى 24 شاعىن جانە ورتا كاسىپكەرلىك سۋبەكتىلەرىنە جەتىسپەيتىن ينفراقۇرىلىم جۇرگىزىلدى. جاڭا بيزنەس باستامالارىن جۇزەگە اسىرۋ ءۇشىن 221،4 ملرد. تەڭگە سوماسىنداعى 114 مەملەكەتتىك گرانت بەرىلدى»، – دەدى مينيستر. 

بۇدان باسقا، 14 مىڭ جاڭا جانە جۇمىس ىستەپ جاتقان كاسىپكەرلەر بيزنەس-تاجىريبەلەردەن ءوتتى جانە كاسىپكەرلىك نەگىزدەرىن وقىپ ۇيرەندى.

ونىڭ ايتۋىنشا، اعىمداعى جىلى جالپى سيپاتتاعى ترانسفەرتتەر كولەمى تۋرالى قازاقستان رەسپۋبليكاسى زاڭىنىڭ اياسىندا سۋبسيديالاۋعا، نەسيەلەردى كەپىلدەندىرۋگە جانە مەملەكەتتىك گرانتتاردى بەرۋگە وبلىستاردىڭ، استانا جانە الماتى قالالارىنىڭ جەرگىلىكتى بيۋدجەتتەرىندە شىعىندار كوزدەلىپ وتىر. اتالعان وزگەرىستەر جەرگىلىكتى اتقارۋشى ورگانداردىڭ جۇمىسىن بيۋدجەت قاراجاتىن پايدالانۋدىڭ تيىمدىلىگىن ارتتىرۋعا باعدارلايدى.

«اعىمداعى جىلى الدىڭعى جىلدارعا قاراعاندا بيۋدجەتتىك قاراجاتقا قوسىمشا قاجەتتىلىكتەر جەرگىلىكتى بيۋدجەتتەردىڭ ەسەبىنەن قارجىلاندىرىلۋدا. ءىستىڭ مۇنداي بەتالىسى اكىمدىكتەردى نەعۇرلىم ناقتى ەسەپ جۇرگىزۋگە جانە كاسىپكەرلەردىڭ ناقتى جوبالارىنا قارجى بولۋگە ىنتالاندىرادى. بۇل مۇمكىندىكتەردى ءقازىردىڭ وزىندە الماتى، جامبىل، سولتۇستىك قازاقستان جانە وڭتۇستىك قازاقستان وبلىستارىنىڭ اكىمدىكتەرى پايدالانىپ وتىر، بۇلاردا 2،5 ملرد. تەڭگە كولەمىندە قوسىمشا قارجى بولىنگەن»، – دەدى مينيستر.

ونىڭ ايتۋىنشا، ەكونوميكانى نەسيەلەۋدىڭ ىشكى نارىعىنداعى اعىمداعى جاعداي باعدارلاماعا تۇجىرىمدامالىق وزگەرىستەر ەنگىزۋدى تالاپ ەتەدى. «نەسيەلەر بويىنشا قۇبىلمالى سىياقى مولشەرلەمەسىن ەنگىزۋ. بۇگىندە ول بويىنشا سۋبسيديالاۋ جۇزەگە اسىرىلاتىن نەسيەلەر سىياقىسىنىڭ نومينالدىق مولشەرلەمەسىنىڭ شەكتى كولەمى 19%-دان اسپاۋى ءتيىس. بۇل رەتتە، قارىزدىق قاراجاتتاردىڭ وزىندىك قۇنىنىڭ باعدارى بولىپ تابىلاتىن ۇلتتىق بانكتىڭ بازالىق ستاۆكاسى 10،5%-دى قۇرايدى. ءىس جۇزىندە قازىرگى كەزەڭدە مەملەكەت نەسيە قارجىلارىنىڭ قۇنىن ەداۋىر ارتىق تولەپ وتىر»، – دەدى سۇلەيمەنوۆ.

بۇدان باسقا، 180 ملن.-عا دەيىنگى نەسيەلەردى سۋبسيديالاۋ كەزىندە وۇك-تى قاتىستىرماۋ ۇسىنىلىپ وتىر. «بۇگىندە 180 ملن. تەڭگەگە دەيىنگى نەسيەلەردى وۇك-سىز كەپىلدەندىرۋ تاجىريبەسى بار. بۇل بەرىلگەن نەسيەلەر سانىن وسىنداي وزگەرىستەر ەنگىزىلگەن كۇننەن باستاپ ەكى ەسەدەن استام ۇلعايتۋعا مۇمكىندىك بەردى»، – دەدى سۇلەيمەنوۆ.

ونىڭ ايتۋىنشا، شاعىن جانە ورتا كاسىپكەرلىك سۋبەكتىلەرى ءۇشىن نەسيەلەر بويىنشا سىياقى مولشەرلەمەسىن سۋبسيديالاۋ مەرزىمىن قازىرگى 3 جىلدان 5 جىلعا دەيىن ۇزارتۋ ۇسىنىلىپ وتىر.  

ءبىرىڭعاي باعدارلامادان سونداي-اق ءىرى كاسىپكەرلىك سۋبەكتىلەرىن الىپ تاستاۋ ۇسىنىلۋدا. «وڭىرلەردەگى بيۋدجەتتىك قاراجاتتىڭ جەتىسپەۋشىلىگى ءىرى كاسىپكەرلىك سۋبەكتىلەرىنىڭ اۋقىمدى جوبالارىنا مەملەكەتتىك قولداۋ كورسەتۋدىڭ ەسەبىنەن ورىن الىپ وتىرعانىن اتاپ ءوتۋ قاجەت»، – دەدى مينيستر.  

«ۇسىنىلىپ وتىرعان وزگەرىستەر مەملەكەتتىك قولداۋ شارالارىن مۇقتاج شاعىن جانە ورتا كاسىپكەرلىك سۋبەكتىلەرىنە قايتا باعدارلايدى، 180 ملن. تەڭگەگە دەيىنگى كاسىپكەرلىك جوبالارى بويىنشا قابىلدانعان شەشىمدەردىڭ جەدەلدىگىن ارتتىرادى دەپ ويلايمىز»، – دەدى سۇلەيمەنوۆ.